Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

41: Ngbo ti gengere

41: Ngbo ti gengere
Moïse na ngbo ti gengere

NGBO so aduti na ndo keke na lê ti foto so ayeke tâ ngbo pëpe. A yeke ngbo ti gengere. Jéhovah atene na Moïse ti zia ngbo ni so na tere ti keke na nduzu, si azo alingbi ti bâ ni na ti ngbâ na fini. Me angbo so ayeke hara na sese so ayeke atâ ngbo. Ala te azo so awe, na ye so asara si tere ti azo ni aso. Ngbanga ti nyen?

A yeke ngbanga ti so azo ti Israël adiko tënë na tere ti Nzapa nga na Moïse. Ala tene: ‘Teti nyen si mo sigigi na e na sese ti Egypte ti kui na yando so? Ngu na kobe ayeke ge pëpe, na e te manne ni afun sen awe.’

Me manne ayeke nzoni kobe. A yeke na lege ti miracle si Jéhovah amû ni na ala. A yeke nga na lege ti miracle si lo mû na ala ngu. Me azo ni amû merci na Nzapa pëpe ndali ti ye so lo sara ti bata na ala. Tongaso, Jéhovah atokua asioni ngbo so ti te ala, na ala mingi akui.

Angbo ate azo ti Israël

Na nda ni, azo ni aga na tere ti Moïse, ala tene: ‘E sara siokpari, ngbanga ti so e diko tënë na tere ti Jéhovah nga na tere ti mo. Fadeso, sambela Jéhovah ti sara si angbo ni ahon.’

Tongaso, Moïse asambela ndali ti ala. Ni la, Jéhovah atene na Moïse ti sara ngbo ti gengere so, na ti zia ni na tere ti keke na nduzu si azo kue so ngbo ate ala abâ ni. Moïse asara tongaso. Azo so ngbo ate ala abâ ngbo ti gengere so na ala wara sava ti tere.

E lingbi ti manda ye na yâ ti ye so. E lingbi ti tene so e kue e yeke tongana azo ti Israël so angbo ate ala. E kue e yeke kui kuingo. Tongana mo bâ ndo na tere ti mo, mo yeke bâ azo aga mbakoro, ala yeke tï kobela na ala yeke kui. A yeke tongaso ndali ti so kozo koli na kozo wali, Adam na Eve, aturne peko ti ala na Jéhovah, na e kue e yeke amolenge ti ala. Me Jéhovah asara mbeni ye ti mû lege na e ti wara fini ti lakue lakue.

Jéhovah atokua Molenge ti lo, Jésus Christ, na sese ge. A pika Jésus na ndo ti keke na nduzu ndali ti so azo mingi atene ti ala lani so lo yeke sioni zo. Me Jéhovah amû Jésus ti sö e. Tongana e bâ ndo na mbage ti lo, na tongana e mû peko ti lo, e lingbi ti wara fini ti lakue lakue. E yeke manda ande ye mingi na ndo tënë so.

Nombre 21:4-9; Jean 3:14, 15.



Ahundango tënë

  • Na lê ti foto ni, nyen la angoro tere ti keke so? Ngbanga ti nyen Jéhovah atene na Moïse ti zia ngbo ni na ndo ti keke ni?
  • Tongana nyen azo ti Israël akiri singila pëpe na ye kue so Nzapa asara ndali ti ala?
  • Azo ni ahunda na Moïse ti sara nyen na peko ti so Jéhovah atokua asioni ngbo ti dë ala?
  • Ngbanga ti nyen Jéhovah atene na Moïse ti sara mbeni ngbo ti gengere?
  • E lingbi ti manda nyen na lege ti mbaï so?

Ambeni hundango tënë

  • Diko Nombre 21:4-9.

    So azo ti Israël adema tere ti ala ngbanga ti aye so Jéhovah amû na ala apusu e ti sara hange na nyen? (Nom. 21:5, 6; aRom. 2:4).

    Angu mingi na pekoni, azo ti Israël asara nyen na ngbo ni? Gbia Ezéchias asara nyen na ni? (Nom. 21:9; 2 aGbia 18:1-4).

  • Diko Jean 3:14, 15.

    Ziango ngbo ti gengere so na ndo ti keke ague tâ oko na fango Jésus Christ na ndo ti keke ti pasi tongana nyen? (aGal. 3:13; 1 Pi. 2:24).