Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

31: Moïse na Aaron na ndo ti Pharaon

31: Moïse na Aaron na ndo ti Pharaon

TONGANA Moïse akiri na sese ti Egypte, lo sara tënë ti amiracle so kue na ita ti lo Aaron. Tongana Moïse na Aaron asara amiracle so na lê ti azo ti Israël, ala kue ayeda so Jéhovah ayeke na ala.

Na pekoni, Moïse na Aaron ague abâ Pharaon. Ala tene na lo: ‘Jéhovah Nzapa ti Israël atene: “Zia azo ti mbi ague na yando teti lango ota si ala voro mbi.” ’ Me Pharaon atene: ‘Mbi hinga Jéhovah pëpe na mbi yeke zia azo ti Israël ti gue pëpe.’

Ngonzo agbu Pharaon ngbanga ti so azo ti Israël aye ti zia kua ti ala ti gue ti voro Jéhovah. Tongaso, Pharaon asara si ala sara kua ngangu ahon ti kozo. Azo ti Israël atene ndali ti Moïse si ala yeke bâ pasi, na mawa asara Moïse. Me Jéhovah atene na lo ti gi bê ti lo pëpe. Lo tene: ‘Mbi yeke sara si azo ti mbi ague.’

Moïse na Aaron na gbele Pharaon

Moïse na Aaron akiri ague abâ Pharaon. Ti so ni, ala sara mbeni miracle. Aaron abi keke ti lo na sese na a ga kota ngbo. Awandara ti Pharaon abi nga akeke ti ala na sese na a ga angbo. Me bâ! Ngbo ti Aaron amene angbo ti awandara so kue. Atâa so kue, Pharaon angbâ ti ke ti zia azo ti Israël ti gue.

Tongaso, ngoi asi awe ti tene Jéhovah afa mbeni ye na Pharaon. Mo hinga ye so lo sara? Lo tokua aye ti ngangu bale-oko na sese ti Egypte.

Na peko ti so mingi ti aye ti ngangu ni asi, Pharaon airi Moïse na lo tene: ‘Kaï aye ti ngangu so, na mbi yeke zia azo ti Israël ti gue.’ Na tongana ye ti ngangu ni akaï, Pharaon agbian tënë ti yanga ti lo na lo zia azo ti Israël ti gue pëpe. Tongana a si na ye ti ngangu ti bale-oko ni, Pharaon azia azo ti Israël ti gue.

Mo hinga aye ti ngangu bale-oko so oko na oko kue? Zia e manda ye na ndo ti ala.

Exode 4:27-31; 5:1-23; 6:1-13, 26-30; 7:1-13.



Ahundango tënë

  • Amiracle so Moïse na Aaron asara na lê ti azo ti Israël asara nyen na ndo ti azo ni?
  • Moïse na Aaron atene nyen na Pharaon? Pharaon atene ti lo nyen?
  • Tongana ti so foto ni afa, nyen la asi tongana Aaron abi keke ti lo na sese?
  • Tongana nyen Jéhovah afa mbeni kota ye na Pharaon? Me Pharaon asara ti lo nyen?
  • Nyen la asi na peko ti ye ti ngangu bale-oko ni?

Ambeni hundango tënë

  • Diko Exode 4:27-31 na 5:1-23.

    Pharaon aye lani ti tene nyen tongana lo tene: “Mbi hinga L’Eternel [“Jéhovah,” MN] pëpe”? (Ex. 5:2; 1 Sam. 2:12; aRom. 1: 21).

  • Diko Exode 6:1-13, 26-30.

    Na lege wa Abraham, Isaac na Jacob ahinga Jéhovah pëpe na lege ti iri ti lo? (Ex. 3:13, 14; 6:3; Gen. 12:8).

    So Jéhovah asara kusala na Moïse, atâa so lo bâ tere ti lo so lo lingbi na kusala ni pëpe, a sara nyen na ndo ti e? (Ex. 6:12, 30; Luc 21:13-15).

  • Diko Exode 7:1-13.

    Na fango na mbeto pëpe tënë ti ngbanga ti Jéhovah na Pharaon, Moïse na Aaron azia tapande wa na awakua ti Nzapa laso? (Ex. 7:2, 3, 6; Kus. 4:29-31).

    Tongana nyen Jéhovah afa so lo yeke kota ahon anzapa ti Egypte kue? (Ex. 7:12; 1 Chron. 29:12).