Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Mbeti ti ambaï ti yâ ti Bible

11: Kozo kongo

11: Kozo kongo

MO HINGA kozo ye so Noé asara tongana lo na sewa ti lo asigigi na yâ ti arche ni? Lo mû sandaga wala matabisi na Nzapa. Bâ lo na sarango tongaso na lê ti foto so. Noé amû sandaga ti anyama na Nzapa ti mû merci na lo ndali ti so lo sö fini ti lo na ti sewa ti lo na yâ ti Kota Moa.

Arche na mbeni kongo

Ti mo, bê ti Jéhovah anzere na sandaga so Noé amû na lo? En, bê ti lo anzere. Ni la, lo mû yanga na Noé so lo yeke futi sese mbeni pëpe na lege ti mbeni kota moa.

Kete na pekoni, sese ni kue ahule, na Noé na sewa ti lo akomanse mbeni fini nde na gigi ti arche ni. Nzapa airi tënë nzoni na ndo ti ala, lo tene: ‘Ala dü amolenge mingi! Ala wu mingi juska ala si singo na lê ti sese kue!’

Me na pekoni, tongana azo amä tënë ti Kota Moa, mbeto ti tene mara ti ye tongaso asi alingbi ti sara ala. Tongaso, Nzapa afa na ala mbeni ye so na bango ni ala yeke dabe ti ala ande na yanga so lo mû ti futi mbeni pëpe sese kue na lege ti mbeni kota moa. Mo hinga ye so lo mû na azo ti dabe ti ala na ni? A yeke mbeni kongo (wala arc-en-ciel).

Noé na sewa ti lo

Mo yeke bâ kongo na lê ti nduzu tongana ngu-nzapa ahunzi ti pika. Kongo alingbi ti duti na anzoroko mingi. Mo bâ mbeni kongo awe? Mo bâ kongo na lê ti foto so?

Bâ tënë so Nzapa atene: ‘Mbi mû yanga so a yeke futi mbeni pëpe azo na anyama na lege ti kota moa. Mbi zia kongo na lê ti nduzu. Tongana kongo asigigi, mbi yeke bâ ni na mbi yeke dabe ti mbi na yanga so mbi mû.’

Tongaso, tongana mo bâ mbeni kongo na lê ti nduzu, mo yeke dabe ti mo na nyen? Na yanga so Nzapa amû ti futi azo mbeni pëpe na lege ti kota moa.

Genèse 8:18-22; 9:9-17.



Ahundango tënë

  • Tongana ti so foto ni afa, kozo ye so Noé asara tongana lo sigigi na yâ ti arche ayeke nyen?
  • Nzapa atene na Noé nga na sewa ti lo ti sara nyen na peko ti Kota Moa ni?
  • Nzapa amû lani yanga ti sara nyen?
  • Tongana e bâ mbeni kongo, wala arc-en-ciel, a lingbi ye so adabe ti e na nyen?

Ambeni hundango tënë

  • Diko Genèse 8:18-22.

    Tongana nyen e lingbi ti mû laso na Jéhovah mbeni ye so ‘afun nzoni’ na hôn ti lo? (Gen. 8:21; aHéb. 13:15, 16).

    Jéhovah atene so bê ti zo ayeke tongana nyen? Tongaso, a lingbi e sara hange na nyen? (Gen. 8:21; Mat. 15:18, 19).

  • Diko Genèse 9:9-17.

    Mbele wa Jéhovah ate na acréature kue ti sese? (Gen. 9:10, 11).

    Mbele ti kongo ayeke ngbâ teti ngoi kue? (Gen. 9:16).