Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

40: Moïse apika kota tênë

40: Moïse apika kota tênë

NGU 10 ahon, ngu 20, ngu 30 ngbii ngu 39 ahon nga, na azo ti Israël angbâ na yando. Me na yâ ti angu so kue, Jéhovah abata azo ti lo. Lo mû na ala manne ti te. Na kota lâ, lo fa lege na ala na lege ti mbinda, me na bï, na lege ti wâ. Na yâ ti angu so kue, abongo ti ala asuru pëpe na gere ti ala asuku nga pëpe.

A yeke fadeso kozo nze ti ngu 40 ni, ngbene ye so ala sigigi na sese ti Egypte. Azo ti Israël akiri aleke kando ti ala na Kadès. A yeke na ndo so la si, ngu 40 kozoni, a tokua awakala 12 ti gue ti bâ sese ti Canaan. Miriam, ita ti Moïse, akui ge na Kadès. Nga, tongana ti so a si lani, mbeni kpale akiri abâ gigi.

Azo agi ngu ti nyon gbä. Tongaso, ala dema tere ti ala na Moïse, ala tene: ‘A yeke nzoni fade ti tene e kui. Ngbanga ti nyen mo sigigi na e na Egypte ti ga na sioni ndo so ye oko ayeke pusu dä pëpe so? Ablé, afigue, araisin na agrenade ayeke pëpe. Ngu ti nyongo ni ayeke nga même dä kete pëpe.’

Moïse ayeke pika kota tênë ni

Tongana Moïse na Aaron ague na tabernacle ti sambela, Jéhovah atene na Moïse: ‘Bungbi azo kue na ndo oko. Sara tënë na kota tênë so na lê ti ala kue, na fade gbâ ti ngu ayeke sigigi alingbi na azo ni nga na anyama ti ala kue.’

Moïse abungbi azo ni kue, na lo tene na ala: ‘Ala, azo so amä na bê na Nzapa pëpe so! A lingbi mbi na Aaron e sara si ngu asigigi na kota tênë so ndali ti ala?’ Tongaso, Moïse apika kota tênë so fani use, na kota ngu asigigi na yâ ni. Ngu so alingbi na azo nga na anyama ti ala kue.

Me ngonzo asara Jéhovah mingi na tere ti Moïse na Aaron. Mo hinga nda ni? A yeke ndali ti so Moïse na Aaron atene so ala la ayeke sara si ngu ayeke sigigi na yâ ti kota tênë so. Me ti tâ tënë ni, a yeke Jéhovah si asara ni. Na teti so Moïse na Aaron atene tâ tënë na ndo tënë so pëpe, Jéhovah atene so ni yeke se ala. Lo tene: ‘Ala yeke gue na azo ti mbi na sese ti Canaan pëpe.’

Kete na pekoni, azo ti Israël alondo na Kadès ahon. A ninga pëpe, ala si na hoto ti Hor. Aaron akui na li ti hoto so. Lo yeke lani na ngu 123. Mawa asara azo ti Israël mingi, si ala toto kuâ ti Aaron lango 30. Molenge ti lo Eléazar aga kota prêtre ti mara ti Israël na peko ti lo.

Nombre 20:1-13, 22-29; Deutéronome 29:5, Néhémie 9:21.



Ahundango tënë

  • Tongana nyen Jéhovah abâ lege ti azo ti Israël na ngoi so ala yeke na yando?
  • Tongana ala yeke na Kadès, azo ti Israël adema tere na ndo ti ye wa?
  • Tongana nyen Jéhovah amû ngu na azo ni nga na anyama ti ala?
  • Na lê ti foto ni, koli so akpo li ti maboko ti lo na ndo ti kate ti lo so ayeke zo wa? Ngbanga ti nyen lo yeke sara tongaso?
  • Jéhovah asara ngonzo na tere ti Moïse na Aaron ngbanga ti nyen? Jéhovah asara nyen na ala?
  • Nyen la asi na hoto ti Hor nyen? Zo wa la aga kota prêtre na Israël?

Ambeni hundango tënë

  • Diko Nombre 20:1-13, 22-29; Deutéronome 29:5 na Néhémie 9:21.

    E manda nyen na lege ti kode so Jéhovah abâ na lege ti azo ti Israël na yando? (Deut. 29:5; Mat. 6:31; aHéb. 13:5; Jacq. 1:17).

    So Moïse na Aaron asara si iri ti Jéhovah aga nzoni-kue pëpe na gbele Israël, Jéhovah abâ ni tongana nyen? (Nom. 20:12; 1 aCor. 10:12; Apoc. 4:11).

    E lingbi ti manda nyen na yâ ti sarango ye ti Moïse na mbage ti sengo ndo so Jéhovah ase na lo? (Nom. 12:3; 20:12, 27, 28; Deut. 32:4; aHéb. 12:7-11).

TI HINGA AMBENI TËNË

TOUR TI BA NDO

Février 2013