Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

30: Moïse na Horeb

30: Moïse na Horeb

MOÏSE ague juska na kota hoto ti Horeb ti gi pere ndali ti angasangbaga ti lo. Kâ, lo bâ wâ na yâ ti mbeni kete keke, me wâ ni ate ni pëpe.

Moïse abâ wâ na yâ ti mbeni kete keke

Moïse atene na bê ti lo, lo tene: ‘So ayeke ye ti kpene! Zia mbi gue nduru ti bâ ni nzoni.’ Tongana lo ye ti ga nduru na kete keke ni, mbeni go atoto na yâ ti keke ni, atene: ‘Ga nduru ge pëpe. Zi poro na gere ti mo, ngbanga ti so mo luti na mbeni ndo so ayeke nzoni-kue.’ A yeke Nzapa si asara tënë na lo na lege ti mbeni ange. Tongaso, Moïse ahonde lê ti lo.

Nzapa atene: ‘Mbi bâ pono ti azo ti mbi na Egypte. Ni la, mbi yeke zi ala na mbi yeke tokua mo ti sigigi na ala na Egypte.’ Ngoi aga nduru awe ti tene Jéhovah aga na azo ti lo na pendere sese ti Canaan.

Me Moïse atene: ‘Mbi yeke ye oko pëpe. Mbi lingbi ti sara ye so tongana nyen? Ka tongana mbi gue si azo ti Israël ahunda mbi, atene: “Zo wa la atokua mo?” Mbi yeke tënë nyen?’

Nzapa atene na lo atene: ‘Mo yeke tene na ala tënë so: “JÉHOVAH, Nzapa ti Abraham, Nzapa ti Isaac na Nzapa ti Jacob atokua mbi na ala.” ’ Jéhovah akiri atene: ‘So ayeke iri ti mbi teti lakue lakue.’

Moïse atene: ‘Me ka tongana ala yeda pëpe so mo la mo tokua mbi.’

Nzapa ahunda lo, lo tene: ‘Nyen la ayeke na maboko ti mo?’

Moïse atene: ‘Keke.’

Nzapa atene: ‘Bi keke ni na sese.’ Tongana Moïse abi keke ti lo na sese, keke ni aga ngbo. Jéhovah afa na lo mbeni miracle nde. Lo tene: ‘Yôro maboko ti mo na yâ ti bongo ti mo.’ Moïse asara tongaso, na tongana lo lungula maboko ti lo, a vuru ngangu. Maboko ti lo akpa mo bâ mo tene kobela ti buruma si asara ni. Na pekoni, Jéhovah amû ngangu na Moïse ti sara ota miracle ni. Na nda ni, Nzapa atene: ‘Tongana mo sara amiracle so, azo ti Israël ayeke yeda so mbi si mbi tokua mo.’

Na pekoni, Moïse akiri na kodoro ti Jéthro na lo tene na lo: ‘Zia mbi kiri na Egypte ti bâ azo ti mbi.’ Jéthro azia Moïse ti gue.

Exode 3:1-22; 4:1-20.



Ahundango tënë

  • Iri ti hoto so na lê ti foto so ayeke nyen?
  • Fa ye ti ndima so Moïse abâ tongana lo gue na ataba ti lo na hoto ni.
  • Go so Moïse amä na yâ ti kete keke so atene nyen na lo? Go ni ayeke go ti zo wa?
  • Moïse atene nyen tongana Nzapa atene na lo so fade lo yeke zi azo ti ni na ngbâa na Egypte?
  • Nzapa atene na Moïse ti tene nyen tongana azo ni ahunda lo atene zo wa la atokua lo?
  • Tongana nyen Moïse alingbi ande ti fa so Nzapa la atokua lo?

Ambeni hundango tënë

  • Diko Exode 3:1-22.

    Tongana nyen ye so asi na Moïse afa na e so même tongana e bâ tere ti e so e lingbi pëpe na mbeni kusala na yâ ti bungbi ti Jéhovah, Jéhovah ayeke mû maboko na e? (Ex. 3:11, 13; 2 aCor. 3:5, 6).

  • Diko Exode 4:1-20.

    Bango ndo ti Moïse agbian tongana nyen na yâ ti angu 40 so lo sara na Madian? Ala so aye ti sara ambeni kusala na yâ ti kongregation alingbi ti manda nyen dä? (Ex. 2:11, 12; 4:10, 13; Mi. 6:8; 1 Tim. 3:1, 6, 10).

    Atâa tongana Jéhovah ase e na lege ti bungbi ti lo, tapande ti Moïse alingbi ti pusu e ti duti na beku wa? (Ex. 4:12-14; Ps. 103:14; aHéb. 12:4-11).