Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

16: Isaac amû nzoni wali

16: Isaac amû nzoni wali

MO HINGA wali so na lê ti foto so? A yeke Rebecca. Koli so lo yeke gue na mbage ti lo ayeke Isaac. Rebecca ayeke ga wali ti lo na pekoni. Ye so asi tongana nyen?

Abraham, babâ ti Isaac, aye ti wara nzoni wali ndali ti molenge ti lo. Me lo ye si Isaac amû mbeni wali ti sese ti Canaan pëpe, tënë ti so ala yeke voro anzapa ti wataka. Ni la si Abraham airi zo ti kua ti lo, lo tene: ‘Kiri na kodoro ti afami ti mbi na Haran na mû wali na popo ti ala ti ga wali ti molenge ti mbi Isaac.’

Zo ti kua ti Abraham aku kete pëpe, lo mû achameau bale-oko na lo gue. Tongana lo si nduru na kodoro ti afami ti Abraham, lo luti nduru na tere ti mbeni dungu. A yeke na lakui, ngoi so awali ti gbata ni ayeke ga ti tö ngu. Zo ti kua ti Abraham asambela Jéhovah, lo tene: ‘Zia si wali so ayeke mû na mbi ngu ti nyon na amû ngu na achameau ti mbi ti nyon aduti lo so mo soro lo ti ga wali ti Isaac.’

Rebecca atingbi na Isaac

A ninga pëpe, Rebecca aga ti tö ngu. Tongana zo ti kua ni ahunda na lo ngu ti nyon, lo mû na lo. Na pekoni, lo mû ngu na achameau bale-oko ni kue so nzara ti ngu ahon ndo ti ala. So ayeke ngangu kua mingi, ngbanga ti so achameau ayeke nyon ngu mingi.

Tongana Rebecca ahunzi ti sara ye so awe, zo ti kua ti Abraham ahunda na lo iri ti babâ ti lo. Lo hunda wala lo lingbi ti lango na da ti ala. Rebecca akiri tënë, lo tene: ‘Iri ti babâ ti mbi ayeke Bethuel, na ndo ti lango ayeke na da ti e.’ Zo ti kua ti Abraham ahinga kozoni awe so Bethuel ayeke molenge ti Nahor, ita ti Abraham. Tongaso, lo kuku na sese, lo kiri singila na Jéhovah ndali ti so lo gue na lo na mbage ti afami ti Abraham.

Na bï ni so, zo ti kua ti Abraham afa na Bethuel nga na Laban, ita ti Rebecca ti koli, nda ti gango ti lo. Ala use ayeda ti tene Rebecca ague asara mariage na Isaac. Rebecca atene nyen, tongana a hunda na lo tënë na ndo ni? Lo tene: ‘Mbi yeda.’ Tâ gi na ndade ni, ala mû achameau ni na ala mû yongoro lege ti Canaan ti kiri.

Ala si na lakui. Rebecca abâ mbeni koli so ayeke tambela na yâ ti benyama. A yeke Isaac. Tere ti lo anzere ti bâ Rebecca. Sara, mama ti Isaac, akui a sara ngu ota awe, na vundu angbâ ti sara lo. Me ti fadeso, Isaac aye Rebecca mingi, na lo kiri lo duti na ngia.

Genèse 24:1-67.



Ahundango tënë

  • Na lê ti foto so, koli na wali so ayeke azo wa?
  • Abraham asara lani nyen ti wara mbeni wali ti mû na molenge ti lo. Lo sara tongaso ngbanga ti nyen?
  • Nzapa akiri tënë na sambela ti wakua ti Abraham tongana nyen?
  • Rébecca atene nyen tongana a hunda na lo wala lo ye ti ga wali ti Isaac?
  • Nyen la asara si Isaac akiri aduti na ngia?

Ambeni hundango tënë

  • Diko Genèse 24:1-67.

    Anzoni ye wa a bâ lani na yâ ti sarango ye ti Rébecca na ngoi so lo tingbi na wakua ti Abraham na tere ti dungu? (Gen. 24:17-20; aProv. 31:17, 31).

    Ye so Abraham aleke lani ndali ti Isaac amû nzoni tapande wa na aChrétien laso? (Gen. 24:37, 38; 1 aCor. 7:39; 2 aCor. 6:14).

    Ngbanga ti nyen a lingbi e wara ngoi ti gbu li tongana ti so Isaac asara? (Gen. 24:63; Ps. 77:13; aPhil. 4:8).

TI HINGA AMBENI TËNË

Rébecca aye lani ti zia ngia na bê ti Jéhovah

Nyen la e lingbi ti sara ti fa so e sara ye tongana ti Rébecca? Manda ambeni tënë na ndo ti lo.