Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible alingbi ti fa nyen na e?

 CHAPITRE BALE-OKO NA OKO

Ngbanga ti nyen la pasi ayeke mingi tongaso?

Ngbanga ti nyen la pasi ayeke mingi tongaso?

1, 2. Azo mingi ahunda terê ti ala na tënë wa?

LÂ NA LÂ, e yeke mä tënë ti aye ti vundu nde nde so ayeke si na yâ ti dunia. Na tapande, e yeke mä a tene mbeni kota ngu asuku amû ndo na abuba mbeni kete kodro. Mbeni koli apika ngombe na yâ ti mbeni eglize, gbâ ti azo awara kä na ambeni akui. Mbeni mama akui gï hio tongaso na lo zia amolenge oku na peko ti lo.

2 Na ngoi so mara ti ye ti vundu tongaso asi, azo mingi ayeke hunda terê ti ala: “Ngbanga ti nyen aye ni asi tongaso?” Azo mingi ayeke hunda ndani so dunia so asi singo na kengo terê nga na pasi. Mo kue mo hunda terê ti mo tongaso lâ oko awe?

3, 4. (a) Habakuk ahunda lani atënë wa? (b) Jéhovah akiri lani tënë na lo tongana nyen?

3 Bible afa so ambeni koli so ayeke na kpengba mabe na Nzapa ahunda nga lani mara ti ahundango ndo so. Na tapande, prophète Habakuk ahunda lani Jéhovah, atene: “Ngbanga ti nyen la mo sara si mbi bâ ye ti sioni? Nga ngbanga ti nyen la mo kanga lê ti mo na ndö ti pasi so azo ayeke sara na amba ti ala? Ngbanga ti nyen la mbi yeke bâ futingo aye nga sarango ye ti ngangu na zo na lê ti mbi tongaso so? Ngbanga ti nyen la papa nga na tiri asi singo so?”—Habakuk 1:3.

4 Na Habakuk 2:2, 3, Nzapa akiri tënë na ahundango ndo ti Habakuk nga lo mû zendo ti leke aye ni. Jéhovah aye azo mingi. Bible atene: “Lo yeke bi bê ti lo na ndö ti  ala.” (1 Pierre 5:7). Biani, a son Nzapa mingi ahon e ti bâ azo abâ pasi (Ésaïe 55:8, 9). Tongaso, zia e bâ hundango ndo so: Ngbanga ti nyen la pasi ayeke mingi tongaso na yâ ti dunia?

NGBANGA TI NYEN LA PASI AYEKE MINGI?

5. Azo mingi so ayeke fa ye na yâ ti abungbi ti nzapa atene nyen na ndö ti pasi? Bible afa ti lo nyen?

5 Mingi ni, apasteur, aprêtre nga na azo so ayeke fa ye na yâ ti abungbi ti nzapa atene so Nzapa la aye ti tene azo abâ pasi. Ambeni alingbi ti tene so ye kue so asi na zo, so na popo ni mo yeke wara aye ti vundu, Nzapa adiko ni kozo awe na e lingbi ti hinga ndani pëpe. Ambeni atene même so azo, so na popo ni a yeke wara akete molenge, akui tongaso si ala gue na terê ti Nzapa na yayu. Me a yeke tâ tënë pëpe. Jéhovah ayeke sara lâ oko pëpe si ye ti sioni asi. Bible atene: “Lo so ngangu ti lo ahon angangu kue alingbi ti sara sioni pëpe.”—Job 34:10.

6. Ngbanga ti nyen la azo mingi abi tënë na li ti Nzapa ndali ti apasi kue so ayeke na yâ ti dunia?

6 Mingi ti azo abi tënë na li ti Nzapa ndali ti apasi kue so ayeke si na yâ ti dunia ngbanga ti so ala pensé atene Nzapa la akomande dunia ni. Me tongana ti so e bâ na chapitre 3, vrai mokonzi ti dunia so ayeke Satan Zabolo.

7, 8. Ngbanga ti nyen la pasi ayeke mingi na yâ ti dunia?

7 Bible atene: “Dunia so kue ayeke na gbe ti Zo ti sioni.” (1 Jean 5:19). Satan, mokonzi ti dunia so, ayeke sioni mingi. “Lo yeke handa azo na ndö ti sese kue”. (Apocalypse 12:9). Azo mingi asara ye tongana lo. So ayeke mbeni raison so ndali ni mvene, kengo terê nga na sarango sioni na zo asi singo na yâ ti dunia.

8 Mbeni raison nde ayeke nga dä so ndali ni pasi ayeke  mingi na yâ ti dunia. Na peko ti so Adam na Ève asara kpengbango-li, amolenge ti ala awara siokpari ti ala. Nga ndali ti siokpari, azo ayeke sara si amba ti ala abâ pasi. Mingi ni azo aye ti ga kota zo ahon amba ti ala. Ala yeke tiri, ala yeke sara bira nga ala yeke sara aye ti ngangu na amba ti ala (Zo-ti-fa-tene 4:1; 8:9). Na ambeni ngoi azo ayeke bâ pasi “ndali ti so ye so ala ku terê ti ala na ni pëpe” asi na ala (Zo-ti-fa-tene 9:11). Na ngoi so ala duti na mbeni sioni ndo na sioni ngoi, ndao nga na ambeni ye ti sioni alingbi ti si na ala.

9. Ngbanga ti nyen la e yeke na confiance so Jéhovah ayeke na mbeni nzoni raison ti zia si pasi angbâ ti gue?

9 Jéhovah asara lâ oko pëpe si azo abâ pasi. A lingbi a bi tënë pëpe na li ti lo ndali ti bira, sioni ye nga sarango sioni na zo. A yeke pëpe Nzapa la asara si sese ayengi, kota pupu abuba aye wala ngu asuku amû ndo. Me peut-être mo hunda terê ti mo, mo tene: ‘Tongana Jéhovah la ayeke na ngangu ahon azo kue na yâ ti dunia, ka ngbanga ti nyen la lo kanga lege pëpe na aye ti ngangu ti si?’ E hinga so Nzapa abi bê ti lo mingi na e, tongaso lo yeke na mbeni nzoni raison ti zia lege na pasi ti ngbâ ti gue.—1 Jean 4:8.

NDALI TI NYEN LA NZAPA AZIA LEGE NA PASI?

10. Satan agi yanga ti Nzapa tongana nyen?

10 Na yaka ti Éden, Zabolo asara si Adam na Ève ake yanga ti Nzapa. Satan atene so Nzapa ayeke sioni Mokonzi. Lo tene so Nzapa ahonde mbeni nzoni ye na Adam na Ève. Satan aye ti tene ala yeda so lo yeke duti mbeni nzoni mokonzi ahon Jéhovah nga so ala bezoin Nzapa pëpe.—Genèse 3:2-5; bâ Kete tënë 27.

11. Hundango ndo wa la a lingbi e kiri tënë na ni?

 11 Adam na Ève ake yanga ti Nzapa nga ala sara kpengbango-li na lo. Ala pensé lani so ala yeke na droit ti mû desizion ala wani na ndö ti ye so ayeke nzoni na ye so ayeke sioni. Tongana nyen la Jéhovah ayeke fa so azo ti kpengbango-li so ayeke na raison pëpe nga gï lo la lo hinga ye so ayeke nzoni ndali ti e?

12, 13. (a) Ndali ti nyen la Jéhovah afuti azo ti kpengbango-li ni na lê ni lê ni ape? (b) Ndali ti nyen la Jéhovah azia lege na Satan ti duti mokonzi ti dunia so nga lo zia si azo azia na sese agouvernement ti ala wani?

12 Jéhovah afuti Adam na Ève na lê ni lê ni pëpe. Lo zia lege na ala ti dü amolenge. Na pekoni, Jéhovah azia lege na amolenge ti Adam na Ève ti soro zo wa la ala ye ti tene lo duti mokonzi ti ala. Ye so Jéhovah aleke lani na bê ti lo ti sara ayeke ti tene azo so ayeke mbilimbili-kue amû ndö ti sese kue, na ye so ayeke si atâa nyen la Satan agi ti sara.—Genèse 1:28; Ésaïe 55:10, 11.

13 Satan agi yanga ti Jéhovah na lê ti a-ange kutu mingi (Job 38:7; Daniel 7:10). Tongaso, Jéhovah azia ngoi na Satan ti fa wala atënë ti lo ni ayeke tâ tënë. Lo zia nga lege na azo ti zia na sese agouvernement ti ala wani so Satan ayeke fa lege na ni ti bâ wala azo alingbi ti komande nzoni sân mungo maboko ti Nzapa.

14. Aye so asi afa nyen?

14 A sara angu saki mingi awe, azo agi ti komande terê ti ala wani, me ala bi na ngu. A fa so Satan ayeke zo ti mvene. Azo abezoin mungo maboko ti Nzapa. Prophète Jérémie ayeke lani na raison ti tene: “Jéhovah, mbi hinga lege ti zo ayeke na tïtî lo wani pëpe. Zo so ayeke tambela, a yeke même na lo wani ti fa lege na gere ti lo pëpe.”—Jérémie 10:23.

 NDALI TI NYEN LA NZAPA AKU A NINGA TONGASO SO?

15, 16. (a) Ngbanga ti nyen la Jéhovah azia lege na pasi a ninga tongaso? (b) Ngbanga ti nyen la Jéhovah aleke pëpe akpale so Satan aga na ni?

15 Ngbanga ti nyen la Jéhovah azia lege si pasi aninga tongaso so? Ngbanga ti nyen la lo kanga lege pëpe na asioni ye ti si? A hunda ngoi mingi ti fa so Satan abi na ngu. Azo atara mara ti agouvernement nde nde, me ye oko atambela nzoni pëpe. Atâa so awandara asara ngangu ti sara ambeni nzoni ye, fango ngbanga ti kirikiri, yere, sarango sioni na zo nga na bira ague na li ni ahon ti kozo. E lingbi pëpe ti komande terê ti e nzoni sân Nzapa.

16 Ye oko, Jéhovah aleke pëpe akpale so Satan aga na ni. Tongana fade lo sara ni, a yeke fa so lo mû maboko na komandema ti Satan, na lo yeke mû maboko na ni lâ oko pëpe. Nga, azo ayeke pensé so ala lingbi ti komande terê ti ala wani nzoni. Me so ayeke mvene, nga Jéhovah ahinga so azo alingbi ti komande terê ti ala wani nzoni pëpe. Lo yeke tene mvene lâ oko pëpe.—aHébreu 6:18.

17, 18. Nyen la Jéhovah ayeke sara ande na akpale so Satan aga na ni?

17 Jéhovah alingbi ti leke akpale kue so Satan na azo aga na ni? En. Nzapa ayeke na ngangu ti sara ye kue. Jéhovah ahinga na ngoi wa la lo yeke kiri tënë kue na agingo yanga ti Satan. Na pekoni, lo yeke sara si sese aga paradis tongana ti so lo ye lani. A yeke zingo ande azo kue so ayeke na yâ ti “adû ti kuâ”. (Jean 5:28, 29). Azo ayeke tï kobela wala ala yeke kui pëpe. Jésus ayeke leke akpale kue so Satan aga na ni. Jéhovah ayeke sara kua na Jésus “ti futi akusala ti Zabolo.” (1 Jean 3:8). E kiri singila so ti si na ngoi ni so Jéhovah akanga bê na e tongaso si e lingbi ti hinga lo nga ti mû desizion ti tene lo duti Mokonzi ti e. (Diko 2 Pierre 3:9, 10.)  Même na ngoi so e yeke bâ pasi, lo yeke mû maboko na e ti gbu ngangu.—Jean 4:23; diko 1 aCorinthien 10:13.

18 Jéhovah agbu e na ngangu pëpe ti soro lo tongana Mokonzi ti e. Lo mû na e azo matabisi so ayeke liberté ti soro ye. Zia e bâ nda ti pendere matabisi so.

MO YEKE SARA KUA NA LIBERTÉ TI MO TONGANA NYEN?

19. Pendere matabisi wa la Jéhovah amû na e? Ngbanga ti nyen la a lingbi e kiri singila ndali ni?

19 Pendere matabisi so Jéhovah amû na e, so ayeke liberté ti soro ye so e ye, asara si e yeke nde mingi na anyama. Anyama ayeke sara ye gï tongaso, ala yeke na ngangu ti soro ye ti nzoni na ye ti sioni pëpe. Me e yeke soro ye so e ye ti sara na fini ti e nga e yeke mû desizion wala e ye ti nzere na Jéhovah (aProverbe 30:24). Nga, e yeke pëpe tongana mbeni masini so ayeke sara gï ye so a leke ni ndali ni. E yeke na liberté ti soro asarango ye so e ye ti duti na ni, azo wa la e ye ti sara kamarade na ala nga ye so e ye ti sara na yâ ti gigi ti e. Jéhovah aye ti tene gigi anzere na e.

20, 21. Pendere ye wa la mo lingbi ti soro ti sara fadeso?

20 Jéhovah aye ti tene e ye lo (Matthieu 22:37, 38). Lo yeke tongana mbeni babâ so a nzere na lo ti mä molenge ti lo atene na lo na bê ti lo wani: “Mbi ye mo” me pëpe mbeni zo la agbu lo na ngangu ti tene ni. Jéhovah amû na e liberté ti soro ti sara na lo wala ti sara na lo pëpe. Satan, Adam nga na Ève ake Jéhovah. Tongana nyen la mo yeke sara kua na matabisi ti mo so ayeke liberté so mo yeke na ni ti soro ye?

21 Sara kua na liberté ti mo ti sara na Jéhovah. Azo kutu mingi amû desizion ti nzere na Nzapa na ti ke Satan (aProverbe 27:11). Nyen la mo lingbi ti sara fadeso tongaso si mo duti na yâ ti fini dunia ti Nzapa na ngoi so lo yeke zi ande apasi kue? Chapitre ti peko ayeke kiri tënë na hundango ndo so.