Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

21: Aita ti Joseph ake lo

21: Aita ti Joseph ake lo

BÂ TONGANA nyen maseka-koli so ayeke na vundu mingi, na mbeni ye ti tene lo sara ayeke dä pëpe. Maseka-koli so ayeke Joseph. Aita ti lo alondo ti kä lo na akoli so ayeke gue na Egypte. Na Egypte, Joseph ayeke ga ngbâa. Aita ti lo asara tongaso ngbanga ti nyen? Bê asara ala na tere ti lo.

Aita ti Joseph ayeke kä lo

Babâ ti ala Jacob aye Joseph mingi. Lo sara na Joseph mbeni pendere yongoro bongo. Tongana ayaya ti lo 10 abâ so Jacob aye Joseph mingi ahon ala, kota bê asara ala na ala ke lo. Me mbeni tënë nde ayeke nga dä so ndali ni ala ke lo.

Joseph abâ li ti lo lege use. Na yâ ti abango li use so, aita ti lo akuku na gbele lo. Tongana Joseph afa peko ti abango li ti lo na aita ti lo, ala kiri ake lo ahon ti kozo.

Mbeni lâ, tongana ayaya ti Joseph ayeke bata anyama ti babâ ti ala, Jacob ahunda na Joseph ti gue ti bâ ala yeke tongana nyen kâ. Tongana aita ti lo abâ lo na gango ni, ala tene: ‘Zia e fâ lo!’ Me Ruben, kozo molenge ni, atene na ala ti sara tongaso pëpe. Tongaso, ala gbu lo abi lo na yâ ti mbeni dungu so ahule awe. Na pekoni, ala duti ti gbu li ti ala na ndo ye so ala lingbi ti sara na lo.

Mo ye ti bâ, ala bâ azo ti mara ti Ismaël ayeke ga. Juda atene na aita ti lo: ‘Zia e kä lo na azo ti mara ti Ismaël!’ Ala sara tongaso. Ala kä Joseph teti nginza ti argent 20. So tâ ye ti sioni!

Ala yeke tene ande nyen na babâ ti ala? Bâ ye so ala sara: ala fâ mbeni ngasa na ala yôro bongo ti Joseph na yâ ti mênë ti ngasa ni lege mingi. Ala mû bongo ni na ala gue afa ni na babâ ti ala, ala tene: ‘Bongo ti Joseph la pëpe?’

Jacob abâ ni na atene: ‘Mbeni nyama ti ngonda la ate Joseph!’ So ayeke ye so aita ti Joseph aye fade ti tene babâ ti ala amä na bê dä la. Vundu asara Jacob mingi. Lo toto lango mingi. Me Joseph akui pëpe. Zia e bâ ye so asi na lo na sese ti Egypte.

Genèse 37:1-35.



Ahundango tënë

  • Ngbanga ti nyen aita ti Joseph asara kota bê na tere ti lo? Ala sara nyen?
  • Aita ti Joseph aye lani ti sara nyen na lo? Me Ruben atene ti lo nyen?
  • Nyen la asi tongana ala bâ azo ti Ismaël na gango ni?
  • Aita ti Joseph asara nyen ti tene babâ ti ala apensé so Joseph akui awe?

Ambeni hundango tënë

  • Diko Genèse 37:1-35.

    Tongana nyen aChrétien alingbi ti sara ye tongana Joseph ti fa siokpari so ambeni ita ti kongregation asara? (Gen. 37:2; Lév. 5:1; 1 aCor. 1:11).

    Nyen la apusu lani aita ti Joseph ti kä lo? (Gen. 37:11, 18; aProv. 27:4; Jacq. 3:14-16).

    Jacob asara nyen so afa so a yeke na lege ni ti tene zo asara vundu? (Gen. 37:35).