Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

34: Fini mara ti kobe

34: Fini mara ti kobe

MO BÂ ye so azo ayeke ro na sese so? A yeke mbeni ye tongana fuku ti glason so avuru na ane pëpe. Me a yeke fuku ti glason pëpe; a yeke mbeni ye ti tengo ni.

Azo ti Israël ayeke ro manne

A sara gi nze oko awe si azo ti Israël asigigi na sese ti Egypte. Ala yeke na yando. Kobe ayeke sigigi mingi pëpe na yando, na azo akomanse ti dema tere ti ala, ala tene: ‘A yeke nzoni Nzapa afâ e fade na sese ti Egypte. Kâ, e yeke kamême na kobe kue so bê ti e aye.’

Tongaso, Jéhovah atene: ‘Mbi yeke sara si kobe alondo na nduzu na atï na sese.’ A yeke ye so lo sara. Na ndade ni, na ndapre, tongana azo ti Israël abâ vuru ye so na sese, ala hunda tere ti ala na popo ti ala, ala tene: ‘So nyen la?’

Moïse atene: ‘So ayeke kobe so Jéhovah amû na ala ti te.’ Azo ni airi ni MANNE. A nzere tongana kete gâteau so a sara na mafuta ti wotoro.

Moïse atene na ala, lo tene: ‘Ala gue a ro manne so alingbi na nzara ti ala.’ Tongaso, lakue na ndapre, ala yeke ro ni. Tongana lâ asu ngangu, manne ni aga ngu.

Moïse atene nga: ‘Zo oko ayeke ro manne ni ti bata teti lango ti peko pëpe.’ Me ambeni na popo ti ala amä pëpe. Mo hinga ye so asi? Na ndade ni, manne so ala bata asi na angusu nga afun!

Ye oko, mbeni lango ayeke dä na yâ ti yenga oko so Jéhovah atene na ala ti ro manne ni teti lango use. A yeke lango omene ni. Jéhovah atene na ala ti bata mbage ni teti lango ti peko, ngbanga ti so lo yeke sara si manne atï na lango mbasambala ni pëpe. Tongana ala bata manne ni gi teti lango mbasambala ni, angusu ayeke duti na yâ ni pëpe na ayeke fun nga pëpe. So ayeke nga mbeni miracle!

Ngu kue so azo ti Israël asara na yando, Jéhovah abata ala na manne.

Exode 16:1-36; Nombre 11:7-9; Josué 5:10-12.



Ahundango tënë

  • Na lê ti foto ni, azo so ayeke ro nyen na sese? A kpa nyen?
  • Moïse atene na azo ti sara nyen tongana ala yeke ro manne ni?
  • Jéhovah atene na azo ni ti sara nyen na lango omene ni? Lo tene tongaso ndali ti nyen?
  • Miracle wa Jéhovah asara tongana azo ni abata manne juska na lango mbasambala ni?
  • Teti ngoi oke Jéhovah amû manne na azo ti lo?

Ambeni hundango tënë

  • Diko Exode 16:1-36 na Nombre 11:7-9.

    Exode 16:8 afa tongana nyen so a lingbi e kpe azo so ayeke mû li ni na yâ ti kongregation? (aHéb. 13:17).

    Nyen la ayeke si lâ na lâ na yando so adabe ti azo ti Israël so Jéhovah si ayeke bata ala? (Ex. 16:14-16, 35; Deut. 8:2, 3).

    Jésus atene manne ayeke fä ti nyen? Tongana nyen e yeke wara ye ti nzoni na lege ti “mapa so alondo na yayu”? (Jean 6:31-35, 40).

  • Diko Josué 5:10-12.

    Azo ti Israël ate lani manne teti ngu oke? Tongana nyen ye so aduti mbeni tara ndali ti ala? E lingbi ti manda nyen na lege ti mbaï so? (Ex. 16:35; Nom. 11:4-6; 1 aCor. 10:10, 11).