Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

25: Sewa ti Jacob ague na Egypte

25: Sewa ti Jacob ague na Egypte

JOSEPH akanga bê ti lo gbä. Lo tene na azo ti kua ti lo kue ti sigigi. Tongana Joseph angbâ gi lo oko na aita ti lo, lo komanse ti toto. Bâ tongana nyen bê ti aita ti lo adö, ndali ti so ala hinga pëpe nda ni so lo yeke toto. Na nda ni, Joseph atene: ‘Mbi yeke Joseph. Babâ ti mbi angbâ na fini?’

Li ti aita ti lo akpe kue si ala hinga tënë so ala lingbi ti tene pëpe. Mbeto agbu ala. Me Joseph atene: ‘Ala ga nduru na mbi.’ Tongana ala pusu nduru, lo tene: ‘Mbi yeke ita ti ala Joseph so ala kä na azo ti Egypte.’

Joseph angbâ ti sara tënë na ngangu pëpe, lo tene: ‘Ala gi bê ti ala pëpe ndali ti so ala kä mbi si mbi ga ge. Biani a yeke Nzapa si atokua mbi na Egypte ti sö fini ti azo. Pharaon azia mbi mokonzi ti kodoro ni kue. Tongaso, ala kiri na kodoro hio na ala tene na babâ ti mbi atënë so kue. Ala tene na lo ti ga ti duti ge.’

Na pekoni, Joseph atï na go ti aita ti lo, lo toto na lo su ngbangba ti ala kue. Tongana Pharaon amä so aita ti Joseph aga, lo tene na Joseph: ‘Zia ala mû apuse ala gue amû babâ ti ala na asewa ti ala na ala kiri ge. Mbi yeke mû na ala sese na Egypte so ayeke nzoni ahon atanga ni kue.’

Ala sara tongaso. Jacob aga na sese ti Egypte na sewa ti lo kue. Bâ na lê ti foto so Joseph na tingbingo babâ ti lo.

Sewa ti Jacob aga mingi. Azo ti sewa ti lo kue ayeke lani 70 na ngoi so ala ga na Egypte, tongana a diko Jacob na amolenge ti lo na atarä ti lo. Me na tere ni, awali ti amolenge ni nga peut-être azo ti kua mingi ayeke dä nga. Ala kue aga asara kodoro na Egypte. A iri ala azo ti Israël, ngbanga ti so Nzapa achangé iri ti Jacob ti ga Israël. Ala ga azo so Nzapa abâ ala nde na tanga ti ambeni mara, tongana ti so e yeke bâ ande.

Genèse 45:1-28; 46:1-27.

Joseph na sewa ti lo


Ahundango tënë

  • Nyen la asi tongana Joseph afa tere ti lo na aita ti lo?
  • Tënë wa Joseph afa nda ni na nzobe na aita ti lo?
  • Pharaon atene nyen tongana lo mä tënë ti aita ti Joseph?
  • Sewa ti Jacob akono lani tongana nyen na ngoi so ala lï na Egypte?
  • Iri wa a mû na azo ti sewa ti Jacob? Ngbanga ti nyen a mû iri so na ala?

Ambeni hundango tënë

  • Diko Genèse 45:1-28.

    Tongana nyen mbaï ti Bible na ndo ti Joseph afa so tongana a leke ti sara sioni na awakua ti Jéhovah, Jéhovah alingbi ti changé ye so si a ga nzoni? (Gen. 45:5-8; Es. 8:10; aPhil. 1:12-14).

  • Diko Genèse 46:1-27.

    Jéhovah akiri atene nyen na Jacob ti dë bê ti lo tongana lo yeke na lege ti gue na Egypte? (Gen. 46:1-4).