Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible alingbi ti fa nyen na e?

 CHAPITRE BALE-OKO NA USE

Tongana nyen la mo lingbi ti ga kamarade ti Nzapa?

Tongana nyen la mo lingbi ti ga kamarade ti Nzapa?

1, 2. Ambeni kamarade ti Jéhovah ayeke lani azo wa?

ZO WA la mo ye ti tene lo duti kamarade ti mo? Mbeni zo so mo ye lo. Mbeni zo so mo na lo amä terê nzoni. Mbeni zo so ayeke na asarango ye so mo ye ni mingi.

2 Jéhovah asoro ambeni zo ti duti akamarade ti lo. Na tapande, Abraham ayeke lani mbeni kamarade ti Jéhovah (Ésaïe 41:8; Jacques 2:23). Jéhovah aye nga lani David mingi. Lo tene lani so David ayeke ‘mbeni koli so bê ti lo aye lo’. (Kusala 13:22). Nga, Jéhovah ‘abâ lani na nene ni mingi’ prophète Daniel.—Daniel 9:23.

3. Ngbanga ti nyen la Abraham, David nga na Daniel ayeke lani akamarade ti Jéhovah?

3 Tongana nyen la Abraham, David nga na Daniel aga lani akamarade ti Jéhovah? Jéhovah atene lani na Abraham, atene: “Mo mä yanga ti mbi.” (Genèse 22:18). Jéhovah aga kamarade ti azo so asara terê ti ala kete si amä yanga ti lo. Même mbeni mara alingbi ti ga kamarade ti lo. Jéhovah atene lani na azo ti Israël, atene: “Ala mä yanga ti mbi, mbi yeke ga Nzapa ti ala, na ala yeke ga azo ti mbi.” (Jérémie 7:23). Tongaso, a lingbi mo kue mo mä yanga ti Jéhovah tongana mo ye biani ti ga kamarade ti lo.

JÉHOVAH AYEKE BATA AKAMARADE TI LO

4, 5. Jéhovah ayeke bata akamarade ti lo tongana nyen?

4 Bible atene so Jéhovah ayeke gi alege ti “mû ngangu ti lo ti mû maboko na azo so azia bê ti ala kue na lo.” (2 Chronique 16:9). Na Psaume 32:8, Jéhovah atene na akamarade  ti lo, lo tene: “Mbi yeke sara si [ala] hinga ti bâ yâ ti aye nzoni nga mbi yeke fa na [ala] lege so a lingbi [ala] mû ni. Mbi yeke mû na [ala] wango, na lê ti mbi ayeke gï na ndö ti [ala].”

5 Mbeni ngangu wato aye ti kanga lege na e si e ga kamarade ti Nzapa pëpe. Me Jéhovah aye ti bata e. (Diko Psaume 55:22.) So e yeke akamarade ti Jéhovah, e yeke sara na lo na bê ti e kue. E yeke be-ta-zo na lo même na yâ ti angoi ti kpale. Nga e yeke na mara ti confiance so zo ti sungo psaume so ayeke na ni lani. Lo tene na ndö ti Jéhovah, lo tene: “So lo yeke na mbage ti maboko ti mbi ti koli, ye ayeke yengi mbi lâ oko pëpe.” (Psaume 16:8; 63:8). Tongana nyen la Satan agi ti kanga lege na e ti tene e ga kamarade ti Nzapa ape?

SATAN ABI TËNË NA LI TI AZO

6. Satan atene nyen na ndö ti azo?

6 Na chapitre 11, e manda lani so Satan agi yanga ti Jéhovah, lo tene lo yeke zo ti mvene nga lo sara ye na Adam na Ève na lege ni pëpe na lege so lo mû lege pëpe na ala ti mû desizion ala wani na ndö ti ye so ayeke nzoni na ye so ayeke sioni. Mbeti ti Job afa na e so Satan abi nga tënë na li ti azo so aye ti ga akamarade ti Nzapa. Satan atene so azo ayeke sara na Nzapa ti wara ye na maboko ti lo, me pëpe ndali ti so ala ye lo. Satan atene même so lo lingbi ti handa azo kue na terê ti Nzapa. Zia e bâ ye so e lingbi ti manda na mbage ti Job nga tongana nyen la Jéhovah abata lani lo.

7, 8. (a) Jéhovah abâ lani Job tongana nyen? (b) Satan atene lani nyen na ndö ti Job?

7 Job ayeke lani zo wa? Lo yeke lani mbeni nzoni zo so ayeke na fini a sara ngu 3600 tongaso awe. Jéhovah atene lani so na ngoi ni so mbeni zo so ayeke tongana Job ayeke na ndö ti sese pëpe. Lo kpe lani mbeto ti Nzapa mingi  nga lo ke ye so ayeke sioni (Job 1:8). Biani, Job ayeke lani tâ kamarade ti Jéhovah.

8 Satan atene so Job asara na Nzapa gï ti wara ye na peko ni. Satan atene na Jéhovah, atene: “Mo sara gbagba na terê ti lo, na terê ti da ti lo nga na aye ti lo kue ape? Tufa ti mo ayeke na ndö ti akua so lo yeke sara, nga anyama ti lo aga gbani na yâ ti kodro ni. Me ti fadeso, yôro maboko ti mo, mo ndu aye ti lo kue, na lo yeke zonga mo tâ na lê ti mo.”—Job 1:10, 11.

9. Nyen la Jéhovah amû lege na Satan ti sara?

9 Satan atene so Job ayeke sara na Jéhovah gï ti wara ye na mbage ti lo. Satan atene nga so lo lingbi ti sara si Job azia lege ti sarango na Jéhovah. Jéhovah ayeda na Satan pëpe, me lo mû lege na lo ti tara Job ti bâ wala Job ayeke kamarade ti Jéhovah ndali ti so lo ye lo.

SATAN AGA NA ASIONI YE NA NDÖ TI JOB

10. Asioni ye wa la Satan aga na ni na terê ti Job? Job asara ye tongana nyen?

10 Kozoni, Satan anzi wala lo futi anyama ti Job kue. Na pekoni, lo fâ mingi ti awakua ti Job. Aye ti Job kue ahunzi. Na yâ ti tanga ti asioni ye ni, Satan afâ amolenge ti Job bale-oko na yâ ti mbeni kota pupu. Me Job angbâ be-ta-zo na Jéhovah. “Na yâ ti aye so kue, Job asara siokpari pëpe wala lo tene pëpe so Nzapa asara mbeni ye ti sioni.”—Job 1:12-19, 22.

Jéhovah afuta Job ndali ti so lo ngbâ ti bata songo ti lo na lo

11. (a) Nyen la Satan akiri asara na Job? (b) Job asara ye tongana nyen?

11 Satan angbâ gï ge pëpe. Lo gi yanga ti Nzapa, lo tene: “Ndu bio ti lo nga na nyama ti terê ti lo, lo yeke zonga mo tâ na lê ti mo.” Tongaso, Satan asara si Job awara mbeni kobela so ason mingi (Job 2:5, 7). Ge nga kue Job angbâ be-ta-zo na Jéhovah. Lo tene: “Juska mbi kui, mbi yeke ngbâ gï na ndö ti sarango ye ti mbi ti mbilimbili!”—Job 27:5.

12. Tongana nyen la Job afa so Satan ayeke zo ti mvene?

 12 Job ahinga lani atënë so Satan abi na li ti lo so oko pëpe wala lo hinga ndani so lo yeke bâ pasi mingi so pëpe. Lo pensé lani so Jéhovah la asara si lo wara akpale so (Job 6:4; 16:11-14). Me atâa so kue, Job angbâ lani be-ta-zo na Jéhovah. Fadeso kite ayeke dä ape. Job ayeke sara lani na Jéhovah pëpe ti wara ye na mbage ti lo. Lo yeke lani kamarade ti Nzapa ndali ti so lo ye lo. Atënë ti Satan kue ayeke mvene.

13. Nyen la Job awara na peko ti dutingo be-ta-zo ti lo?

13 Atâa so Job ahinga lani pëpe ye so ayeke passé na yayu, lo ngbâ be-ta-zo na Nzapa nga lo fa so Satan ayeke sioni. Jéhovah afuta Job ndali ti so lo ngbâ ti bata songo ti lo na lo.—Job 42:12-17.

SATAN ABI TËNË NA LI TI MO TONGANA NYEN?

14, 15. Tënë ti nyen la Satan abi na li ti azo kue?

14 Mo lingbi ti manda ambeni kpengba ye na lege ti ye so asi na Job so. Laso, Satan atene so e yeke sara na Jéhovah gï ndali ti so e yeke wara ye na mbage ti lo. Na Job 2:4, Satan atene: “Zo ayeke mû ye kue so lo yeke na ni ti bata fini ti lo.” Tongaso, Satan abi tënë na li ti azo kue me gï na li ti Job lo oko pëpe. Angu ngbango mingi na peko ti kuâ ti Job, Satan angbâ ti zonga Jéhovah nga ti bi tënë na li ti awakua ti lo. Na tapande, na aProverbe 27:11, a tene: “Molenge ti mbi, sara ye na ndara, na mo zia ngia na bê ti mbi, si mbi kiri tënë na zo so ayeke gi yanga ti mbi [wala, azonga mbi].”

15 Mo lingbi ti soro ti mä yanga ti Jéhovah nga ti duti kamarade ti lo so ayeke be-ta-zo na lo, ti fa so Satan ayeke zo ti mvene. Même tongana a hunda ti tene mo sara akota changement na yâ ti gigi ti mo ti ga kamarade ti Nzapa, tongana mo sara ni a yeke nzoni desizion mingi la mo mû so.  Desizion so ayeke kota mingi. Satan atene so mo yeke ngbâ be-ta-zo na Nzapa pëpe tongana mo wara akpale. Lo yeke gi ti handa e si e ngbâ be-ta-zo na Nzapa pëpe. Lo yeke sara ni tongana nyen?

16. (a) Akode wa la Satan ayeke sara kua na ni ti gi ti kanga lege na azo ti sara na Jéhovah? (b) Tongana nyen la Satan alingbi ti gi ti kanga lege na mo wani ti sara na Jéhovah?

16 Satan ayeke sara kua na akode nde nde ti gi ti kanga lege na e si e duti pëpe akamarade ti Nzapa. Lo yeke ga “tongana mbeni bamara so ayeke toto, na lo yeke gi mbeni zo ti te lo.” (1 Pierre 5:8). Zia si li ti mo aga kirikiri pëpe tongana akamarade ti mo, azo ti sewa ti mo wala ambeni zo agi ti kanga lege na mo ti manda Bible nga ti sara aye so ayeke nzoni. Peut-être a yeke mo bâ mo tene Satan la ayeke ga na asioni ye na ndö ti mo * (Jean 15:19, 20). Nga, Satan ayeke sara terê ti lo “tongana mbeni ange ti lumière.” Tongaso, lo lingbi ti handa e ti ke yanga ti Jéhovah (2 aCorinthien 11:14). Mbeni kode so Satan ayeke sara na kua ti gi ti kanga lege na e si e zia lege ti sarango na Jéhovah ayeke so lo yeke sara si e pensé so e kpa pëpe ti sara na Nzapa.—aProverbe 24:10.

SARA YE ALINGBI NA ACOMMANDEMENT TI NZAPA

17. E yeke mä yanga ti Jéhovah ngbanga ti nyen?

17 Tongana e mä yanga ti Jéhovah, e fa so Satan ayeke zo ti mvene. Nyen la ayeke mû maboko na e ti mä yanga? Bible atene: “Mo ndoye Jéhovah Nzapa ti mo na bê ti mo kue, na âme ti mo kue nga na ngangu ti mo kue.” (Deutéronome 6:5). E mä yanga ti Jéhovah ndali ti so e ye lo.  Tongana e ye Jéhovah mingi, e yeke yeda ti sara ye kue so lo hunda na e ti sara. Bazengele Jean atene: “Ndoye ti Nzapa ayeke so: e bata acommandement ti lo; me acommandement ti lo ayeke ye so ane pëpe.”—1 Jean 5:3.

18, 19. (a) Ambeni ye so Jéhovah atene ayeke sioni ayeke so wa? (b) E hinga tongana nyen so Jéhovah ahunda na e pëpe ti sara mbeni ye so ahon ngangu ti e?

18 Me ambeni ye wa la Jéhovah atene ayeke sioni? Ambeni tapande ni ayeke na yâ ti encadré “ Ke aye so Jéhovah ake.” Na bango aye so kpa, mo lingbi ti pensé so aye ni so ayeke sioni pëpe. Me tongana mo diko aversê so a zia na terê ni nga mo gbu li ti mo nzoni na ndö ni, mo yeke bâ so a yeke na lege ti ndara ti sara ye alingbi na andia ti Jéhovah. Mo lingbi peut-être ti bâ so a lingbi mo sara ambeni changement na yâ ti gigi ti mo. Atâa so na ambeni ngoi a lingbi ti duti ngangu, tongana mo sara achangement ni so, mo yeke duti na siriri nga na ngia ndali ti so mo yeke mbeni  kamarade ti Nzapa so ayeke be-ta-zo na lo (Ésaïe 48:17, 18). Tongana nyen la e hinga so lege ayeke dä ti sara achangement so?

19 Jéhovah ayeke hunda na e lâ oko pëpe mbeni ye so e lingbi pëpe ti sara ni (Deutéronome 30:11-14). So lo yeke tâ Kamarade ti e, lo hinga e nzoni mingi ahon e wani. Lo hinga angangu ti e nga na awokongo ti e (Psaume 103:14). Bazengele Paul awa e, atene: “Nzapa ayeke be-ta-zo, na lo yeke zia ande pëpe si a tara ala ahon ti so ala lingbi ti kanga bê dä, me tongana tara ni ayeke si na ala, lo yeke leke nga lege ti tene ala lingbi ti gbu ngangu dä.” (1 aCorinthien 10:13). E lingbi ti duti na confiance so Jéhovah ayeke mû na e lakue ngangu ti sara ye so ayeke nzoni. Lo yeke mû na mo “ngangu so ahon ti so zo ayeke na ni” ti mû maboko na mo ti gbu ngangu na yâ ti angoi ti kpale (2 aCorinthien 4:7). Na peko ti so Paul abâ mungo maboko ti Jéhovah na ngoi ti  akpale, lo tene: “Mbi wara ngangu ti sara aye kue ndali ti lo so lo mû ngangu ni na mbi.”—aPhilippien 4:13.

MANDA TI YE AYE SO NZAPA AYE

20. Asarango ye wa la a lingbi e mû tapande ni? Ngbanga ti nyen?

20 Tongana e ye ti duti kamarade ti Jéhovah, a lingbi e sara pëpe ye so lo tene ayeke sioni, me a lingbi e sara ambeni ye nga (aRomain 12:9). Akamarade ti Nzapa aye aye so lo ye. A fa asarango ye ti ala na Psaume 15:1-5. (Diko ni.) Akamarade ti Nzapa ayeke mû tapande ti asarango ye ti lo na ala fa na yâ ti gigi ti ala asarango ye tongana “ndoye, ngia, siriri, kangango bê ti ku, sarango nzoni na zo, nzoni bê, mabe, sarango ye na ngangu pëpe, kangango nzara ti bê.”—aGalate 5:22, 23.

21. Tongana nyen la mo lingbi ti manda ti duti na asarango ye so Nzapa aye?

21 Tongana nyen la mo lingbi ti manda ti duti na apendere sarango ye so? Mo bezoin ti hinga ye so Jéhovah aye na lege ti dikongo Bible lakue nga na mandango ni lakue (Ésaïe 30:20, 21). Tongana mo sara tongaso, mo yeke ye Jéhovah mingi, na tongana mo ye lo mingi, mo yeke yeda ti mä yanga ti lo.

22. Tongana mo mä yanga ti Nzapa nyen la mo yeke wara na peko ni?

22 A lingbi ti haka achangement so mo yeke sara na yâ ti gigi ti mo na zingo mbeni ngbene bongo ti yü fini ni. Bible atene so mo bezoin ti “zi ngbene zo” na ti “yü fini zo”. (aColossien 3:9, 10). Atâa so a lingbi ti duti kete ye ape, tongana e sara achangement so nga e mä yanga ti Jéhovah, lo tene so lo yeke mû na e “futa mingi.” (Psaume 19:11). Soro ti mä yanga ti Jéhovah nga fa so Satan ayeke zo ti mvene. Sara na Jéhovah ndali ti so mo ye lo na bê ti mo kue, me pëpe ndali ti so lo yeke futa ande mo. Tongaso, mo yeke ga tâ kamarade ti Nzapa.

^ par. 16 A ye pëpe ti tene so Satan la ayeke fa lege na azo so agi ti kanga lege na mo ti manda Bible. Me Satan ayeke “nzapa ti aye ti ngoi so” nga “dunia so kue ayeke na gbe ti [lo].” Tongaso, a dö bê ti e pëpe tongana ambeni zo agi ti kanga lege na e ti sara na Jéhovah.—2 aCorinthien 4:4; 1 Jean 5:19.