Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

43: Josué aga mokonzi ti azo

43: Josué aga mokonzi ti azo

MOÏSE aye ti gue na sese ti Canaan legeoko na azo ti Israël. Tongaso, lo hunda Jéhovah, lo tene: ‘Zia mbi fâ kota ngu ti Jourdain ti bâ pendere sese so.’ Me Jéhovah atene: ‘Awe! Sara tënë na ndo ni mbeni pëpe.’ Mo hinga ndali ti nyen Jéhovah atene tongaso?

A yeke ndali ti so lani, tongana Moïse apika kota tênë, lo na Aaron agonda Jéhovah pëpe. Ala tene pëpe na azo ni so a yeke Jéhovah la asara si ngu asigigi na yâ ti tênë ni. A yeke nda ni la si Jéhovah atene so lo yeke zia ala ti lï na azo ti Israël na sese ti Canaan pëpe.

Anze kete na peko ti kuâ ti Aaron, Jéhovah atene na Moïse: ‘Mû Josué, mo zia lo luti na gbele prêtre Eléazar nga na gbele azo kue. Mo tene na azo ni kue so Josué ayeke fini mokonzi ti ala.’ Moïse asara gi ye so Jéhovah atene na lo, tongana ti so mo bâ na lê ti foto ni.

Moïse afa na azo ni so Josué ayeke fini mokonzi ti ala

Na pekoni, Jéhovah atene na Josué: ‘Gbu ngangu, na sara mbeto pëpe. Mo yeke lï ande na azo ti Israël na sese ti Canaan so mbi mû zendo ni na ala, na mbi yeke duti na mo.’

Na pekoni, Jéhovah atene na Moïse ti gue na li hoto ti Nebo na sese ti Moab. Na li ti hoto ni, lo lingbi ti bâ ndo kâ na mbage ti ngu ti Jourdain ti bâ pendere sese ti Canaan. Jéhovah atene: ‘So ayeke sese so mbi tene mbi yeke mû ni ande na amolenge ti Abraham, Isaac na Jacob. Mbi zia mo ti bâ ni, me mbi yeke zia mo ti lï dä pëpe.’

Na li ti hoto ti Nebo, Moïse akui. Lo yeke lani na ngu 120. Lo ngbâ lani na ngangu mingi, na lê ti lo angbâ lani ti bâ ndo nzoni. Azo ti Israël asara vundu mingi na ala toto kuâ ti Moïse mingi. Me ala yeke na ngia mingi so Josué aduti fini mokonzi ti ala.

Nombre 27:12-23; Deutéronome 3:23-29; 31:1-8, 14-23; 32:45-52; 34:1-12.



Ahundango tënë

  • Na lê ti foto so, akoli use so aluti na tere ti Moïse so ayeke azo wa?
  • Jéhovah atene nyen na Josué?
  • Ngbanga ti nyen Moïse ague na li ti hoto ti Nebo? Jéhovah atene nyen na lo?
  • Moïse akui lani na ngu oke?
  • Azo ni asara vundu ngbanga ti nyen? Me atâa so kue, ala yeke na ngia teti nyen?

Ambeni hundango tënë

  • Diko Nombre 27:12-23.

    Jéhovah amû kota kusala wa na Josué ti sara? Nyen la afa so Jéhovah ayeke bâ lege ti azo ti lo laso? (Nom. 27:15-19; Kus. 20:28; aHéb. 13:7).

  • Diko Deutéronome 3:23-29.

    Ngbanga ti nyen Jéhovah azia lege pëpe na Moïse nga na Aaron ti fâ Jourdain ti si na sese ti zendo? E lingbi ti manda nyen dä? (Deut. 3:25-27; Nom. 20:12, 13).

  • Diko Deutéronome 31:1-8, 14-23.

    Tongana nyen andangba tënë ti Moïse na Israël afa so lo yeda na tâ be-ti-molenge na sengo ndo ti Jéhovah? (Deut. 31:6-8, 23).

  • Diko Deutéronome 32:45-52.

    A lingbi Tënë so ayeke na yâ ti Mbeti ti Nzapa andu fini ti e tongana nyen? (Deut. 32:47; Lév. 18:5; aHéb. 4:12).

  • Diko Deutéronome 34:1-12.

    Atâa so Moïse abâ Jéhovah lâ oko na lê ti lo pëpe, Deutéronome 34:10 afa nyen na ndo ti songo so lo yeke na ni na Jéhovah? (Ex. 33:11, 20; Nom. 12:8).