Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

20: Ye ti sioni asi na Dina

20: Ye ti sioni asi na Dina

MO BÂ azo so Dina ague ti bâ ala? Lo gue ti bâ ambeni molenge-wali ti sese ti Canaan. Bê ti babâ ti lo Jacob anzere na ye so? Ti kiri tënë na ni, dabe ti mo na tënë ti bê ti Abraham na Isaac na ndo awali ti Canaan.

Dina ague ti bâ amolenge-wali ti Canaan

Abraham aye lani si molenge ti lo Isaac amû mbeni wali ti sese ti Canaan? Oko pëpe. Isaac na Rebecca aye lani si molenge ti ala Jacob amû mbeni wali ti Canaan? Oko pëpe. Ngbanga ti nyen?

A yeke ngbanga ti so azo so avoro anzapa ti wataka. Ala yeke anzoni zo ti sara mariage na ala pëpe, na ala yeke anzoni zo ti fono na ala nga pëpe. Ni la e hinga so bê ti Jacob anzere pëpe tongana molenge ti lo ti wali afono na amolenge-wali ti Canaan.

Biani, ye ti sioni asi na Dina. Na lê ti foto so, mo bâ koli so ayeke bâ Dina? Lo yeke zo ti Canaan. Iri ti lo ayeke Sichem. Mbeni lâ tongana Dina aga ti bâ amba ti lo, koli so agbu lo na ngangu na alango na lo. So ayeke nzoni pëpe, ngbanga ti so gi koli na wali so asara mariage awe si alingbi ti duti koli na wali. Sioni so Sichem asara na tere ti Dina aga na akpale mingi na pekoni.

Tongana aita ti Dina ti koli amä ye so asi, ngonzo agbu ala mingi. Aita ti lo use, Siméon na Lévi, amû akota zembe na ala gue na tere ti akoli ti kodoro ni na ngoi so akoli so aku tere ti ala na ni pëpe. Ala use na aita ti ala ti koli afâ Sichem na tanga ti akoli ti kodoro ni kue. Ngonzo asara Jacob mingi ndali ti so amolenge ti lo ti koli asara ye ti sioni so.

Ngbanga ti nyen aye ti sioni so asi? A yeke ngbanga ti so Dina afono na azo so abata andia ti Nzapa pëpe. E ye ti sara legeoko tongaso pëpe. Ni la?

Genèse 34:1-31.



Ahundango tënë

  • Ngbanga ti nyen Abraham na Isaac aye lani pëpe ti tene amolenge ti ala amû awali ti sese ti Canaan?
  • A nzere lani na Jacob ti tene molenge ti lo ti wali asara kamarade na amolenge-wali ti Canaan?
  • Koli wa la ayeke bâ Dina na lê ti foto so? Ye ti sioni wa lo sara?
  • Siméon na Lévi asara nyen tongana ala mä ye so asi na ita ti ala Dina?
  • Jacob ayeda lani na ye so Siméon na Lévi asara?
  • Ngbanga ti nyen aye ti sioni so kue asi na sewa ni?

Ambeni hundango tënë

  • Diko Genèse 34:1-31.

    Dina ague abâ awali ti sese ti Canaan gi fani oko awe? Ngbanga ti nyen mo tene tongaso? (Gen. 34:1).

    Ngbanga ti nyen Dina ayeke kamême na tënë na li ti lo ndali ti sioni ye so asi na lo? (aGal. 6:7).

    Tongana nyen amaseka laso alingbi ti fa so ala manda ye na lege ti sioni ye so asi na Dina? (aProv. 13:20; 1 aCor. 15:33; 1 Jean 5:19).