Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

22: Joseph na da ti kanga

22: Joseph na da ti kanga

JOSEPH ayeke lani gi na ngu 17 tongana a gue na lo na Egypte. Kâ, a kä lo na mbeni koli so iri ti lo ayeke Potiphar. Koli so asara kua ndali ti Pharaon, gbia ti Egypte.

Joseph na da ti kanga

Joseph asara kua ngangu ndali ti Potiphar. Tongana Joseph akpengba awe, Potiphar azia lo mokonzi ti da ti lo. Tongaso, ngbanga ti nyen lo yeke na da ti kanga? A yeke ndali ti wali ti Potiphar.

Joseph aga pendere koli, na wali ti Potiphar aye ti lango na lo. Me Joseph ahinga so ye so ayeke sioni, na lo ke ti sara ni. Ngonzo agbu wali ti Potiphar. Tongana koli ti lo akiri na yanga-da, lo tene mvene na lo tongaso: ‘Sioni Joseph so aye fade ti lango na mbi!’ Potiphar amä tënë ti wali ti lo na ngonzo asara lo mingi na tere ti Joseph si lo bi lo na da ti kanga.

Mokonzi ti da ti kanga ni abâ so Joseph ayeke nzoni zo. Tongaso lo zia lo ti bâ ndo na ndo ti azo ti da ti kanga ni kue. Mbeni lâ, ngonzo agbu Pharaon na tere ti zo so ayeke mû ye ti nyon na lo nga na tere ti zo ti sarango mapa ti lo si lo bi ala na da ti kanga. Na mbeni bï, azo use so abâ li ti ala, me ala hinga nda ni pëpe. Na ndapre, Joseph atene na ala: ‘Ala fa bango li ti ala na mbi.’ Ala fa peko ti bango li ti ala ni, na Nzapa amû maboko na Joseph ti fa nda ni na ala.

Na zo ti mû ye ti nyon na Pharaon, Joseph atene: ‘Na yâ ti lango ota, Pharaon ayeke zi mo na da ti kanga na mo yeke kiri na kua ti mo.’ Na lo bi mbeni tënë dä, lo tene: ‘Tongana a zi mo awe, tene na Pharaon ti zi mbi na da ti kanga.’ Me Joseph atene na zo ti sarango mapa: ‘Na yâ ti lango ota, Pharaon ayeke tene ande ti dë go ti mo.’

Ye kue so Joseph atene aga tâ tënë. Na yâ ti lango ota, Pharaon atene ti dë go ti zo ti sarango mapa ni. Me a zi zo ti mû ye ti nyon na Pharaon na da ti kanga, na lo kiri na kua ti lo. Me lo girisa na ndo ti Joseph kue. Lo tene tënë oko na Pharaon pëpe, na Joseph angbâ na da ti kanga.

Genèse 39:1-23; 40:1-23.



Ahundango tënë

  • Joseph ayeke na ngu oke na ngoi so a mû lo ti gue na ni na Egypte? Nyen la asi na lo kâ?
  • Nyen la asara si a bi Joseph na da ti kanga?
  • Kusala wa a mû na Joseph na da ti kanga kâ?
  • Na da ti kanga, Joseph asara nyen ndali ti zo ti mungo ye ti nyon na Pharaon nga na zo ti sarango mapa ti lo?
  • Nyen la asi tongana Pharaon azi zo ti mungo ye ti nyon na lo na da ti kanga?

Ambeni hundango tënë

  • Diko Genèse 39:1-23.

    Teti so a sara lani mbeni ndia pëpe na lê ti mbeti so ake lango-sioni na ngoi ti Joseph, nyen la apusu lo ti kpe wali ti Potiphar? (Gen. 2:24; 20:3; 39:9).

  • Diko Genèse 40:1-23.

    Fa na nduru tënë bango li so zo ti mungo ye ti nyon na Pharaon abâ. Jéhovah afa nda ni na Joseph, lo tene nyen? (Gen. 40:9-13).

    Zo ti sarango mapa na Pharaon abâ li ti lo na ndo ti nyen? Fa nda ti bango li ti lo ni (Gen. 40:16-19).

    Tongana nyen bungbi ti ngbâa be-ta-zo na ti ndara ayeke sara ye laso tongana Joseph? (Gen. 40:8; Ps. 36:10; Jean 17:17; Kus. 17:2, 3).

    Tongana nyen mbaï so ayeke na Genèse 40:20 amû lege ti hinga bango ndo ti aChrétien na ndo ti amatanga ti dungo zo? (Zo-ti. 7:1; Marc 6:21-28).