Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

19: Amolenge ti Jacob

19: Amolenge ti Jacob
Jacob na amolenge-koli ti lo

BÂ KOTA sewa so. A yeke amolenge-koli 12 ti Jacob. Jacob adü amolenge-wali nga. Mo hinga iri ti amolenge so? Zia e gi ti hinga ambeni.

Léa adü Ruben, Siméon, Lévi na Juda. Me tongana Rachel abâ so lo lingbi ti dü pëpe, vundu asara lo mingi. Ni la si lo mû Bilha, zo ti kua ti lo ti wali, na Jacob si lo dü Dan na Nephtali. Léa amû nga Zilpa, zo ti kua ti lo ti wali, na Jacob, na Zilpa adü Gad na Aser. Na pekoni, Léa adü tanga ti amolenge ti lo ti koli, Issacar na Zabulon.

Na nda ni, Rachel adü molenge ti koli, na lo iri lo Joseph. Ande, e yeke sara tënë mingi na ndo Joseph teti so lo ga mbeni kota zo. So ayeke amolenge ti Jacob 11 na ngoi so lo duti na ndo ti Laban, babâ ti Rachel.

Jacob adü amolenge ti wali nga. Me Bible afa gi iri ti molenge-wali oko. Iri ti lo ayeke Dina.

Mbeni lâ, Jacob aye ti kiri na kodoro ti lo na Canaan. Lo mû kota sewa ti lo ni kue, lo mû gbâ ti akete nyama na akota nyama ti lo, na lo komanse kota voyage ti lo.

Tongana ala kiri na Canaan a ninga kete awe, Rachel aye ti dü use molenge ti lo. Lo dü na lege. Lo dü gbä si na nda ni lo kui na dungo ni. Me ye oko asara molenge ni pëpe. Jacob airi lo Benjamin.

A yeke nzoni ti dabe ti e na iri ti amolenge 12 ti Jacob, ngbanga ti so mara ti Israël kue alondo na ala. Iri ti akete mara 12 ti Israël ayeke iri ti amolenge-koli 10 ti Jacob nga na amolenge-koli use ti Joseph. Isaac angbâ na fini ngu mingi na peko ti dungo amolenge-koli so, na bê ti lo anzere mingi ti wara gbâ ti atarä. Me zia e bâ ye so asi na Dina, tarä ti lo ti wali.

Genèse 29:32-35; 30:1-26; 35:16-19; 37:35.



Ahundango tënë

  • Iri ti amolenge ti koli omene so Jacob adü na kozo wali ti lo Léa ayeke nyen?
  • Fa iri ti amolenge ti koli use so Zilpa, zo ti kua ti Léa, adü na Jacob.
  • Fa iri ti amolenge ti koli use so Bilha, zo ti kua ti Rachel, adü na Jacob.
  • Fa iri ti amolenge ti koli use so Rachel adü. Me nyen la asi na ngoi so lo dü use molenge ni?
  • Tongana ti so foto ni afa, Jacob awara lani amolenge ti koli oke? Mara wa abâ gigi na lege ti ala?

Ambeni hundango tënë

  • Diko Genèse 29:32-35; 30:1-26 na 35:16-19.

    Tongana ti so tapande ti amolenge ti Jacob ti koli 12 afa ni, mingi ni a yeke zia iri ti amolenge-koli ti aHébreu ti giriri tongana nyen?

  • Diko Genèse 37:35.

    Atâa so gi Dina oko si Bible afa iri ti lo, e hinga tongana nyen so Jacob adü ambeni molenge-wali nga? (Gen. 37:34, 35).