Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

27: Mbeni sioni gbia akomande na Egypte

27: Mbeni sioni gbia akomande na Egypte

AKOLI so mo bâ ala ge so ayeke gbu azo na ngangu ti sara kua. Bâ koli so ayeke pika mbeni zo na zaza! Azo ti kua so ayeke azo ti yâ ti sewa ti Jacob, wala azo ti Israël. Akoli so ayeke gbu ala na ngangu ti sara kua ayeke azo ti Egypte. Ala sara azo ti Israël na ngbâa. Me ye so asi tongana nyen?

Azo ti Egypte ayeke sara ye ti sioni na azo ti Israël

Teti ngu mingi, kota sewa ti Jacob aduti na siriri na Egypte. Joseph, so lani ayeke kozo kota zo na Egypte na peko ti Pharaon, abâ lege ti ala nzoni. Me na pekoni Joseph akui. Mbeni Pharaon nde aga gbia na Egypte, na lo ye amolenge ti Israël pëpe.

Tongaso, sioni Pharaon so asara azo ti Israël na ngbâa. Lo zia na ndo ti ala akoli so asara ye na ngangu na ayeke sioni. Ala pusu azo ti Israël ti sara kua ngangu ti leke akota kodoro ndali ti Pharaon. Me li ti azo ti Israël angbâ ti wu. Kete na pekoni, azo ti Egypte asara mbeto so wungo ti azo ti Israël ayeke hon ndo ni ande, nga ala yeke ga ngangu mingi.

Azo ti Egypte ayeke sara ye ti sioni na azo ti Israël

Mo hinga ye so Pharaon asara? Lo tene na awali so ayeke mû maboko na awali ti Israël ti dü molenge, lo tene: ‘Ala fâ amolenge ti koli kue so awali ni adü.’ Me awali so ayeke anzoni zo, na ala fâ amolenge ni pëpe.

Tongaso, Pharaon atene na azo ti Egypte kue: ‘Ala mû amolenge-koli ti azo ti Israël kue na ala fâ ala. Ala zia gi amolenge-wali ni na fini.’ Tënë ti Pharaon so ayeke sioni mingi. Zia e bâ tongana nyen a bata fini ti mbeni molenge-koli oko.

Exode 1:6-22.



Ahundango tënë

  • Koli so ayeke na zaza na maboko ti lo na lê ti foto so ayeke zo wa? Lo yeke pika zo wa?
  • Na peko ti kuâ ti Joseph, nyen la asi na azo ti Israël?
  • Ngbanga ti nyen mbeto ti azo ti Israël asara azo ti Egypte?
  • Yanga wa Pharaon amû na awali so ayeke mû maboko na awali ti Israël ti dü?

Ambeni hundango tënë

  • Diko Exode 1:6-22.

    Tongana nyen Jéhovah akomanse ti sara si tënë so lo tene lani na Abraham aga tâ tënë? (Ex. 1:7; Gen. 12:2; Kus. 7:17).

    Tongana nyen awali so amû maboko na awali Hébreu ti dü afa so ala bâ fini na nene ni? (Ex. 1:17; Gen. 9:6).

    Ndali ti so awali so ayeke mû maboko na awali Hébreu ti dü aduti be-ta-zo na Jéhovah, tongana nyen Jéhovah airi tënë nzoni na ndo ti ala? (Ex. 1:20, 21; aProv. 19:17).

    Tongana nyen Satan atara lani ti kanga lege na ye so Jéhovah aleke ti sara ndali ti Hale ti Abraham so Lo mû zendo ni? (Ex. 1:22; Mat. 2:16).