Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

24: Joseph atara aita ti lo

24: Joseph atara aita ti lo

JOSEPH aye ti hinga wala ayaya ti lo 10 angbâ na sioni bê ti ala. Lo tene na ala: ‘Ala yeke awakala. Ala ga ti bâ ndo so kodoro ti e awoko dä!’

Ala tene: ‘Ên ën, e yeke anzoni zo. E kue e yeke aita. E yeke lani 12. Me mbeni ti e oko ayeke dä mbeni pëpe, na tanga ni ayeke na kodoro na tere ti babâ ti e.’

Joseph asara mo bâ mo tene lo mä na bê na tënë ti ala ni pëpe. Lo bata ita ti ala Siméon na da ti kanga, na lo mû kobe na atanga ni ti kiri na kodoro. Me lo mû yanga na ala, lo tene: ‘Tongana ala kiri ti peko, ala ga na tanga ti ala na tere ti ala.’

Tongana ala kiri na kodoro na Canaan, aita ti lo atene na babâ ti ala Jacob aye kue so asi. Vundu asara Jacob mingi. Lo tene: ‘Joseph ayeke mbeni pëpe na Siméon nga kue. Mbi yeke yeda pëpe ti zia tanga ti molenge ti mbi Benjamin ti gue na ala.’ Me tongana kobe ti ala ayeke gue ti hunzi, Jacob azia ala ti gue na Benjamin ti gi kobe ti zia na ndo ti so ala yeke na ni awe.

Fadeso, Joseph abâ aita ti lo na gango ni. Tere ti lo anzere mingi ti bâ ngambe ti lo Benjamin. Me zo oko na popo ti ala ahinga pëpe so kota zo so ayeke Joseph. Joseph asara mbeni ye ti tara ayaya ti lo 10.

Joseph atene na azo ti kua ti lo ti zia kobe na yâ ti abozo ti ala. Aita ti lo ahinga pëpe so a zia kopo ti argent na yâ ti bozo ti Benjamin. Tongana ala hon ayo kete, Joseph atokua azo ti kua ti lo na peko ti ala. Tongana azo ti kua ni asi na tere ti ala, ala tene: ‘Ngbanga ti nyen ala nzi kopo ti argent ti maître ti e?’

Aita ni kue atene: ‘E nzi kopo ti lo pëpe! Tongana ala wara kopo so na yâ ti bozo ti mbeni oko ti e, zia ala fâ zo ni so.’

Tongaso, azo ti kua ni agi yâ ti abozo ti ala kue, na ala wara kopo ni na yâ ti bozo ti Benjamin, tongana ti so mo bâ na lê ti foto so. Azo ti kua ni atene: ‘Ala kue alingbi ti gue, me e na Benjamin e yeke kiri.’ Tanga ti aita ni ayeke sara nyen?

Ala na Benjamin kue akiri na da ti Joseph. Joseph atene na aita ti lo: ‘Ala kue alingbi ti kiri na kodoro, me Benjamin ayeke ngbâ ge ti ga ngbâa ti mbi.’

Juda amû tënë, lo tene: ‘Tongana mbi kiri na kodoro na Benjamin ayeke na popo ti e pëpe, babâ ti mbi ayeke kui ndali ti so lo ye Benjamin mingi. Mbi gbu gere ti mo, bata mbi ge tongana ngbâa ti mo, me zia molenge ni akiri na kodoro.’

Joseph abâ so aita ti lo achangé awe. Ala yeke sioni mbeni pëpe. Zia e bâ ye so Joseph asara.

Genèse 42:9-38; 43:1-34; 44:1-34.

Azo ayeke tene aita ti Joseph ayeke awakala


Ahundango tënë

  • Ngbanga ti nyen Joseph atene so aita ti lo ayeke awakala?
  • Ngbanga ti nyen Jacob azia si tanga ti molenge ti lo ti koli, Benjamin, ague na Egypte?
  • A sara tongana nyen si a wara kopo ti argent ti Joseph na yâ ti bozo ti Benjamin?
  • Juda ahunda ti sara nyen ti tene a zi Benjamin?
  • Nyen la afa so aita ti Joseph achangé awe?

Ambeni hundango tënë

  • Diko Genèse 42:9-38.

    Tongana nyen atënë ti Joseph na Genèse 42:18 aduti mbeni pendere ye ti girisango ni pëpe ndali ti ala so amû li ni na yâ ti bungbi ti Jéhovah laso? (Néh. 5:15; 2 aCor. 7:1, 2).

  • Diko Genèse 43:1-34.

    Atâa so Ruben ayeke kozo molenge ni, tongana nyen a bâ polele so Juda si amû li ni ti sara tënë na place ti aita ti lo? (Gen. 43:3, 8, 9; 44:14, 18; 1 Chron. 5:2).

    Joseph asara nyen ti tara aita ti lo? Ngbanga ti nyen lo sara tongaso? (Gen. 43:33, 34).

  • Diko Genèse 44:1-34.

    Ti tene aita ti lo ni ahinga lê ti lo pëpe, Joseph asara tere ti lo, lo tene lo yeke zo wa? (Gen. 44:5, 15; Lév. 19:26).

    Tongana nyen aita ti Joseph afa so ala zia awe kota bê so ala yeke na ni ândö na tere ti lo? (Gen. 44:13, 33, 34).