Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

35: Jéhovah amû andia ti lo

35: Jéhovah amû andia ti lo

NA PEKO ti nze use so ala sigigi na sese ti Egypte, azo ti Israël asi na hoto ti Sinaï, so a iri ni nga Horeb. A yeke oko ndo so lani Jéhovah asara tënë na Moïse na yâ ti kete keke so wâ agbi na yâ ni. Azo ni angbâ na ndo so teti kete ngoi.

Tongana azo ti Israël ayeke ku na gbe ti hoto ni, Moïse ague kâ na li ti hoto ni. Kâ, Jéhovah atene na Moïse so lo ye si azo ti Israël amä yanga ti lo na ala ga azo ti lo. Tongana Moïse akiri na popo ti azo ti Israël, lo fa na ala tënë so Jéhovah atene na lo. Azo ni atene so ala yeke mä yanga ti Jéhovah, ngbanga ti so ala ye ti ga azo ti lo.

Fadeso, Jéhovah asara mbeni ye ti kpene. Lo sara si guru asigigi na li ti hoto ni, na bekpa asungba. Lo tene nga na azo ni, lo tene: ‘Mbi yeke Jéhovah Nzapa ti ala so azi ala na sese ti Egypte.’ Na pekoni, lo tene na ala: ‘A lingbi ala voro ambeni nzapa nde pëpe, gi mbi oko.’

Atênë use

Nzapa amû na ala ambeni komandema wala andia gumbaya na ndo ni. Mbeto asara azo ni mingi. Ala tene na Moïse: ‘Mo si mo sara tënë na e, ndali ti so e yeke na mbeto so tongana Nzapa la asara tënë na e, e lingbi ti kui.’

Na pekoni, Jéhovah atene na Moïse: ‘Ga mo wara mbi na li ti hoto. Mbi yeke mû na mo akota tênë use so mbi sara andia ti mbi na ndo ni, andia so mbi ye si azo abata ni.’ Tongaso, Moïse akiri ague na li ti hoto ni, na lo ngbâ kâ lâ 40 na bï 40.

Nzapa amû gbâ ti andia na azo ti lo. Moïse asara andia so kue na lê ti mbeti. Nzapa amû nga na Moïse akota tênë use ni. Nzapa mveni asara na ndo ti atênë use so andia 10 so lo fa na azo ni kue kozo awe. A iri andia so aKomandema Bale-oko.

Moïse na Hoto ti Sinaï

A-Komandema Bale-oko so ayeke andia so ayeke kota mingi. Tanga ti andia so lo mû nga na azo ti Israël ayeke nga kota mingi. Mbeni oko ti andia ni ayeke so: ‘A lingbi mo ndoye Jéhovah Nzapa ti mo na bê ti mo kue, na bibe ti mo kue, na âme ti mo kue nga na ngangu ti mo kue.’ Mbeni nde atene: ‘A lingbi mo ndoye zo so ayeke nduru na mo legeoko tongana ti so mo ndoye tere ti mo mveni.’ Jésus Christ, Molenge ti Nzapa, atene andia use so ayeke kota ahon andia kue so Jéhovah amû na Israël, azo ti lo. E yeke manda ande ye mingi na ndo Molenge ti Nzapa na atënë ti lo nga.

Exode 19:1-25; 20:1-21; 24:12-18; 31:18; Deutéronome 6:4-6; Lévitique 19:18; Matthieu 22:36-40.



Ahundango tënë

  • Na peko ti so ala zia Egypte a sara nze use tongaso awe, azo ti Israël ague aduti na ndo wa?
  • Jéhovah atene so lo ye azo ti Israël asara nyen? Ala tene ti ala nyen?
  • Ngbanga ti nyen Jéhovah amû na Moïse akota tênë use?
  • Nde na aKomandema Bale-Oko, Jéhovah amû ambeni ndia wa na azo ti Israël?
  • Andia use wa Jésus Christ afa so ayeke kota ahon atanga ni kue?

Ambeni hundango tënë

  • Diko Exode 19:1-25; 20:1-21; 24:12-18 na 31:18.

    Tongana nyen atënë so ayeke na Exode 19:8 amû maboko na e ti hinga nzoni mingi ye so a ku na mbage ti e tongana e mû tere ti e na Nzapa? (Mat. 16:24; 1 Pi. 4:1-3).

  • Diko Deutéronome 6:4-6; Lévitique 19:18 na Matthieu 22:36-40.

    Tongana nyen aChrétien ayeke fa so ala ndoye Nzapa nga na amba ti ala azo? (Marc 6:34; Kus. 4:20; aRom. 15:2).