Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

29: Moïse akpe

29: Moïse akpe

BÂ TONGANA nyen Moïse ayeke kpe sese ti Egypte. Mo bâ azo so ayeke kpe na peko ti lo? Ala ye ti fâ Moïse. Ngbanga ti nyen? Zia e bâ nda ni.

Moïse ayeke kpe Egypte

Moïse akono na da ti Pharaon, gbia ti Egypte. Lo ga kota zo ti ndara mingi. Moïse ahinga so lo yeke molenge ti Egypte pëpe, me babâ na mama ti lo ayeke azo ti Israël so ayeke azo ti ngbâa.

Mbeni lâ, tongana Moïse awara ngu 40 awe, lo gue ti bâ wala azo ti mara ti lo ayeke nzoni. Lo bâ tongana nyen a yeke sara ngangu mingi na ala. Lo bâ mbeni zo ti Egypte ayeke pika mbeni zo ti Israël. Moïse abâ ndo na tere ti lo, lo bâ so mbeni zo ayeke dä pëpe na lo pika zo ti Egypte ni si lo kui. Na pekoni, Moïse alu lo na yâ ti mbutu.

Na ndade ni, Moïse akiri ague ti bâ azo ti mara ti lo. Lo pensé so lo lingbi ti mû na ala maboko si ala duti ngbâa mbeni pëpe. Me lo bâ azo use ti Israël ayeke tiri. Lo hunda na lo so ayeke na faute, lo tene: ‘Mo pika ita ti mo ngbanga ti nyen?’

Koli ni atene: ‘Zo wa si azia mo zo ti komande ti fâ ngbanga na li ti e? Mo ye ti fâ mbi tongana ti so mo fâ zo ti Egypte so?’

Mbeto asara Moïse fadeso. Lo hinga so azo kue amä so lo fâ mbeni zo ti Egypte. Pharaon kue amä tënë ni na lo tokua azo ti fâ Moïse. Ni la, a lingbi Moïse akpe sese ti Egypte.

Tongana lo kpe kodoro ti Egypte, lo gue yongoro na sese ti Madian. Kâ, lo tingbi na sewa ti Jéthro, na lo mû Zipporah na wali, mbeni oko ti amolenge ti Jéthro ti wali. Moïse aga zo ti batango nyama, na lo bata angasangbaga ti kogara ti lo. Lo duti na sese ti Madian ngu 40. Ngu ti Moïse asi fadeso 80. Mbeni lâ, tongana lo yeke bata angasangbaga ti Jéthro, mbeni ye ti kpene asi, so agbian fini ti Moïse kue. Zia e bâ ye ti kpene so asi.

Exode 2:11-25; Kusala 7:22-29.



Ahundango tënë

  • Moïse akono na ndo wa? Me nyen la lo hinga na ndo ti babâ na mama ti lo?
  • Moïse asara nyen tongana lo wara ngu 40?
  • Moïse atene nyen na mbeni zo ti Israël so ayeke tiri na mbeni mba ti lo? Zo ni so atene nyen na lo?
  • Ngbanga ti nyen Moïse akpe kodoro ti Egypte?
  • Moïse akpe ague na ndo wa? Lo tingbi na zo wa kâ?
  • Moïse asara nyen na yâ ti angu 40 so aga na peko ti so lo kpe Egypte?

Ambeni hundango tënë

  • Diko Exode 2:11-25.

    Atâa angu mingi so a fa ye na lo na ndo ti ndara ti azo ti Egypte, tongana nyen Moïse afa so bê ti lo ayeke lakue na mbage ti Jéhovah nga na azo ti lo? (Ex. 2:11, 12; aHéb. 11:24).

  • Diko Kusala 7:22-29.

    So lani Moïse atara ti zi azo ti Israël na gbe ti ngbâa na ngangu ti lo wani afa nyen na e? (Kus. 7:23-25; 1 Pi. 5:6, 10).