Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible alingbi ti fa nyen na e?

 CHAPITRE MIOMBE

Royaume ti Nzapa ayeke nyen?

Royaume ti Nzapa ayeke nyen?

1. Sambela wa la azo ahinga ni mingi so e yeke sara tënë na ndö ni fadeso?

AZO kutu mingi ahinga sambela so a iri ni Babâ ti e so mo yeke na yayu. Jésus atene sambela so ti fa na adisciple ti lo tongana nyen ti sambela. Nyen la lo sambela lani ndali ni? Ngbanga ti nyen la sambela so ayeke kota mingi ndali ti e laso?

2. Akpengba ye ota wa la Jésus afa na e ti sambela ndali ni?

2 Jésus atene: “A lingbi ala sambela tongaso: ‘Babâ ti e so mo yeke na yayu, zia a sara si iri ti mo aga nzoni-kue. Zia Royaume ti mo aga. Zia a sara ye so bê ti mo aye, na yayu legeoko nga na ndö ti sese.’” (Diko Matthieu 6:9-13.) Ngbanga ti nyen la Jésus afa na e ti sambela ndali ti aye ota so?​—Bâ Kete tënë 20.

3. Nyen la e yeke na bezoin ti hinga na ndö ti Royaume ti Nzapa?

3 E hinga awe so iri ti Nzapa ayeke Jéhovah. Nga e sara tënë awe na ndö ti ye so Nzapa aye ndali ti azo nga ndali ti sese. Me Jésus aye ti tene nyen tongana lo tene: “Zia Royaume ti mo aga”? E yeke bâ ande Royaume ti Nzapa ayeke nyen? Nyen la Royaume ni ayeke sara ande? Nga tongana nyen la Royaume ni ayeke sara si iri ti Nzapa aga nzoni-kue?

ROYAUME TI NZAPA AYEKE NYEN?

4. Royaume ti Nzapa ayeke nyen? Gbia ti Royaume ni ayeke zo wa?

4 Jéhovah azia gere ti mbeni gouvernement na yayu na lo soro Jésus ti duti Gbia ni. Bible airi gouvernement so Royaume ti Nzapa. Jésus ayeke “Gbia ti ala so akomande  tongana agbia nga Seigneur ti ala so akomande tongana aseigneur”. (1 Timothée 6:15). Jésus ayeke na ngangu ti sara anzoni ye mingi ahon azo kue so akomande tongana agbia, nga tongana a bungbi azo kue so akomande oko Jésus ayeke na ngangu mingi ahon ala.

5. Gouvernement ti Nzapa ayeke na ndo wa? A yeke komande na ndö ti nyen?

5 Lango bale-osio na peko ti so a zingo Jésus na kuâ, lo kiri na yayu. Na nda ni, Jéhovah azia lo Gbia ti Royaume ni (Kusala 2:33). Gouvernement ti Nzapa ayeke na yayu na ayeke komande ande na ndö ti sese (Apocalypse 11:15). Ndani la Bible airi Royaume ti Nzapa mbeni ‘Royaume ti yayu.’​—2 Timothée 4:18.

6, 7. Nyen la asara si Jésus ayeke Gbia so ayeke nzoni mingi ahon azo kue so akomande tongana agbia?

6 Bible atene so Jésus ayeke Gbia so ayeke kota ahon azo kue so akomande tongana gbia ndali ti so “gï lo oko ayeke na fini so alingbi ti hinga kuâ pëpe”. (1 Timothée 6:16). Azo kue so akomande ayeke kui, me Jésus ayeke kui ande lâ oko pëpe. Aye ti nzoni kue so Jésus ayeke sara ande ndali ti e ayeke ngbâ lakue lakue.

7 Mbeni prophétie ti Bible atene so Jésus ayeke duti mbeni Gbia so ayeke sara ye na azo na lege ni nga lo yeke bâ mawa ti zo. Bible atene: “Yingo ti Jéhovah ayeke duti na ndö ti lo. Yingo ni ayeke sara si lo duti zo ti ndara nga lo hinga nda ti ye. Yingo ni ayeke sara si lo hinga ti mû wango nga lo yeke ngangu. Yingo ni ayeke sara si lo hinga ndo nga lo kpe mbeto ti Jéhovah. Kpengo mbeto ti Jéhovah ayeke nzere ande na lo mingi. Lo yeke fâ ngbanga pëpe na lege ti ye so lê ti lo abâ, nga lo yeke suku [wala, lo yeke mû wango na zo] pëpe gï ndali ti tënë so lo mä mango. Lo yeke fâ ngbanga ti azo ti mawa [wala, ti awayere]  na lege ni.” (Ésaïe 11:2-4). Mo ye ti tene gbia ti mo aduti tongaso?

8. E hinga tongana nyen so Jésus ayeke komande ande gï lo oko ape?

8 Nzapa asoro ambeni zo ti komande legeoko na Jésus na yâ ti gouvernement so ayeke na yayu. Na tapande, bazengele Paul atene lani na Timothée, atene: “Tongana e ngbâ ti gbu ngangu, e yeke komande ande legeoko na lo nga tongana agbia.” (2 Timothée 2:12). Azo oke la ayeke komande ande legeoko na Jésus tongana agbia?

9. Azo oke la ayeke komande ande legeoko na Jésus? Lawa la Nzapa akomanse ti soro ala?

9 Tongana ti so e manda na chapitre 7, na yâ ti mbeni vision, a fa na bazengele Jean Jésus so ayeke Gbia na yayu, lo na ambeni gbia 144 00. Agbia 144 00 so ayeke azo wa? Jean afa so “a sû iri ti lo [Jésus] na iri ti Babâ ti lo na ndö ti lê ti ala.” Lo kiri lo tene: “A yeke azo so angbâ gï ti mû peko ti Molenge ti taba ni [so ti tene Jésus] atâa lo gue na ndo wa. A vo lani azo so na popo ti azo ti sese.” (Diko Apocalypse 14:1, 4.) Azo 144 00 ayeke aChrétien so ayeke be-ta-zo, so Nzapa asoro ala ti “komande tongana agbia na ndö ti sese” legeoko na Jésus. Tongana ala kui, a yeke zingo ala ti wara fini na yayu (Apocalypse 5:10). Ngbene ye na ngoi ti abazengele ti ga na ni, Jéhovah ayeke soro aChrétien so ayeke be-ta-zo ti duti azo so ayeke agbia.

10. Jéhovah aleke ti tene Jésus na agbia 144 00 akomande na ndö ti azo. Ngbanga ti nyen la a yeke sarango ye na ndoye la?

10 Jéhovah ayeke pensé na e mingi ni la lo leke ti tene azo ti sese akomande legeoko na Jésus. Jésus ayeke duti ande nzoni zo ti komande ndali ti so lo hinga atënë ti bê ti e nzoni mingi. Lo nga kue lo yeke lani zo nga lo bâ pasi. Paul atene so Jésus ahinga atënë ti bê ti e, lo lingbi ti “bâ mawa ti e na ando so e woko dä” na “a tara lo na yâ  ti aye kue legeoko tongana e”. (aHébreu 4:15; 5:8). Agbia 144 000 nga kue ayeke azo. Ala kue atiri lani na awokongo nga ala kue terê ti ala ason lani. Tongaso, e yeke na confiance so Jésus na agbia 144 000 ayeke hinga ande gï pëpe atënë ti bê ti e nzoni mingi me ala yeke hinga nga akpale ti e.

NYEN LA ROYAUME TI NZAPA AYEKE SARA ANDE?

11. Ngbanga ti nyen la Jésus afa lani na adisciple ti lo ti sambela ti tene a sara na yayu ye so bê ti Nzapa aye?

11 Jésus afa na adisciple ti lo ti sambela ti tene a sara na yayu ye so bê ti Nzapa aye. Ngbanga ti nyen? Na chapitre 3, e manda so Satan Zabolo asara kpengbango-li na Jéhovah. Na peko ti kpengbango-li ti Satan, Jéhovah azia lege na lo nga na a-ange so ayeke be-ta-zo pëpe, wala asioni yingo, ti ngbâ na yayu teti mbeni ngoi. Tongaso, a yeke pëpe a-ange kue so ayeke na yayu la ayeke sara lani ye so bê ti Nzapa aye. Na chapitre 10, e yeke manda ande ye mingi na ndö ti Satan na asioni yingo.

12. Akpengba ye use wa la a sara tënë ni na Apocalypse 12:10?

12 Bible afa so kete na peko ti so a yeke zia Jésus Gbia ti Royaume ti Nzapa, lo yeke sara bira na Satan. (Diko Apocalypse 12:7-10.) Versê 10 asara tënë ti akpengba ye use. Royaume ti Nzapa akomanse ti komande, na Jésus la ayeke Gbia ni, nga a tomba Satan na yayu a bi lo na sese. Tongana ti so e yeke bâ ande, aye ni so asi awe.

13. Nyen la apassé na yayu na peko ti so a tomba Satan kâ?

13 Bible afa ngia ti a-ange be-ta-zo na peko ti so a tomba Satan na asioni yingo ti lo na yayu. Bible atene: “Ala duti na ngia, ayayu na ala so ayeke kâ!” (Apocalypse 12:12). Fadeso tâ siriri na beoko ayeke na yayu ndali ti so ala kue so ayeke kâ ayeke sara ye so bê ti Nzapa aye.

Ngbene ye na ngoi so a tomba Satan na asioni yingo ti lo na yayu, pasi ayeke mingi na ndö ti sese. Apasi so aga nduru ti hunzi awe

14. Nyen la apassé na ndö ti sese ndali ti so a tomba Satan na yayu?

 14 Me gigi ti azo na sese ayeke ti lo nde mingi.Aye ti ngangu ayeke si na azo “ngbanga ti so Zabolo adescend na mbage ti ala” na lo yeke na “kota ngonzo, ndali ti so lo hinga so lo yeke na ngoi mingi pëpe.” (Apocalypse 12:12). Ngonzo asara Satan ngangu. A tomba lo na yayu na lo hinga so a ga nduru ti futi lo awe. Lo sara ye kue so lo lingbi ti sara ti ga na kpale nga na pasi na ndö ti sese kue.

15. Ye so bê ti Nzapa aye ndali ti sese ayeke nyen?

15 Me ye so Nzapa aye ndali ti sese achangé pëpe. Lo ngbâ ti ye lakue ti tene azo so ayeke mbilimbili-kue aduti na fini lakue lakue na yâ ti paradis na ndö ti sese (Psaume 37:29). Tongaso, tongana nyen la Royaume ti Nzapa ayeke sara ande ni?

16, 17. Nyen la Daniel 2:44 afa na e na ndö ti Royaume ti Nzapa?

16 Prophétie so ayeke na Daniel 2:44 atene: “Na ngoi ti agbia so, Nzapa ti yayu ayeke sigi na mbeni royaume so a yeke futi ni lâ oko pëpe. Royaume ni ayeke gue na ambeni zo nde pëpe. Royaume ni so ayeke neka aroyaume so kue nga ayeke futi ala biaku biaku, na gï royaume so oko la ayeke ngbâ lakue lakue.” Prophétie so afa na e nyen na ndö ti Royaume ti Nzapa?

17 Kozoni, a fa na e so Royaume ti Nzapa ayeke komanse ti komande “na ngoi ti agbia so”. So a ye ti tene so ambeni gouvernement ayeke ngbâ na sese na ngoi so Royaume ni ayeke komanse ti komande. Use ni, a fa na e so Royaume ti Nzapa ayeke ngbâ lakue lakue na mbeni gouvernement nde ayeke mû place ni pëpe. Ota ni, Royaume ti Nzapa ayeke sara bira na agouvernement ti dunia so. Royaume ti Nzapa ayeke sö benda ande na Royaume ni ayeke ga oko gouvernement so ayeke komande na ndö ti sese kue. Na pekoni, azo ayeke wara ande  mbeni nzoni gouvernement so lâ oko ade ala wara ni pëpe.

18. Iri ti ndangba bira so Royaume ti Nzapa ayeke sara ande na agouvernement ti dunia so ayeke nyen?

18 Royaume ti Nzapa ayeke komande ande na ndö ti sese kue tongana nyen? Kozo na ndangba bira, so a iri ni bira ti Harmaguédon, asioni yingo ayeke handa ande “agbia ti sese kue so azo ayeke dä, ti bungbi ala oko ndali ti bira ti kota lâ ti Nzapa, Lo so ngangu ti lo ahon angangu kue.” Biani, agouvernement ti dunia so ayeke sara bira ande na Royaume ti Nzapa.​—Apocalypse 16:14, 16; bâ Kete tënë 10.

19, 20. Ngbanga ti nyen la e yeke na bezoin ti tene Royaume ti Nzapa akomande sese?

19 Ngbanga ti nyen la e yeke na bezoin ti Royaume ti Nzapa? E yeke na araison ota tongaso. Kozoni, siokpari ayeke na terê ti e, tongaso e yeke tï kobela na e yeke kui. Me Bible atene so na gbe ti Royaume ti Nzapa, e yeke duti ande na fini lakue lakue. Jean 3:16 atene: “Nzapa andoye tâ azo ti dunia so mingi si lo mû gï oko Molenge ti lo si zo kue so amä na bê na lo, a lingbi ti futi lo pëpe, me lo yeke na fini ti lakue lakue.”

20 Use raison so ndali ni e yeke na bezoin ti Royaume ti Nzapa ayeke so e yeke na popo ti azo ti sioni. Azo mingi ayeke tene mvene, ala yeke handa amba ti ala nga ala yeke sara lango-sioni. E lingbi pëpe ti sara mbeni ye ti zi ala, me Nzapa ayeke zi ande ala. A yeke futi ande azo so angbâ ti sara asioni ye na ngoi ti Harmaguédon. (Diko Psaume 37:10.) Ota raison so ndali ni e yeke na bezoin ti Royaume ti Nzapa ayeke so agouvernement ti azo ayeke na ngangu pëpe, ala yeke sara sioni mingi na azo, wala ala ye tënë ti goro mingi. Ala ye pëpe ti mû maboko na azo ti mä yanga  ti Nzapa. Bible atene so “komandema ti zo na ndö ti mba ti lo aga gï na sioni na mba ti lo ni.”​—Zo-ti-fa-tene 8:9.

21. Tongana nyen la Royaume ti Nzapa ayeke sara ande kue ti tene a sara na sese ye so bê ti Nzapa aye?

21 Na peko ti Harmaguédon, Royaume ti Nzapa ayeke sara kue ti tene a sara na sese ye so bê ti Nzapa aye. Na tapande, a yeke zi ande Satan na asioni yingo ti lo (Apocalypse 20:1-3). Na nda ni, zo oko ayeke tï kobela pëpe wala ayeke kui pëpe. Ndali ti ye so a futa ti zi azo, azo kue so ayeke be-ta-zo ayeke duti na fini lakue lakue na yâ ti Paradis (Apocalypse 22:1-3). Royaume ti Nzapa ayeke sara ande si iri ti Nzapa aga nzoni-kue. Ye so aye ti tene nyen? A ye ti tene na ngoi so gouvernement ti Nzapa ayeke komande na ndö ti sese, azo kue ayeke ne ande iri ti Jéhovah.​—Bâ Kete tënë 21.

JÉSUS AGA GBIA LAWA?

22. E hinga tongana nyen so Jésus aga lani Gbia pëpe na ngoi so lo yeke na sese wala hio na peko ti so a zingo lo na kuâ?

22 Jésus afa lani na adisciple ti lo ti sambela tongaso: “Zia Royaume ti mo aga.” Tongaso, a yeke lani polele so gouvernement ti Nzapa ayeke ga ande. Kozoni, Jéhovah ayeke zia gere ti Royaume ni na lo yeke zia Jésus Gbia ti  Royaume ni. Gï na peko ti so Jésus akiri na yayu lani la si a zia lo Gbia? Ên-ën, a lingbi lo ku si. Ambeni ngoi na peko ti so a zingo Jésus na kuâ, Pierre na Paul afa ni polele na ngoi so ala sara kua na prophétie so ayeke na Psaume 110:1 na ndö ti Jésus. Na yâ ti prophétie ni Jéhovah atene: “Mo duti na mbage ti maboko ti mbi ti koli, juska mbi zia awato ti mo tongana mbata ti gere ti mo.” (Kusala 2:32-35; aHébreu 10:12, 13). Jésus ayeke ku lani ngu oke kozo si Jéhovah azia lo Gbia?

Royaume ti Nzapa ayeke sara ande kue ti tene a sara na sese ye so bê ti Nzapa aye

23. (a) Lawa la Jésus akomanse ti komande tongana Gbia ti gouvernement ti Nzapa? (b) Nyen la e yeke manda na yâ ti chapitre ti peko?

23 Angu mingi kozoni na ngu 1914, ambeni Chrétien so aye Nzapa ahinga lani so ngu 1914 ayeke duti mbeni kpengba ngu na yâ ti prophétie ti Bible. Aye so asi ngbene ye na ngu 1914 ti ga na ni afa so ala yeke lani na raison. Jésus akomanse ti komande na ngu ni so (Psaume 110:2). Hio na pekoni, a bi Satan na sese, na laso “lo yeke na ngoi mingi pëpe.” (Apocalypse 12:12). Na yâ ti chapitre ti peko e yeke bâ ande aye mingi so afa so e yeke na yâ ti ngoi ni so. E yeke manda nga ande so Royaume ti Nzapa aga nduru awe ti sara kue ti tene a sara na sese ye so bê ti Nzapa aye.​—Bâ Kete tënë 22.