Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

42: Lele ti Balaam

42: Lele ti Balaam

LÂ OKO mo mä a tene lele asara tënë? Peut-être mo yeke tene: ‘Ên-ën. Nyama ayeke sara ka tënë pëpe.’ Me Bible asara tënë ti mbeni lele so asara tënë. Zia e bâ ye so asi.

Mbeni ange

Azo ti Israël aga nduru ti lï na sese ti Canaan awe. Balak, gbia ti Moab, asara mbeto ti azo ti Israël. Tongaso, lo tokua ambeni zo na ndo ti Balaam, mbeni zo so ahinga ndo mingi, ti ga ti deba azo ti Israël. Balak atene na Balaam so ni yeke mû gbâ ti nginza na lo. Tongaso, Balaam amû lele ti lo na lo gue ti bâ Balak.

Jéhovah aye pëpe ti tene Balaam adeba azo ti Lo. Tongaso, lo tokua ange ti lo ti luti na bê ti lege ti kanga lege na Balaam. Ange ni ayeke na mbeni yongoro épée na maboko ti lo. Balaam abâ ange ni pëpe, me lele ti lo abâ ange ni. Lele ni ayeke gi lege ti kpe ange ni, si na nda ni lo lango na sese. Ngonzo asara Balaam mingi, na lo pika lele ti lo na keke.

Na pekoni, Jéhovah asara si Balaam amä tënë so lele ni ayeke tene na lo. Lo tene: ‘Nyen si mbi sara na mo si mo yeke pika mbi tongaso?’

Balaam na ndo ti mbeni lele

Balaam atene: ‘Mo mû mbi tongana buba zo ti mo! Tâ tongana mbi yeke fade na épée, ka mbi fâ mo.’

Lele ni ahunda lo, atene: ‘Lâ oko mbi sara sioni tongaso na mo awe?’

Balaam atene: ‘Ên-ën.’

Tongaso, Jéhovah asara si Balaam abâ ange so aluti na bê ti lege na épée na maboko. Ange ni atene: ‘Mo pika lele ti mo ngbanga ti nyen? Mbi ga ti kanga lege na mo, ngbanga ti so a lingbi mo gue mo deba azo ti Israël pëpe. Tongana lele ti mo akpe fade mbi pëpe, ka mbi fâ mo awe, me mbi yeke sara ye oko na lele ti mo pëpe.’

Balaam atene: ‘Mbi sara siokpari. Mbi hinga fade pëpe so mo luti na lege.’ Ange ni azi lege na Balaam na lo gue lo bâ Balak. Atâa so kue, lo tara ti deba azo ti Israël fani ota, me ahon ti tene a duti tongaso, Jéhovah asara si Balaam airi tënë nzoni na ndo ti azo ti Israël lege ota.

Nombre 21:21-35; 22:1-40; 23:1-30; 24:1-25.



Ahundango tënë

  • Balak ayeke zo wa? Ngbanga ti nyen lo hunda ti tene Balaam aga?
  • Ngbanga ti nyen lele ti Balaam alango na sese?
  • Lele ni atene nyen na Balaam?
  • Mbeni ange atene nyen na Balaam?
  • Nyen la asi tongana Balaam atara ti deba azo ti Israël?

Ambeni hundango tënë

  • Diko Nombre 21:21-35.

    Ngbanga ti nyen Israël ahon na ngangu Sihon, gbia ti azo ti Amori, nga na Og, gbia ti Basan? (Nom. 21:21, 23, 33, 34).

  • Diko Nombre 22:1-40.

    Nyen la apusu lani Balaam ti tara ti deba azo ti Israël? E lingbi ti manda nyen na lege ti ye so? (Nom. 22:16, 17; aProv. 6:16, 18; 2 Pi. 2:15; Jude 11).

  • Diko Nombre 23:1-30.

    Atâa so Balaam asara tënë mo bâ mo tene lo yeke voro Jéhovah, tongana nyen asarango ye ti lo afa ti ala ni nde? (Nom. 23:3, 11-14; 1 Sam. 15:22).

  • Diko Nombre 24:1-25.

    Tongana nyen mbaï ti Bible so asara si e mä na bê mingi na gango tâ tënë ti aye so Jéhovah aleke ti sara? (Nom. 24:10; Es. 54:17).