Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

13: Abraham, koli so Nzapa aye tënë ti lo mingi

13: Abraham, koli so Nzapa aye tënë ti lo mingi

MBENI oko ti ando so azo ague dä na peko ti Kota Moa ayeke kodoro ti Ur. Kodoro so akono mingi, na apendere da ayeke na yâ ni mingi. Me azo ti kodoro ti Ur avoro anzapa ti wataka legeoko tongana ti so ala sara lani kâ na Babel. Azo ti Ur na ti Babel ayeke tongana Noé na molenge ti lo Sem pëpe, teti ala use so angbâ ti voro Jéhovah lakue.

Ngu 350 na peko ti Kota Moa, Noé so aduti be-ta-zo na Nzapa akui. A yeke gi ngu use na pekoni si a dü zo so ayeke na lê ti foto so. Zo so anzere na bê ti Jéhovah Nzapa mingi. Iri ti lo ayeke Abraham. Lo na sewa ti lo aduti na kodoro ti Ur.

Abraham ayeke bâ atongoro

Mbeni lâ, Jéhovah atene na Abraham, lo tene: ‘Londo na kodoro ti Ur, mo na afami ti mo, ala gue na mbeni kodoro so mbi yeke fa na mo.’ Abraham asara nyen? Lo mä yanga ti Nzapa? En, lo dö apendere ye ti kodoro ti Ur lo zia, na lo hon. Abraham amä yanga ti Nzapa lakue si na nda ni a hinga lo tongana zo so Nzapa aye tënë ti lo mingi.

Ambeni fami ti Abraham amû peko ti lo tongana lo zia kodoro ti Ur ti hon. Babâ ti lo Térah, Lot, molenge ti ita ti lo, nga na wali ti lo Sara amû peko ti lo. Mbeni lâ ala si na kodoro ti Haran. A yeke na ndo so si Térah akui. Ala zia Ur yongoro na peko ti ala kâ.

Ngoi kete na pekoni, Abraham na azo ti da ti lo alondo na Haran ala si na sese ti Canaan. A yeke na ndo so si Jéhovah atene na Abraham, lo tene: ‘Sese so, mbi yeke mû na amolenge ti mo.’ Abraham angbâ na Canaan na lo duti na gbe ti atente.

Nzapa airi tënë nzoni na ndo ti Abraham juska lo wara angasangbaga nga na ambeni nyama nde mingi mingi. Lo wara nga gbâ ti azo ti kua. Me lo na Sara adü molenge pëpe.

Tongana Abraham awara ngu 99, Jéhovah atene: ‘Mbi tene na mo so mo yeke ga babâ ti amara mingi.’ Me a lingbi ti duti tongaso tongana nyen, so Abraham na Sara aga mbakoro mingi awe na ala lingbi ti dü molenge pëpe?

Genèse 11:27-32; 12:1-7; 17:1-8, 15-17; 18:9-19.



Ahundango tënë

  • Azo ti kodoro ti Ur ayeke lani tongana nyen?
  • Koli wa la ayeke na lê ti foto so? A dü lo lawa? Lo yeke zo ti kodoro wa?
  • Nzapa atene na Abraham ti sara nyen?
  • Ngbanga ti nyen a iri Abraham koli so Nzapa aye tënë ti lo mingi?
  • Tongana Abraham azia Ur ti hon, azo wa amû peko ti lo?
  • Nzapa atene nyen na Abraham na ngoi so lo si na Canaan?
  • Tënë wa Nzapa atene na Abraham tongana lo yeke lani na ngu 99?

Ambeni hundango tënë

  • Diko Genèse 11:27-32.

    Songo wa atingbi Abraham na Lot? (Gen. 11:27).

    Atâa so a tene a yeke Térah si amû sewa ni ti gue na Canaan, e hinga tongana nyen so a yeke tâ gi Abraham si amû li ni? Ngbanga ti nyen lo sara tongaso? (Gen. 11:31; Kus. 7:2-4).

  • Diko Genèse 12:1-7.

    Na peko ti so Abraham asi na sese ti Canaan, Jéhovah atene nyen ti fa so mbele ti lo na Abraham ayeke bâ gi pëpe mbeni hale ti lo oko? (Gen. 12:7).

  • Diko Genèse 17:1-8, 15-17.

    Tongana Abram awara ngu 99, lo wara iri wa? Lo wara iri so ndali ti nyen? (Gen. 17:5).

    Jéhovah atene fade Sara ayeke wara anzoni ye wa? (Gen. 17:15, 16).

  • Diko Genèse 18:9-19.

    Genèse 18:19 afa so kusala ti ababâ ayeke so wa? (Deut. 6:6, 7; aEph. 6:4).

    Nyen la asi na Sara so afa so e lingbi pëpe ti honde mbeni ye na Jéhovah? (Gen. 18:12, 15; Ps. 44:22).