Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

14: Nzapa atara mabe ti Abraham

14: Nzapa atara mabe ti Abraham

MO BÂ ye so Abraham ayeke sara na lê ti foto so? Zembe ayeke na maboko ti lo, mo bâ mo tene lo ye ti fâ molenge ti lo. Me lo ye ti sara tongaso ngbanga nyen? Kozoni, zia e bâ tongana nyen Abraham na Sara awara molenge ti ala ti koli.

Abraham aye ti mû Isaac na sandaga

Girisa pëpe so Nzapa atene lani na ala so ala yeke dü molenge ti koli. Me ye so akpa ti si pëpe, tënë ti so ala ga mbakoro mingi awe. Ye oko, Abraham ahinga so Nzapa alingbi ti sara ye kue. Tongaso, nyen la asi?

Ngu oko ahon na peko ti tënë so Nzapa atene na Abraham. Tongana Abraham awara ngu 100 na Sara awara ngu 90, ala dü molenge ti koli na ala iri lo Isaac. Jéhovah atene tâ tënë!

Tongana Isaac akono awe, Jéhovah atara mabe ti Abraham. Lo iri lo, lo tene: ‘Abraham!’ Abraham akiri tënë, lo tene: ‘Mbi la!’ Nzapa atene: ‘Mû molenge ti mo Isaac, na gue na kota hoto so mbi yeke fa na mo. Kâ, fâ molenge ti mo na mû lo na sandaga.’

Vundu asara Abraham mingi ngbanga ti so lo ye molenge ti lo ngangu. Girisa pëpe, Nzapa atene so amolenge ti Abraham ayeke duti na sese ti Canaan. Me ye so ayeke si tongana nyen tongana Isaac akui? Abraham agbu nda ni mbilimbili pëpe, me lo mä yanga ti Nzapa kamême.

Tongana ala si na kota hoto so, Abraham akanga Isaac na lo zia lo na ndo ti balaga so lo leke. Na pekoni, lo mû zembe ti fâ na molenge ti lo. Me tâ gi na ngoi ni so, ange ti Nzapa airi lo, lo tene: ‘Abraham! Abraham!’ Abraham akiri tënë, lo tene: ‘Mbi la!’

Nzapa atene: ‘Sara sioni na molenge ni pëpe! Mbi hinga fadeso awe so mo mä na bê na mbi, teti so mo gbanzi oko ngengele molenge ti mo na mbi pëpe.’

So kota mabe si Abraham afa na mbage ti Nzapa! Lo mä na bê so Jéhovah alingbi ti sara ye kue, na Jéhovah alingbi même ti zingo Isaac na kuâ. Ti tâ tënë ni, Nzapa aye lani si Abraham afâ molenge ti lo pëpe. Tongaso, lo sara si ambeni kete keke agbu didi ti mbeni ngasangbaga, na lo tene na Abraham ti mû lo na sandaga na place ti molenge ti lo.

Genèse 21:1-7; 22:1-18.



Ahundango tënë

  • Nzapa amû yanga ti sara nyen na Abraham? Jéhovah asara ye alingbi na tënë ti yanga ti lo tongana nyen?
  • Tongana ti so foto ni afa, Nzapa atara mabe ti Abraham tongana nyen?
  • Abraham asara nyen, atâa so lo hinga pëpe nda ni so Nzapa amû yanga so na lo?
  • Nyen la asi tongana Abraham amû zembe ti fâ na molenge ti lo?
  • Mabe ti Abraham na mbage ti Nzapa ayeke lani kota tongana nyen?
  • Nzapa amû nyen na Abraham ti tene lo mû na sandaga? Jéhovah asara ni tongana nyen?

Ambeni hundango tënë

  • Diko Genèse 21:1-7.

    Ngbanga ti nyen Abraham afâ lani molenge ti lo na ganza na lango miombe ni? (Gen. 17:10-12; 21:4).

  • Diko Genèse 22:1-18.

    Tongana nyen Isaac afa so lo mä yanga ti babâ ti lo Abraham? Tongana nyen ye so aduti fä ti mbeni kpengba ye so ayeke gue ti si? (Gen. 22:7-9; 1 aCor. 5:7; aPhil. 2:8, 9).

TI HINGA AMBENI TËNË

Abraham—“babâ ti ala kue so ayeke na mabe”

Tongana nyen la Abraham afa so lo yeke na mabe? Na alege wa e lingbi ti mû tapande ti mabe ti Abraham?