Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

32: Aye ti ngangu 10

32: Aye ti ngangu 10

BÂ AFOTO so. Ala kue afa aye ti ngangu so Jéhovah atokua na sese ti Egypte. Na kozo foto ni, mo bâ Aaron apika ngu ti Nil na keke ti lo. Tongaso, ngu ti Nil aga mênë. Asusu na yâ ni kue akui na ngu ni akomanse ti fun sioni.

Aye ti ngangu so aga na ndo ti azo ti Egypte

Na pekoni, Jéhovah asara si adale asigigi na yâ ti ngu ti Nil. Adale amû ndo kue: na yâ ti afour, na yâ ti asembe, na ndo ti agbogbo. Tongana adale ni akui, azo ti Egypte abungbi ala na ndo oko, na ala fun mingi na yâ ti kodoro ni.

Na pekoni, Aaron apika sese na keke ti lo na pupu-sese agbian aga akete ngungu. Angungu so ate azo na anyama. Akete ngungu ayeke aye ti ngangu ota ni na sese ti Egypte.

Tanga ti aye ti ngangu ni asi gi na azo ti Egypte me na azo ti Israël pëpe. Osio ye ti ngangu ni asara si avuma asi singo na ndo kue na yâ ti da ti azo ti Egypte. Oku ye ti ngangu ni asi na anyama. Abagara, angasangbaga na angasa mingi akui na sese ti Egypte.

Na pekoni, Moïse na Aaron amû mburu ti wâ na ala tuku ni na lê ti nduzu. Mburu ti wâ ni asara si akä ti sanzo asigigi na tere ti azo na ti anyama. So ayeke omene ye ti ngangu ni.

Moïse ayôro maboko ti lo na nduzu, na Jéhovah asara si bekpa asungba na akota glason atï na sese. Azo ti Egypte ade abâ mara ti ye tongaso lâ oko pëpe.

Miombe ye ti ngangu ni asara si agbadora amû ndo kue. Ade a bâ mara ti wungo ti agbadora tongaso lâ oko pëpe. Ala te aye kue so akota glason afuti pëpe.

Gumbaya ye ti ngangu ni asara si ndo avuko pitipiti. Teti lango ota ndo avuko ngangu na yâ ti kodoro ni kue, me azo ti Israël ayeke na lumière na ndo so ala yeke dä.

Na nda ni, Nzapa atene na azo ti lo ti fi mênë ti mbeni kete ngasangbaga na tere ti yanga-da ti ala na nduzu. Na pekoni, ange ti Nzapa ahon na ndo ti Egypte. Tongana lo bâ mênë ni, lo fâ azo ti da ni so pëpe. Me ti ada so mênë ayeke na yanga-da ni pëpe, ange ti Nzapa afâ kozo molenge ti azo nga na ti anyama so ayeke na yâ ni. So ayeke ye ti ngangu bale-oko ni.

Na peko ti ndangba ye ti ngangu so, Pharaon atene na azo ti Israël ti gue. Ala leke tere ti ala kozoni awe, na ala londo ti sigigi na sese ti Egypte na bï ni so.

Exode chapitre 7 ti si na 12.



Ahundango tënë

  • Na lege ti afoto so a zia ge, fa a-ota kozo ye ti ngangu so Jéhovah aga na ni na ndo ti Egypte.
  • Kangbi wa ayeke na popo ti akozo ye ti ngangu ota na atanga ni?
  • Osio ye ti ngangu ni ayeke so wa? Oku ni? Omene ni?
  • Fa ye ti ngangu mbasambala ni, miombe ni nga na gumbaya ni.
  • Jéhovah atene na azo ti Israël ti sara nyen kozoni si lo tokua ye ti ngangu bale-oko ni?
  • Ye ti ngangu bale-oko ni ayeke so wa? Nyen la asi na pekoni?

Ambeni hundango tënë

  • Diko Exode 7:19-8:19.

    Azo ti magie ti Egypte asara mara ti aye ti ngangu use so Jéhovah aga na ni. Me atâa so kue, ala bâ gbä ala yeda na nyen na peko ti ye ti ngangu ota ni? (Ex. 8:14, 15; Mat. 12:24-28).

    Tongana nyen osio ye ti ngangu ni afa ngangu so Jéhovah ayeke na ni ti bata azo ti lo? Hingango ye so asara si azo ti Nzapa abâ tere ti ala tongana nyen na ngoi so ala yeke tingbi ande na “kota ye ti vundu” so a sara tënë ni? (Ex. 8:18, 19; Apoc. 7:13, 14; 2 Chron. 16:9).

  • Diko Exode 8:20; 9:3, 6, 10, 11, 14, 16, 23-25 na 10:13-15, 21-23.

    Pharaon na azo ti magie aduti fä ti azo wa? Azo ni so Pharaon na azo ti magie aduti fä ni laso awara lege ti sara nyen pëpe? (Ex. 8:6, 14, 15; 9:14).

    Tongana nyen Exode 9:16 amû maboko na e ti hinga nzoni ngbanga ti nyen Jéhovah azia lege na Satan ti ngbâ na fini juska laso? (aRom. 9:21, 22).

  • Diko Exode 12:21-32.

    Tongana nyen matanga ti Pâque amû lani lege na azo mingi ti sö fini ti ala? Matanga so aduti fä ti nyen? (Ex. 12:21-23; Jean 1:29; aRom. 5:18, 19, 21; 1 aCor. 5:7).