Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

36: Molenge ti bagara ti lor

36: Molenge ti bagara ti lor

NYEN la asi nyen! Nyen la azo ni ayeke sara so? Ala yeke voro mbeni molenge ti bagara! Ala sara tongaso ngbanga ti nyen?

Tongana Moïse aninga kâ na li ti hoto, azo ti Israël atene: ‘E hinga ye so asi na Moïse kâ pëpe. Tongaso, zia e sara mbeni nzapa ti sigigi na e na sese so.’

Moïse ayeke bi na sese atênë use ni

Aaron, ita ti Moïse, atene: ‘Nzoni ma! Ala zi aye ti mê ti ala ti lor, na ala ga na ni na mbi.’ Tongana azo ni aga na aye ni so na lo, Aaron azia ni na lê ti wâ si a ga ngu na lo leke mbeni molenge ti bagara ti lor na ni. Azo ni atene: ‘So ayeke Nzapa ti e so asigigi na e na sese ti Egypte!’ Na pekoni, azo ti Israël asara kota matanga, na ala voro molenge ti bagara ti lor so.

Tongana Jéhovah abâ ye so, ngonzo agbu lo ngangu. Lo tene na Moïse: ‘Gue na gbe ni kâ hio. Azo ayeke sara ye ti sioni mingi. Ala girisa andia ti mbi awe na ala kuku na gbe ti mbeni molenge ti bagara ti lor.’

Azo ayeke voro mbeni molenge ti bagara ti lor

Moïse akiri hio na gbe ti hoto ni. Tongana lo ga nduru na ndo so azo ni ayeke dä, lo bâ ala yeke he bia na ala yeke dodo na tere ti molenge ti bagara ti lor! Ngonzo asara Moïse ngangu na lo bi na sese atênë use so andia ayeke na ndo ni si yâ ni afâ kete kete. Na pekoni, lo mû bagara ti lor ni lo zia na lê ti wâ, lo neka ni si a ga fuku fuku.

Azo ni asara mbeni kota sioni ye. Tongaso, Moïse atene na ambeni koli ti mû a-épée ti ala. Lo tene: ‘A lingbi azo ti sioni so avoro molenge ti bagara ti lor akui.’ Tongaso, akoli ni afâ azo 3 000! Ye so afa na e so a yeke nzoni e voro gi Jéhovah oko, me anzapa ti wataka pëpe.

Exode 32:1-35.



Ahundango tënë

  • Na lê ti foto so, azo ayeke sara nyen? Ala sara tongaso ngbanga ti nyen?
  • Ngonzo agbu Jéhovah ngbanga ti nyen? Moïse asara nyen tongana lo bâ ye so azo ni ayeke sara so?
  • Moïse atene na ambeni koli ni ti sara nyen?
  • A lingbi e manda nyen na lege ti mbaï so?

Ambeni hundango tënë

  • Diko Exode 32:1-35.

    Mbaï so afa na e so Jéhovah ayeke bâ bungbingo vorongo ti wataka na tâ vorongo tongana nyen? (Ex. 32:4-6, 10; 1 aCor. 10:7, 11).

    A lingbi aChrétien asara hange na nyen tongana ala yeke soro mbeni ye ti sarango ni, na tapande ti he bia wala ti dodo? (Ex. 32:18, 19; aEph. 5:15, 16; 1 Jean 2:15-17).

    Tongana nyen kete mara ti Lévi azia nzoni tapande na ndo ti tënë ti mungo mbage ti ye so ayeke mbilimbili? (Ex. 32:25-28; Ps. 18:26).