Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

23: Abango li ti Pharaon

23: Abango li ti Pharaon

NGU use ahon, na Joseph angbâ na da ti kanga. Zo ti mû ye ti nyon na Pharaon agirisa na ndo ti lo awe. Me, na mbeni bï, Pharaon abâ li ti lo lege use. Lo ye ti hinga nda ti abango li so. Mo bâ lo na lango na lê ti foto so? Na ndapre, Pharaon airi awandara ti lo kue ti fa nda ti abango li ti lo. Me ala lingbi ti fa nda ni pëpe.

Fadeso, li ti zo ti mû ye ti nyon na Pharaon atï na ndo ti Joseph. Lo tene na Pharaon: ‘Lani so mbi yeke na da ti kanga, mbeni koli ayeke dä so ahinga ti fa nda ti abango li.’ Pharaon ahunda ti tene a sigigi na Joseph na da ti kanga hio.

Pharaon afa peko ti abango li ti lo na Joseph, lo tene: ‘Mbi bâ abagara mbasambala so akono pendere. Na pekoni, mbi bâ ambeni bagara mbasambala so angen mingi. Ala so angen mingi ate ala so akono.’

Pharaon ayeke bâ li ti lo

‘Na yâ ti use bango li ni, mbi bâ li ti le-kobe mbasambala so alë na abe nzoni. Ala sigigi na tere ti gere ti keke oko. Na peko ti so, mbi bâ li ti le-kobe mbasambala so angen na so ahule kue asigigi nga. Ala so angen amene ala so alë nzoni so.’

Joseph atene na Pharaon: ‘Abango li use so kue aye ti sara tënë ti ye oko. Abagara mbasambala so akono pendere nga li ti le-kobe mbasambala so alë nzoni aye ti tene ngu mbasambala. Abagara mbasambala so angen na ale-kobe mbasambala so angen nga aye ti sara tënë ti ambeni ngu mbasambala nde. Ni la, teti ngu mbasambala, akobe ayeke lë mingi na Egypte. Me teti ambeni ngu mbasambala na pekoni, akobe ayeke lë ande mingi pëpe.’

Joseph atene na Pharaon: ‘Mû mbeni zo ti ndara ti bungbi akobe na gogoro teti ngu mbasambala na ngoi so kobe ayeke lë mingi. Tongaso, tongana ngu mbasambala so na yâ ni kobe alë mingi pëpe aga, azo ayeke kui ande nzara pëpe.’

Tënë ni anzere na Pharaon, na lo mû Joseph ti bungbi akobe ni. Na peko ti Pharaon, Joseph aga zo-ti-komande ti sese ti Egypte so ayeke kota ahon atanga ni kue.

Ngu miombe na pekoni, tongana kota nzara ayeke dä, Joseph abâ ambeni koli aga. Ala yeke azo wa? Ala yeke ayaya ti lo 10! Babâ ti ala Jacob atokua ala na Egypte ti wara kobe, ndali ti so kobe ayeke gue ti hunzi na sese ti Canaan. Joseph agirisa aita ti lo pëpe, me ala, ala girisa lo. Ngbanga ti nyen? Ngbanga ti so lo ga kota koli awe, na lo yü ambeni bongo nde.

Tongaso, Joseph abâ so a yeke Jéhovah si atokua lo na sese ti Egypte, na lo sara ni senge pëpe. Ti mo, Joseph ayeke sara nyen? Zia e bâ ni.

Genèse 41:1-57; 42:1-8; 50:20.



Ahundango tënë

  • Nyen la asi na Pharaon na mbeni bï?
  • Nyen la apusu zo ti mungo ye ti nyon na Pharaon ti dabe ti lo na Joseph?
  • Tongana ti so foto ni afa, Pharaon abâ li ti lo na ndo ti aye use wa?
  • Joseph atene so abango li so aye ti tene nyen?
  • Tongana nyen Joseph aga kota zo-ti-komande ti sese ti Egypte ahon atanga ni kue na peko ti Pharaon?
  • Ngbanga ti nyen aita ti Joseph aga na Egypte? Ngbanga ti nyen ala girisa lê ti Joseph?
  • Joseph adabe ti lo na bango li wa? Ye so amû maboko na lo ti gbu nda ti ye wa?

Ambeni hundango tënë

  • Diko Genèse 41:1-57.

    Tongana nyen Joseph agboto lê ti azo lani na ndo ti Jéhovah? Tongana nyen aChrétien alingbi ti mû tapande ti lo laso? (Gen. 41:16, 25, 28; Mat. 5:16; 1 Pi. 2:12).

    Angu so kobe alë lani mingi na Egypte nga na angu ti kota nzara so aga na pekoni afa tâ na lege ni kangbi so ayeke na popo ti dutingo ti azo ti Jéhovah na lege ti yingo laso na ti abungbi ti nzapa so atene ala yeke achrétien. Kangbi ni so ayeke so wa? (Gen. 41:29, 30; Amos 8:11, 12).

  • Diko Genèse 42:1-8 na 50:20.

    Tongana ti so azo ti kodoro ni ayeke sara ka, a yeke sioni ti tene awakua ti Jéhovah akuku na gbe ti mbeni zo ti fa yekiango ndo ndali ti kota ndo ti lo? (Gen. 42:6).