Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

15: Wali ti Lot

15: Wali ti Lot

LOT na sewa ti lo nga na Abraham aduti na sese ti Canaan. Mbeni lâ Abraham atene na Lot, lo tene: ‘Sese ni alingbi na anyama ti mo nga na anyama ti mbi pëpe. Mbi hunda na mo ti tene e kangbi tere. Tongana mo gue na mbage so, mbi yeke gue na mbage so kâ.’

Lot abâ sese ni. Lo bâ mbeni mbage ni ayeke pendere mingi, na ngu nga na gbâ ti pere ayeke dä teti anyama ti lo. A yeke benyama ti Jourdain. Tongaso, Lot na sewa ti lo nga na anyama ti lo ague kâ, si na nda ni ala sara kodoro na gbata ti Sodome.

Azo ti Sodome ayeke lani sioni mingi. Sioni ti ala aso bê ti Lot mingi ndali ti so lo yeke nzoni zo. Sioni ti ala aso nga bê ti Nzapa. Ni la si Nzapa atokua a-ange use ti tene na Lot so lo yeke futi Sodome na kodoro so ayeke nduru na ni, Gomorrhe.

A-ange ni atene na Lot: ‘Gue hio! Mû wali ti mo na amolenge ti mo ti wali use kue na sigigi na yâ ti kodoro so!’ Lot na sewa ti lo ayeke sara ye gi yeke, si a-ange ni agbu tïtî ala na asigigi na ala na yâ ti kodoro ni. Oko ti a-ange ni atene: ‘Ala kpe! Ala bâ ndo na peko pëpe! Ala gue na mbage ti akete hoto si ala kui pëpe!’

Lot na amolenge ti lo ti wali use kue amä yanga, ala kpe kodoro ti Sodome. Ala luti kete pëpe na ala bâ ndo na peko pëpe. Me wali ti Lot amä yanga pëpe. Tongana ala kpe kete awe, wali ni aluti na lo bâ ndo na peko. Tongaso, wali ti Lot aga ingo, a londo na li ti lo ti si na gere ti lo. Mo bâ lo na lê ti foto so?

E lingbi ti manda ye mingi ge. A fa so Nzapa ayeke bata azo so amä yanga ti lo, me azo so ake yanga ti lo ayeke ngbâ na fini pëpe.

Genèse 13:5-13; 18:20-33; 19:1-29; Luc 17:28-32; 2 Pierre 2:6-8.

Lot ayeke kpe kodoro ti Sodome


Ahundango tënë

  • Ngbanga ti nyen Abraham na Lot akangbi yâ ti ala?
  • Ngbanga ti nyen Lot asoro ti duti na Sodome?
  • Azo ti Sodome ayeke lani tongana nyen?
  • A-ange use agboto mê ti Lot, ala tene nyen?
  • Ngbanga ti nyen wali ti Lot aga ingo, a londo na li ti lo ti si na gere ti lo?
  • E lingbi ti manda nyen na lege ti ye so asi na wali ti Lot?

Ambeni hundango tënë

  • Diko Genèse 13:5-13.

    Na ndo ti tënë ti lekengo akpale na popo ti azo, e lingbi ti manda nyen na mbage ti Abraham? (Gen. 13:8, 9; aRom. 12:10; aPhil. 2:3, 4).

  • Diko Genèse 18:20-33.

    Tongana nyen sarango ye ti Jéhovah na mbage ti Abraham asara si e hinga biani na bê ti e so Jéhovah na Jésus ayeke fâ ande ngbanga na lege ni? (Gen. 18:25, 26; Mat. 25:31-33).

  • Diko Genèse 19:1-29.

    Mbaï ti Bible so afa so Nzapa ayeke bâ bungbingo ti koli na koli wala wali na wali tongana nyen? (Gen. 19:5, 13; Lév. 20:13).

    Kangbi wa e bâ na yâ ti sarango ye ti Lot na ti Abraham tongana Nzapa ahunda na ala ti sara mbeni ye? E lingbi ti manda nyen dä? (Gen. 19:15, 16, 19, 20; 22:3).

  • Diko Luc 17:28-32.

    Na yâ ti bê ti lo, wali ti Lot ayeke bâ lani aye ti mitele tongana nyen? Ye so afa na e ti sara hange na nyen? (Luc 12:15; 17:31, 32; Mat. 6:19-21, 25).

  • Diko 2 Pierre 2:6-8.

    Na tapande ti Lot, tongana nyen a lingbi e bâ azo so e yeke bâ tere na ala lakue na so asara aye ti sioni? (Ezéch. 9:4; 1 Jean 2:15-17).