Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

37: Tente ti voro na Nzapa

37: Tente ti voro na Nzapa

MO HINGA nda ni so a leke da so? A yeke ti voro na Jéhovah. A iri ni nga tabernacle. Azo ti Israël asara tente ni so ngu oko na peko ti so ala sigigi na sese ti Egypte. Mo hinga zo so atene na ala ti sara tente ni?

Tabernacle ni

Jéhovah si atene na ala ti sara ni. Na ngoi so Moïse ayeke lani na li ti hoto ti Sinaï, Jéhovah afa na lo tongana nyen ti sara ni. Lo tene na lo ti sara ni na mbeni lege so a yeke ngangu pëpe ti zi yâ ni, si ala lingbi ti gue na ni na mbeni ndo nde ti kiri ti leke ni na place ni. Ni la, tongana azo ti Israël ague na ando nde nde na yando, ala yô tente ni lakue na tere ti ala.

Na lê ti foto so na mbage ti wali, mbeni kete chambre ayeke dä. Na yâ ni, mo yeke wara mbeni sanduku so a iri ni arche ti mbele. A-ange use wala achérubin use ti lor ayeke na ndo ni, mbage na mbage. Lani so Moïse afâ yâ ti akozo tênë ni, Nzapa akiri amû na lo ambeni tênë ni use nde so lo sara aKomandema Bale-oko ni na ndo ni. A bata atênë use so na yâ ti arche ti mbele ni. Nga, na yâ ti arche ni, a bata tawa so manne ayeke na yâ ni. Manne ayeke nyen? Mo dabe ti mo na ni?

Jéhovah asoro Aaron, ita ti Moïse, ti ga kota prêtre. Lo si ayeke fa na azo tongana nyen ti voro Jéhovah. Amolenge ti lo ti koli ayeke aprêtre nga.

Na lê ti foto so na mbage ti koli, mo yeke bâ kota chambre ti tente ni. A kono mingi ahon kete chambre ni. Mo bâ kete caisse so guru asigigi dä? A yeke kete gbalaka so aprêtre ayeke zö na ndo ni adukani so afun pendere. Mo yeke bâ nga yongoro gere ti lampe so lampe mbasambala ayeke na ndo ni. Ota ye ni so mo yeke bâ nga ayeke mbeni table. A zia amapa 12 na ndo ti table so.

Na yâ ti lacour ni, kota sembe ayeke dä so ngu asi yâ ni. Aprêtre ayeke sukula maboko nga na gere ti ala dä. Kota gbalaka ayeke nga dä. A yeke na ndo ni si a yeke zö anyama so a fâ ala awe ti mû na sandaga na Jéhovah. Tente ni ayeke na bê ti kando ni, na azo ti Israël kue ayeke lango na yâ ti tente ti ala wani na tere ni, ala ngoro ni.

Exode 25:8-40; 26:1-37; 27:1-8; 28:1; 30:1-10, 17-21; 34:1, 2; aHébreu 9:1-5.



Ahundango tënë

  • Iri ti da so na lê ti foto so ayeke nyen? A yeke sara nyen na da ni?
  • Ngbanga ti nyen Jéhovah atene na Moïse ti leke tente na mbeni lege so a yeke ngangu pëpe ti zi yâ ni?
  • Sanduku wa ayeke na yâ ti kete chambre so ayeke na mbage ti wali? Nyen la ayeke na yâ ti sanduku ni nyen?
  • Jéhovah asoro zo wa ti ga kota prêtre? Kusala ti kota prêtre ni ayeke nyen?
  • Fa iri ti aye ota so mo bâ na yâ ti kota chambre ni.
  • Aye use wa ayeke na yâ ti lacour ti tabernacle ni? A yeke sara kusala wa na ni?

Ambeni hundango tënë

  • Diko Exode 25:8-40; 26:1-37; 27:1-8 na 28:1.

    Achérubin so ayeke na ndo ti “Arche ti Témoin” aduti fä ti nyen? (Ex. 25:20, 22; Nom. 7:89; 2 aGbia 19:15).

  • Diko Exode 30:1-10; 17-21; 34:1, 2 na aHébreu 9:1-5.

    Ngbanga ti nyen Jéhovah aluti mingi na ndo ti nene ti tene aprêtre so ayeke sara kusala na tabernacle aduti na saleté pëpe na tere ti ala? Ye so andu e tongana nyen laso? (Ex. 30:18-21; 40:30, 31; aHéb. 10:22).

    Tongana nyen bazengele Paul afa so tabernacle nga na mbele ti Ndia aga ngbene ye awe na ngoi so lo sara mbeti ti lo na aChrétien Hébreu? (aHéb. 9:1, 9; 10:1).