Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

38: Awakala 12

38: Awakala 12
Awakala ti Israël ayeke yo alê ti keke

BÂ LÊ ti keke so akoli so ayô na ndogo ti ala. Bâ tongana nyen vigne so akono mingi, na a hunda akoli use ti yô ni. Bâ nga afigue ni na agrenade ni. Apendere lê ti keke so alondo na ndo wa? A londo na sese ti Canaan. Canaan ayeke ndo so lani Abraham, Isaac na Jacob aduti dä. Me ndali ti so kota nzara amû yâ ti sese ti Canaan, Jacob na afami ti lo kue ague na Egypte. Ngu 216 na pekoni, Moïse ayeke kiri fadeso na azo ti Israël na sese ti Canaan. Ala si na mbeni ndo na yando so a iri ni Kadès.

Azo ti sese ti Canaan ayeke sioni. Tongaso, Moïse atokua awakala 12, na lo tene na ala: ‘Ala gue abâ azo oke si ayeke kâ, na ala bâ wala ala yeke ngangu mingi. Ala bâ nga wala sese ni ayeke nzoni ndali ti akobe. Ala girisa nga pëpe ti ga na ambeni lê ti keke ni.’

Tongana awakala ni akiri na Kadès, ala tene na Moïse: ‘Sese ni ayeke tâ pendere mingi!’ Ti fa so a yeke tongaso, ala fa na lo ambeni lê ti keke ni. Me, na popo ti awakala 12, ala 10 atene: ‘Azo ti kodoro ni akono mingi nga ala yeke ngangu mingi. Ala yeke fâ e tongana e gue ti mû kodoro ti ala.’

Tongana azo ti Israël amä tënë so, mbeto asara ala. Ala tene: ‘A yeke nzoni fade ti kui na Egypte wala na yando ge. Ala yeke fâ e tongana e tiri na ala, na ala yeke gbu awali ti e na amolenge ti e. Zia e soro mbeni fini mokonzi na place ti Moïse, na e kiri na Egypte!’

Me awakala use azia bê ti ala kue na Jéhovah, na ala tara ti kaï azo ni. Iri ti ala ayeke Josué na Caleb. Ala tene: ‘Ala sara mbeto pëpe. Jéhovah ayeke na e. A yeke ngangu pëpe ti mû sese ni.’ Me azo ni ake ti mä tënë ti ala. Ala ye même ti fâ Josué na Caleb.

Ye so azia ngonzo na bê ti Jéhovah mingi, si lo tene na Moïse: ‘Zo kue so ayeke na ngu 20 ti gue na ni ayeke lï na sese ti Canaan pëpe. Ala bâ lani amiracle so mbi sara na Egypte nga na yando, me ade ala mû bê ti ala kue na mbi pëpe. Tongaso, ala yeke tambela na yando teti ngu 40 juska azo so kue akui. Gi Josué na Caleb si ayeke lï na sese ti Canaan.’

Nombre 13:1-33; 14:1-38.



Ahundango tënë

  • Ti mo, araisin ti lê ti foto so ayeke tongana nyen? A londo na ndo wa?
  • Ngbanga ti nyen Moïse atokua awakala 12 na sese ti Canaan?
  • Tënë wa awakala bale-oko atene na Moïse na peko ti so ala kiri?
  • Tongana nyen awakala use afa so ala zia bê ti ala kue na Jéhovah? Iri ti ala ayeke nyen?
  • Jéhovah asara ngonzo ngbanga ti nyen? Lo tene nyen na Moïse?

Ambeni hundango tënë

  • Diko Nombre 13:1-33.

    A soro lani azo wa ti gue ti bâ yâ ti kodoro ni? Kota lege wa azi na ala? (Nom. 13:2, 3, 18-20).

    Ngbanga ti nyen bango ndo ti Josué na ti Caleb ayeke nde na ti tanga ti awakala ni? E manda nyen dä? (Nom. 13:28-30; Mat. 17:20; 2 aCor. 5:7).

  • Diko Nombre 14:1-38.

    Wango wa a lingbi e bata ni na ndo ti tënë ti kasango azo so Jéhovah azia ala ti mû li ni na yâ ti bungbi ti lo na sese ge? (Nom. 14:2, 3, 27; Mat. 25:40, 45; 1 aCor. 10:10).

    Tongana nyen Nombre 14:24 afa so Jéhovah ayeke bi bê ti lo na awakua ti lo oko oko kue? (1 aGbia 19:18; aProv. 15:3).