Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

33: Fango Kota Ngu Bengba

33: Fango Kota Ngu Bengba

BÂ YE so asi! Moïse ayôro keke ti lo na mbage ti Kota Ngu Bengba. Azo so aluti zê na tere ti lo na mbeni mbage ti ngu ni ayeke azo ti Israël. Me Pharaon na aturugu ti lo kue ayeke kui kuâ ti ngu. Zia e bâ ye so asi.

Ngu ayeke mene aturugu ti Egypte

Tongana ti so e manda awe, Pharaon atene na azo ti Israël ti sigigi na Egypte na peko ti ye ti ngangu ti bale-oko ni. Azo ti Israël ti koli nduru na 600 000 asigigi. Gbâ ti awali na amolenge asigigi nga. Ambeni zo mingi mingi so amä na bê na Jéhovah asigigi legeoko nga na ala. Ala mû angasangbaga na angasa na abagara ti ala kue.

Kozoni si ala londo na kodoro ti Egypte, azo ti Israël ahunda na azo ti Egypte ti mû na ala abongo na aye ti lor na ti argent. Mbeto asara azo ti Egypte mingi ndali ti ndangba ye ti ngangu so asi na ala. Tongaso, ala mû ye kue so azo ti Israël ahunda na ala.

Alango kete na pekoni, azo ti Israël asi na Kota Ngu Bengba. Ala wu tere ti ala kâ. Na oko ngoi ni, bê ti Pharaon na aturugu ti lo ato nda ti so ndali ti so ala zia azo ti Israël ahon. Ala tene: ‘Tâ nyen la e sara so?’

Tongaso, Pharaon akiri agbian tënë ti yanga ti lo. Lo mû yanga ti tene a leke puse ti mbarata ti lo nga ti bungbi aturugu ti lo. Lo to nda ti tomba peko ti azo ti Israël na angangu puse ti mbarata 600 na ambeni puse ni nde nga.

Tongana azo ti Israël abâ Pharaon na aturugu ti lo na peko ti ala, mbeto asara ala mingi. Ndo ti kpe dä ayeke pëpe. Kota Ngu Bengba ayeke na mbeni mbage, na azo ti Egypte ayeke ga na mbeni mbage nga. Me Jéhovah azia mbinda na popo ti azo ti lo na azo ti Egypte. Tongaso, azo ti Egypte alingbi pëpe ti bâ azo ti Israël ti fâ ala.

Jéhovah atene na Moïse ti yô keke ti lo na nduzu na mbage ti Kota Ngu Bengba. Tongana lo sara tongaso, Jéhovah asara si kota pupu so alondo na mbage so lâ asigigi dä aya. Yâ ti ngu ni akangbi, na a luti mbage na mbage.

Na pekoni, azo ti Israël akomanse ti tambela na ndo kuru sese ti fâ kota ngu ni. A hunda angbonga mingi ti tene azo kutu mingi na anyama ti ala mingi afâ kota ngu na asi na mbeni mbage ni. Fadeso, azo ti Egypte abâ ndo nzoni, na ala kiri abâ azo ti Israël. Ala bâ angbâa ti ala ayeke kpe. Tongaso, ala lï na peko ti ala na loro na yâ ti kota ngu ni.

Me tongana ala sara tongaso, Nzapa asara si agere ti apuse ti ala azi. Mbeto asara azo ti Egypte mingi na ala dekongo: ‘Jéhovah ayeke tiri teti azo ti Israël. Zia e kpe!’ Me lege ayeke dä mbeni pëpe.

A yeke na ngoi so la si Jéhovah atene na Moïse ti yô keke ti lo na nduzu na mbage ti Kota Ngu Bengba, tongana ti so mo bâ na lê ti foto so. Tongana Moïse asara tongaso, angu so aluti mbage na mbage ato nda ti kiri na place ti ala, na a mene aturugu ti Egypte na apuse ti mbarata ti ala kue. Mbeni oko ti aturugu ti Egypte angbâ na fini pëpe, ndali ti so ala kue la alï fade na peko ti azo ti Israël!

Ngia ti azo ti Nzapa asi singo teti Nzapa asö ala. Akoli ahe bia ti mû merci na Jéhovah, ala tene: ‘Jéhovah ahon na ngangu. Lo bi ambarata na aturugu na kota ngu.’ Miriam, ita ti Moïse, amû tambourin na maboko ti lo na awali kue amû peko ti lo na atambourin ti ala. Ala dodo na ngia, na ala he oko bia so akoli ayeke he, ala tene: ‘Jéhovah ahon na ngangu. Lo bi ambarata na aturugu na kota ngu.’

Exode chapitre 12 ti si na 15.



Ahundango tënë

  • A yeke lani akoli oke ti Israël si asigigi na Egypte legeoko na awali nga na amolenge? Azo wa asigigi nga legeoko na ala?
  • Na peko ti so Pharaon azia azo ti Israël ahon, ye so asara nyen na ndo ti lo? Lo sara nyen?
  • Jéhovah asara nyen ti kanga lege na azo ti Egypte ti pusu nduru na azo ti lo ti fâ ala?
  • Tongana Moïse ayô keke ti lo na nduzu na mbage ti Kota Ngu Bengba, nyen la asi nyen? Azo ti Israël asara nyen?
  • Nyen la asi tongana azo ti Egypte alï na loro na peko ti azo ti Israël na yâ ti kota ngu ni?
  • Tongana nyen azo ti Israël afa so ala yeke na ngia na ala mû merci na Jéhovah ndali ti so lo sö ala?

Ambeni hundango tënë

  • Diko Exode 12:33-36.

    Tongana nyen Jéhovah asara kue ti tene a futa azo ti lo teti angu kue so ala sara kusala tongana ngbâa na Egypte? (Ex. 3:21, 22; 12:35, 36).

  • Diko Exode 14:1-31.

    Na ngoi so bira ti Harmaguédon ayeke pusu nduru, tongana nyen atënë ti Moïse so ayeke na Exode 14:13, 14 asara ngangu na ndo ti awakua ti Jéhovah laso? (2 Chron. 20:17; Ps. 91:8).

  • Diko Exode 15:1-8, 20, 21.

    Ngbanga ti nyen a lingbi awakua ti Jéhovah ahe bia ti sepela lo? (Ex. 15:1, 2; Ps. 105:2, 3; Apoc. 15:3, 4).

    Na Kota Ngu Bengba, tapande wa Miriam na awali ti Israël azia na awali Chrétien laso na ndo ti tënë ti sepelango Jéhovah? (Ex. 15:20, 21; Ps. 68:12).