Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti ambaï ti yâ ti Bible

12: Tour ti Babel

12: Tour ti Babel

NGU mingi ahon awe. Amolenge ti Noé adü gbâ ti amolenge, na amolenge ti ala adü nga amolenge. A ninga pëpe, azo asi ndo lê ti sese ni.

Mbeni oko ti azo so ayeke Nimrod, molenge ti tarä ti Noé. Lo yeke lani sioni mingi na lo fâ azo na anyama kirikiri. Nimrod asara si lo wani aga gbia ti komande na ndo ti azo. Nzapa aye tënë ti Nimrod pëpe.

Na lâ ni kâ, azo kue atene gi yanga oko. Nimrod aye si azo aduti na ndo oko si lo lingbi ti komande na ndo ti ala. Tongaso, lo sara nyen? Lo tene na ala ti leke mbeni kota kodoro nga na mbeni yongoro tour. Bâ na lê ti foto so tongana nyen azo ayeke pika brique.

Jéhovah Nzapa ayeda na lekengo kodoro nga na tour so pëpe. Lo ye si azo angbâ ndo oko pëpe, me ala mû lê ti sese kue. Me azo so atene: ‘Zia e leke mbeni kota kodoro na mbeni tour so ayo juska asi na yayu, tongaso si iri ti e awu!’ Azo so aye gonda ndali ti ala mveni, me ala ye ti gonda Nzapa pëpe.

Tongaso, Nzapa akanga lege na kusala ti ala. Mo hinga ye so lo sara? Lo sara si azo atene yanga ti kodoro nde nde, me yanga ti kodoro oko pëpe. Ni la si ala lingbi ti mä tere mbeni pëpe. A yeke ndali ni la si a di iri ti kodoro so Babel, wala Babylone, so aye ti tene “kirikiri.”

Na pekoni, azo akomanse ti zia kodoro ti Babel ti gue na ambeni ndo nde. Azo so atene yanga ti kodoro oko abungbi tere ague aduti na ndo oko na mbeni ndo nde.

Genèse 10:1, 8-10; 11:1-9.

Azo ti kua ayeke sara mbeni kota tour


Ahundango tënë

  • Nimrod ayeke zo wa? Nzapa abâ lo lani tongana nyen?
  • Na lê ti foto ni, azo ayeke pika brique ti sara na nyen?
  • Ngbanga ti nyen lekengo tour ni anzere na Jéhovah pëpe?
  • Nzapa asara nyen ti tene kusala ti lekengo tour ni aluti?
  • A iri kodoro ni nyen? Nda ti iri so aye ti tene nyen?
  • Nyen la asi na azo ni na peko ti so Nzapa asara si ala tene ayanga ti kodoro nde nde?

Ambeni hundango tënë

  • Diko Genèse 10:1, 8-10.

    Sarango ye ti tere ti Nimrod ayeke lani tongana nyen? Ye so apusu e ti sara hange na nyen? (aProv. 3:31).

  • Diko Genèse 11:1-9.

    Ye wa ayeke lani na bê ti azo so aleke tour so? Ngbanga ti nyen kusala ti ala ni alingbi gi ti tï na ngu? (Gen. 11:4; aProv. 16:18; Jean 5:44).