Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

17: Esaü na Jacob

17: Esaü na Jacob
Esaü

AMOLENGE-KOLI use so mo bâ na lê ti foto so akpa tere pëpe. Mo hinga iri ti ala? Lo ti gingo nyama ayeke Esaü, na lo so abata angasangbaga ayeke Jacob.

Esaü na Jacob ayeke amolenge ti ngbo ti Isaac na Rebecca. Isaac aye Esaü ndali ti anyama so lo yeke ga na ni. Me Rebecca aye Jacob ngbanga ti so lo yeke kpô.

Abraham, kotara ti ala, ade lani na fini. Jacob aye lani ti mä lo tongana lo yeke sara tënë ti Jéhovah. Abraham akui tongana lo wara ngu 175, na angbo ni ayeke lani na ngu 15.

Tongana Esaü awara ngu 40, lo mû wali use ti sese ti Canaan. Ye so azia vundu mingi na bê ti Isaac nga na ti Rebecca, ngbanga ti so awali so avoro Jéhovah pëpe.

Mbeni lâ, mbeni ye asi so asara si ngonzo agbu Esaü ngangu na tere ti ita ti lo Jacob. Ngoi asi awe ti tene Isaac airi tënë nzoni na ndo ti kozo molenge ti lo. Ndali ti so Esaü ayeke kota zo ti Jacob, lo ku ti tene a iri tënë nzoni na li ti lo. Me lo kä lani awe na Jacob ndo ti lo ti kozo molenge so alingbi fade ti mû na lo lege ti tene Isaac airi tënë nzoni na li ti lo. Nga, lani so a dü ala, Nzapa atene so tënë nzoni ayeke duti ande na li ti Jacob. A yeke ye so asi la. Isaac airi tënë nzoni na li ti molenge ti lo Jacob.

Jacob

Na pekoni, tongana Esaü amä ye so asi, ngonzo agbu lo na tere ti Jacob. Ngonzo asara lo mingi si lo tene ni yeke fâ Jacob. Tongana Rebecca amä tënë so, lo gi bê ti lo mingi. Lo tene na koli ti lo Isaac, lo tene: ‘Tongana Jacob nga amû awali ti Canaan so, a yeke duti ande sioni mingi.’

Tongaso, Isaac airi molenge ti lo Jacob na lo tene na lo: ‘Mû mbeni wali ti Canaan tongana wali ti mo pëpe. Me gue na Haran, kodoro ti kotara ti mo Bethuel, na mû mbeni molenge-wali ti Laban, molenge ti Bethuel ti koli, ti ga wali ti mo.’

Jacob amä yanga ti babâ ti lo, na lo gue na yongoro kodoro ti afami ti lo na Haran.

Genèse 25:5-11, 20-34; 26:34, 35; 27:1-46; 28:1-5; aHébreu 12:16, 17.



Ahundango tënë

  • Esaü na Jacob ayeke azo wa? Na lege wa sarango ye ti ala akpa tere pëpe?
  • Ngu ti Esaü na Jacob ayeke oke na lâ ni so âta ti ala Abraham akui?
  • Esaü asara nyen so abi vundu na bê ti babâ na mama ti lo mingi?
  • Ngbanga ti nyen Esaü asara ngonzo mingi na tere ti ita ti lo Jacob?
  • Isaac ahunda na molenge ti lo Jacob ti sara nyen?

Ambeni hundango tënë

  • Diko Genèse 25:5-11, 20-34.

    Tënë wa Jéhovah atene na ndo ti amolenge ti Rébecca use kue? (Gen. 25:23).

    Jacob abâ ti lo lani ndo ti kozo molenge tongana nyen? Ka Esaü? (Gen. 25:31-34).

  • Diko Genèse 26:34, 35; 27:1-46 na 28:1-5.

    Tongana nyen a sigigi polele so Esaü abâ lani aye ti yingo na nene ni pëpe? (Gen. 26:34, 35; 27:46).

    Ti tene Jacob awara tënë nzoni ti Nzapa, Isaac atene na lo ti sara nyen? (Gen. 28:1-4).

  • Diko aHébreu 12:16, 17.

    Tapande ti Esaü afa nyen na ndo ti ye so ayeke si na azo so abâ aye ti yingo na nene ni pëpe?