Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible alingbi ti fa nyen na e?

 CHAPITRE OMENE

Tongana e kui, e yeke gue na ndo wa?

Tongana e kui, e yeke gue na ndo wa?

1-3. Atënë wa la azo ayeke hunda terê ti ala na ni na ndö ti kuâ? Ambeni bungbi ti nzapa akiri tënë na ala tongana nyen?

BIBLE amû zendo na e atene so mbeni lâ “kuâ ayeke duti ande dä mbeni pëpe”. (Apocalypse 21:4). Na chapitre 5, e manda so ye so a futa ti zi azo asara si e yeke na beku ti fini ti lakue lakue. Me azo angbâ ti kui (Zo-ti-fa-tene 9:5). Tongaso, e yeke hunda terê ti e na mbeni kpengba hundango tënë: ‘Nyen la ayeke si na e tongana e kui?’

2 Tongana mbeni zo so e ye lo mingi akui, e ye mingi ti hinga kiringo tënë ni. Peut-être e yeke hunda terê ti e, e tene: ‘Lo gue na ndo wa? Lo yeke bâ e? Lo lingbi ti mû maboko na e? E yeke kiri ti bâ lo mbeni lâ?’

3 Abungbi ti nzapa akiri tënë na ahundango ndo so na alege nde nde. Ambeni afa so tongana mo yeke nzoni zo, mo yeke gue na yayu me tongana mo yeke sioni zo, mo yeke gbi na yâ ti enfer. Ambeni atene so tongana mo kui, mo yeke ga mbeni yingo nga mo yeke wara terê na afami ti mo so akui kozo na mo. Ambeni atene ti ala so tongana mo kui si a fâ ngbanga na li ti mo awe, a yeke kiri ti dü mo, wala mo yeke kiri na fini na mbeni terê nde, peut-être tongana mbeni zo nde wala même mbeni nyama.

4. Oko pensé wa la abungbi ti nzapa afa na ndö ti kuâ?

4 Mo bâ mo tene abungbi ti nzapa afa aye nde nde. Me mingi ti ala afa gï oko pensé. Ala fa so tongana mbeni zo akui, mbeni ye ti terê ti lo angbâ na fini. Tënë so ayeke tâ tënë?

 TONGANA E KUI, E YEKE GUE NA NDO WA?

5, 6. Tongana e kui, nyen la ayeke si na e?

5 Jéhovah ahinga ye so ayeke si na e tongana e kui na lo tene na e so tongana mbeni zo akui, fini ti lo ahunzi. Tongaso, tongana mbeni zo akui, atënë ti bê ti lo nga na aye kue so ayeke na yâ ti li ti lo angbâ pëpe. * Tongana e kui, e lingbi ti bâ ndo pëpe, ti mä ndo pëpe nga e lingbi ti gbu li ti e encore pëpe.

6 Gbia Salomon atene so “azo so akui awe ahinga ti ala ye oko pëpe”. Akuâ alingbi pëpe ti ye zo wala ti ke zo, nga “na yâ ti Dû ti kuâ,  . . . kusala, lekengo kapa ti sara ambeni ye, hingango ye wala ndara ayeke dä pëpe.” (Diko Zo-ti-fa-tene 9:5, 6, 10). Nga, na Psaume 146:4, Bible atene na e so tongana mbeni zo akui, “apensé ti lo akui.”

YE SO JÉSUS ATENE NA NDÖ TI KUÂ

Jéhovah aleke azo ti ngbâ na fini lakue lakue na ndö ti sese

7. Jésus atene nyen lani na ndö ti kuâ?

7 Tongana Lazare, kota kamarade ti Jésus, akui lani, Jésus atene na adisciple ti lo: “Kamarade ti e Lazare alango.” Me Jésus aye ti tene lani pëpe so Lazare ayeke wu terê ti lo. Jésus akiri atene: “Lazare akui awe.” (Jean 11:11-14). Tongaso, Jésus ahaka kuâ lani na lango. Lo tene pëpe so Lazare ague lani na yayu wala na mbeni ndo so afami ti lo so akui kozo na lo ayeke dä. Lo tene nga pëpe so Lazare ayeke bâ pasi lani na enfer wala a kiri a dü lo tongana mbeni zo nde wala tongana mbeni nyama. A yeke lani mo bâ mo tene Lazare ayeke na yâ ti kota lango. Ambeni versê ahaka kuâ na kota lango. Bible atene so tongana a fâ Étienne lani, lo “lango na yâ ti kuâ.” (Kusala 7:60,  kete tënë na gbe ni.) Bazengele Paul atene nga so ambeni Chrétien “alango na yâ ti kuâ.”​—1 aCorinthien 15:6, kete tënë na gbe ni.

8. E hinga tongana nyen so Nzapa aleke azo ti tene ala kui pëpe?

8 Nzapa aleke lani Adam na Ève ti tene na nda ni ala kui? Ên-ën. Jéhovah aleke lani ala ti tene ala duti na fini ti lakue lakue nga na nzoni seni. Na ngoi so Jéhovah aleke azo lani, lo zia nzara ti fini ti lakue lakue na yâ ti ala (Zo-ti-fa-tene 3:11). Ababâ na amama aye pëpe ti tene amolenge ti ala aga mbakoro na ala kui, Jéhovah ayeke pensé nga tongaso na ndö ti e. Me tongana Nzapa aleke e ti ngbâ na fini lakue lakue, ka ngbanga ti nyen la e yeke kui?

 E YEKE KUI NGBANGA TI NYEN?

9. Ngbanga ti nyen la commandement so Jéhovah amû na Adam na Ève ayeke na lege ni?

9 Na yaka ti Éden, Jéhovah atene lani na Adam, atene: “Mo lingbi ti te lê ti akeke kue ti yaka ni alingbi na nzara ti mo. Me ti keke ti hingango nzoni na sioni, mo te lê ni pëpe, teti na lango so mo te ni, ti tâ tënë ni mo yeke kui.” (Genèse 2:9, 16, 17). Commandement so ayeke polele na ayeke ngangu pëpe ti sara ye alingbi na ni, nga Jéhovah ayeke na droit ti tene na Adam na Ève ye so ayeke nzoni na ye so ayeke sioni. Tongana ala mä yanga ti Jéhovah, ala yeke fa na lo so ala ne komandema ti lo. Ala yeke fa nga na lo so ala kiri singila na lo mingi ndali ti aye kue so lo mû lani na ala.

10, 11. (a) Tongana nyen la Satan asara si Adam na Ève ake yanga ti Nzapa? (b) Ngbanga ti nyen la mbeni raison ayeke dä pëpe ndali ti ye so Adam na Ève asara lani so?

10 Mawa ni ayeke so Adam na Ève asoro lani ti ke yanga ti Jéhovah. Satan ahunda Ève, atene: “Tâ tënë, Nzapa atene ala te lê ti akeke kue ti yaka so ape?” Ève atene: “E lingbi ti te lê ti akeke ti yaka ni. Me ti lê ti keke so ayeke na milieu ti yaka ni, Nzapa atene na e, atene: ‘Ala te ni pëpe, ala ndu nga ni pëpe ngbanga ti ala kui.’”​—Genèse 3:1-3.

11 Na pekoni, Satan atene: “Ti tâ tënë ni, ala yeke kui pëpe. Nzapa ahinga so gï na lango so ala yeke te ni, lê ti ala ayeke zi, na ala yeke ga tongana Nzapa, ala yeke hinga ye ti nzoni na ye ti sioni.” (Genèse 3:4-6). Satan aye lani ti tene Ève abâ so lo wani lo lingbi ti mû desizion na ndö ti ye so ayeke nzoni na ye so ayeke sioni. Na oko ngoi ni, lo tene mvene na ndö ti ye so ayeke si tongana Ève ake yanga ti Nzapa. Satan atene so Ève ayeke kui pëpe, tongaso, Ève ate mbeni lê ti keke ni nga lo mû mbeni na koli ti lo. Adam na Ève ahinga lani so Jéhovah atene na ala ti te lê ti keke ni  pëpe. Na ngoi so ala te ni, ala soro ti ke ti sara ye alingbi na commandement so ayeke polele nga ayeke na lege ni so. So ala te ni, ala fa so ala ne pëpe Babâ ti ala ti yayu so aye ala mingi. Mbeni raison ayeke dä pëpe ndali ti ye so ala sara so.

12. Ngbanga ti nyen a yeke tâ ye ti vundu so Adam na Ève ake lani yanga ti Jéhovah?

12 A yeke ye ti vundu so kozo babâ na mama ti e ane pëpe Zo so asara ala. A yeke sara mo tongana nyen tongana mo sara kue ti bata molenge ti mo ti koli na ti wali, na pekoni ala sara kpengbango-li na terê ti mo na ala sara tâ gï ye so mo ke na ala ti sara? A yeke zia vundu na bê ti mo ape?

A sara Adam na fuku ti sese na lo kiri na fuku ti sese

13. Jéhovah aye lani ti tene nyen tongana lo tene “mo yeke kiri ande na fuku ti sese”?

13 Na ngoi so Adam na Ève ake yanga ti Nzapa, ala girisa pasa ti duti na fini lakue lakue. Jéhovah atene lani na Adam, atene: “Mo yeke fuku ti sese, na mo yeke kiri ande na fuku ti sese.” (Diko Genèse 3:19.) So aye ti tene Adam ayeke kiri ti ga fuku ti sese mo bâ mo tene lo yeke lani dä pëpe (Genèse 2:7). Na peko ti so Adam asara lani siokpari, lo kui na lo yeke dä encore ape.

14. Ngbanga ti nyen la e yeke kui?

14 Tongana fade Adam na Ève amä yanga ti Nzapa, ka laso ala ngbâ na  fini. Me na ngoi so ala ke yanga ti lo, ala sara siokpari na yeke yeke ala kui na nda ni. Siokpari ayeke tongana mbeni sioni kobela so e wara na lege ti kozo babâ na mama ti e. A dü e kue na siokpari ndani la e yeke kui (aRomain 5:12). Me a yeke lani ye so Nzapa aleke na bê ti lo ti sara ndali ti azo la pëpe. Nzapa aye lâ oko pëpe ti tene azo akui, na Bible atene kuâ ayeke mbeni “wato”.​—1 aCorinthien 15:26.

TÂ TËNË AZI E

15. Tâ tënë na ndö ti akuâ azi e tongana nyen?

15 Tâ tënë na ndö ti akuâ azi e na gbe ti atënë mingi so ayeke na lege ni pëpe. Bible afa na e so akuâ ayeke bâ pasi pëpe wala vundu ayeke sara ala pëpe. E lingbi ti sara tënë na ala pëpe na ala lingbi ti sara tënë na e pëpe. E lingbi ti mû maboko na akuâ pëpe na ala lingbi nga ti mû maboko na e pëpe. Ala lingbi ti sara sioni na e pëpe, tongaso e bezoin ti sara mbeto ti ala pëpe. Ye oko, mingi ti abungbi ti nzapa atene na e so akuâ ayeke na fini na mbeni ndo na e lingbi ti mû maboko na ala tongana e futa nginza na aprêtre wala na akoli so abâ ala tongana asaint. Me tongana e hinga tâ tënë na ndö ti akuâ, atënë ti mvene so ayeke handa e pëpe.

16. Tënë ti mvene wa la abungbi ti nzapa afa na ndö ti akuâ?

16 Satan asara kua na abungbi ti nzapa ti wataka ti tene na e mvene nga ti sara si e pensé so akuâ angbâ na fini. Na tapande, ambeni bungbi ti nzapa afa so tongana e kui, mbeni ye ti terê ti e angbâ na fini na mbeni ndo. Bungbi ti nzapa ti mo afa na mo tongaso? Wala a fa na mo ye so Bible afa na ndö ti akuâ? Satan atene amvene ti gboto azo yongoro na Jéhovah.

17. Ngbanga ti nyen la tënë so atene azo ayeke gbi na yâ ti enfer ayeke zongango Jéhovah la?

17 Aye mingi so abungbi ti nzapa afa ayeke ye ti songo  bê. Na tapande, ambeni afa so asioni zo ayeke gbi lakue lakue na yâ ti enfer. Mvene so ayeke zongango Jéhovah la. Lo yeke zia lâ oko pëpe ti tene azo abâ mara ti pasi tongaso. (Diko 1 Jean 4:8.) Mo yeke tene nyen na ndö ti mbeni zo so apunir molenge ti lo na zongo maboko ti molenge ni na wâ? Mo yeke tene so lo yeke tâ sioni mingi. Mo yeke sara nzara ti hinga lo pëpe. A yeke tâ gï ye so Satan aye ti tene e pensé na ndö ti Jéhovah la.

18. A lingbi e sara mbeto ti akuâ pëpe ngbanga ti nyen?

18 Ambeni bungbi ti nzapa atene na e so tongana azo akui, ala yeke ga ayingo. Abungbi ni so afa so a lingbi e ne ayingo so nga e sara mbeto ti ala ndali ti so ala lingbi ti ga akamarade so ayeke ngangu mingi wala ala lingbi ti ga asioni wato. Azo mingi amä na bê na mvene so. Ala yeke sara mbeto ti akuâ tongaso ala yeke voro ala ahon ti voro Jéhovah. Dabe ti mo so akuâ alingbi ti hinga songo ti ye wala nzerengo ti ye oko pëpe tongaso e bezoin ti sara mbeto ti ala pëpe. Jéhovah la ayeke Zo so asara e. Lo yeke tâ Nzapa, nga a lingbi e voro gï lo.​—Apocalypse 4:11.

19. Tongana e hinga tâ tënë na ndö ti akuâ, a yeke mû maboko na e tongana nyen?

19 Tongana e hinga tâ tënë na ndö ti akuâ, a yeke zi e na gbe ti amvene ti abungbi ti nzapa. Nga, tâ tënë so ayeke mû maboko na e ti hinga apendere zendo so Jéhovah amû na ndö ti fini ti e nga na kekereke ti e.

20. Nyen la e yeke bâ na yâ ti chapitre ti peko?

20 Angu mingi kozo, mbeni wakua ti Nzapa so iri ti lo ayeke Job ahunda ndo, atene: “Tongana mbeni zo akui, lo lingbi ti kiri na fini?” (Job 14:14). Mbeni zo so akui awe alingbi biani ti kiri na fini? Kiringo tënë ti Nzapa so ayeke na yâ ti Bible azia ngia mingi na bê ti zo. E yeke bâ ni na yâ ti chapitre ti peko.

^ par. 5 Ambeni zo amä na bê so tongana mbeni zo akui, âme ti lo wala yingo ti lo angbâ na fini. Ti hinga ambeni tënë na ndö ni, bâ Kete tënë 17 na 18.