Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible alingbi ti fa nyen na e?

 CHAPITRE USE

Bible: Mbeti so alondo na Nzapa

Bible: Mbeti so alondo na Nzapa

1, 2. Ngbanga ti nyen la Bible ayeke mbeni pendere cadeau so alondo na Nzapa?

TONGANA mbeni kamarade ti mo amû na mo mbeni cadeau so mo ku terê ti mo na ni pëpe, a yeke sara mo tongana nyen? Hio mo yeke sara kua na cadeau ni, na mo yeke na ngia so kamarade ti mo apensé na mo. Mo yeke kiri singila na lo ndali ni.

2 Bible ayeke mbeni cadeau so Nzapa amû na e. Na yâ ni e yeke wara asango so e lingbi ti wara ni na mbeni ndo nde pëpe. Na tapande, Bible afa na e so Nzapa acréé ayayu, sese, nga na kozo koli na kozo wali. Bible afa na e amama-ndia so alingbi ti mû maboko na e ti leke akpale ti e. Na yâ ti Bible e manda tongana nyen la Nzapa ayeke sara ande ye so lo leke na bê ti lo ti sara ti tene sese aga mbeni pendere ndo. Bible ayeke tâ mbeni pendere cadeau mingi.

3. Nyen la mo yeke hinga tongana mo manda Bible?

3 Na ngoi so mo yeke manda Bible, mo yeke hinga so Nzapa aye ti tene mo ga kamarade ti lo. Tongana mo manda ye mingi na ndö ti lo, songo ti mo na lo ayeke kpengba mingi ahon ti kozo.

4. Aye wa so andu Bible apika bê ti mo mingi?

4 A kiri na peko ti Bible na ayanga ti kodro ahon 2800 nga a imprimé ni milliard mingi. Azo milliard mingi na yâ ti dunia alingbi ti diko Bible na yanga ti kodro ti ala wani. Nga yenga oko oko, azo ahon kutu oko ayeke wara Bible. Biani, mbeni mbeti ti lingbi na Bible ayeke dä pëpe.

5. Ngbanga ti nyen la e tene so Bible ayeke mbeti so “a sû ni na gbe ti yingo ti Nzapa”?

 5 Bible ayeke mbeti so “a sû ni na gbe ti yingo ti Nzapa”. (Diko 2 Timothée 3:16.) Me ambeni zo alingbi ti tene: ‘Azo la asû Bible, ka a londo na Nzapa ni tongana nyen?’ Bible akiri tënë, atene: “Azo asara tënë ti ye so alondo na Nzapa tongana yingo vulu afa lege ni na ala [wala, ahon na ala].” (2 Pierre 1:21). A yeke legeoko tongana ti so mbeni patron atene na secrétaire ti lo ti sû mbeni lettre. Zo wa la ayeke wa ti lettre ni? A yeke patron ni, me secrétaire ni ape. A yeke legeoko nga tongaso, Wa ti Bible ayeke Nzapa, me azo so lo sara kua na ala ti sû ni so pëpe. Nzapa afa lege na ala ti sû apensé ti lo. Bible ayeke biani “tënë ti Nzapa”.​—1 aThessalonicien 2:13; bâ Kete tënë 2.

A yeke wara Mbeti ti Nzapa ti fini dunia na ayanga ti kodro mingi

 ATËNË TI YÂ TI BIBLE AYEKE TÂ TËNË

6, 7. Ngbanga ti nyen la e lingbi ti tene so atënë ti yâ ti Bible amä terê?

6 A hunda ngu 1600 tongaso ti sû Bible. Azo so asû Bible ayeke na fini lani na angoi nde nde. Ambeni ahinga lani mbeti mingi nga ambeni ahinga mbeti mingi pëpe. Na tapande, mbeni oko ayeke lani docteur. Ambeni ayeke lani azo ti fango yaka, azo ti gingo susu, aberger, aprophète, ajuge nga na agbia. Atâa so azo nde nde la asû Bible, atënë ti yâ ni kue amä terê. Tënë ti mbeni chapitre ague nde na tënë ti mbeni chapitre pëpe. *

7 Akozo chapitre ti Bible afa tongana nyen la akpale akomanse na yâ ti dunia, nga andangba chapitre ni afa tongana nyen la Nzapa ayeke leke ande akpale ni so na sarango si sese aga paradis. Bible asara tënë ti gigi ti azo so ayeke na fini ândö giriri. Bible afa nga so Nzapa asara lakue aye so lo leke na bê ti lo ti sara.

8. Mû atapande so afa so na ndö ti tënë ti aye ti awandara Bible atene tâ tënë.

8 A sû Bible ti fa tënë ti aye ti awandara wala ti fa na ye na ekole pëpe, me atënë so Bible atene na ndö ti aye ti awandara ayeke lakue tâ tënë. A yeke na lege ni ndali ti so alondo na Nzapa. Na tapande, na yâ ti mbeti ti Lévitique, a yeke wara awango so Nzapa amû na azo ti Israël ti kanga lege na mbeni kobela si amû ndo ape. A sû atënë so ngoi mingi kozo ti tene azo ahinga aye so alingbi ti mû kobela na zo. Bible afa so sese ayeke na ndö ti ye oko pëpe na a yeke biani tongaso (Job 26:7). Nga na ngoi so mingi ti azo  apensé lani so sese ayeke kpangbala, Bible atene ti lo so ayeke ronde.​—Ésaïe 40:22.

9. So azo so asû Bible atene tâ tënë amû maboko na e ti hinga nyen?

9 Tongana Bible asara tënë ti mbaï, a yeke tene gï tâ tënë. Me ambeti ti mbaï mingi ayeke tene tâ tënë kue pëpe ndali ti so azo so asû ni atene tâ tënë pëpe. Na tapande, na angoi so amara ti ala atï na yâ ti bira, ala yeke sû ni lakue na mbeti pëpe. Me azo so asû Bible atene gï tâ tënë même na ngoi so azo ti Israël atï na yâ ti bira. Ala sû nga na mbeti afaute ti ala wani. Na tapande, na mbeti ti Nombre, Moïse atene so lo sara mbeni kota faute so a lingbi Nzapa apunir lo ndali ni (Nombre 20:2-12). So azo so asû Bible atene tâ tënë afa so Bible alondo na Nzapa. Ye so aye ti fa so e lingbi ti zia bê ti e na Bible.

MBENI MBETI SO ANZONI WANGO AYEKE NA YÂ NI MINGI

10. Ngbanga ti nyen la awango ti Bible ayeke mû maboko na e laso?

10 Bible ayeke mbeti so “a sû ni na gbe ti yingo ti Nzapa, na a yeke nzoni ti fa na ye na zo, ti suku na zo, ti kiri na aye na nzoni lege”. (2 Timothée 3:16). Biani, awango ti Bible ayeke mû maboko na e laso. Jéhovah ahinga tongana nyen la lo sara e, tongaso lo hinga apensé ti e nga na atënë ti bê ti e. Lo hinga e nzoni mingi ahon e wani, nga lo ye ti tene e duti na ngia. Lo hinga ye so ayeke sara nzoni na e nga ye so ayeke sara sioni na e.

11, 12. (a) Jésus amû anzoni wango wa na Matthieu chapitre 5 ti si na 7? (b) Ambeni ye wa la Bible afa na e?

11 Na Matthieu chapitre 5 ti si na 7, e wara anzoni wango so Jésus amû na ndö ti lege ti duti na ngia, ti mä terê na amba ti e, ti sambela nga ti duti na nzoni bango ndo na ndö ti nginza. Atâa so lo mû lani awango so a sara  ngu 2000 awe, a ngbâ na ngangu laso nga a mû maboko na azo.

12 Na yâ ti Bible, Jéhovah afa nga na e amama-ndia so alingbi ti mû maboko na e ti sara si sewa ti e aduti na ngia mingi, ti duti anzoni zo ti kua nga ti duti na siriri na azo. Amama-ndia ti Bible alingbi lakue ti mû maboko na e, atâa e yeke zo wa, kodro wa la e yeke dä wala akpale wa la e wara.​—Diko Ésaïe 48:17; Kete tënë 3.

MO LINGBI TI ZIA BÊ TI MO NA APROPHÉTIE TI BIBLE

Ésaïe so ayeke mbeni zo so asû Bible atene lani prophétie ti tingo ti Babylone

13. Ésaïe atene nyen la ayeke si na gbata ti Babylone?

13 Aprophétie ti Bible mingi aga tâ tënë awe. Na tapande, prophète Ésaïe afa lani so a yeke futi Babylone (Ésaïe 13:19). Lo fa mbilimbili tongana nyen la gbata ni ayeke tï. Akota yanga ti gbagba ti gbata ni nga na mbeni kota ngu la abata gbata ni. Me Ésaïe afa nga lani so a yeke sara ande si ngu ni ahule nga a yeke zia yanga ti gbagba ni na zingo ni. Azo so aga na bira na gbata ni ayeke mû ni sân ti sara bira. Ésaïe afa même so mbeni koli so iri ti lo ayeke Cyrus ayeke sö benda na ndö ti Babylone.​—Diko Ésaïe 44:27–45:2; Kete tënë 4.

14, 15. Prophétie so Ésaïe atene aga tâ tënë tongana nyen?

14 Ngu ngbangbo use na peko ti so a sû prophétie so, aturugu asi na ala yeke nduru ti sara bira na Babylone. Zo wa la ayeke na li ti aturugu ni? Gï tongana ti so prophétie ni afa, a yeke Cyrus, gbia ti Perse. Me aturugu ti Cyrus ayeke wara lege ti mû Babylone ni tongana ti so prophète ni atene?

15 Na bï ni so a ga ti sara bira na Babylone, azo ti gbata ni ayeke sara lani mbeni matanga. Ala bâ so mbeni ye ti sioni ti si na ala ayeke dä pëpe ndali ti so akota mur nga na  ngu ni abata ala. Na gigi ti gbata ni, Cyrus na aturugu ti lo azi mbeni canal ti tene ngu ni ahon dä. Ngu ni adescend mingi na aturugu ti Perse ahon na yâ ni. Me ala yeke hon na ndö ti amur ti Babylone ni tongana nyen? Gï tongana ti so prophétie ni atene, a zia yanga ti gbagba ti gbata ni na zingo ni, tongaso aturugu ni amû gbata ni sân ti sara bira.

16. (a) Ésaïe atene nyen na ndö ti ye so ayeke si na Babylone? (b) E hinga tongana nyen so prophétie ni aga lani tâ tënë?

 16 Prophète Ésaïe atene lani so na nda ni zo oko ayeke sara kodro na Babylone encore ape. Lo tene: “Azo ayeke kiri ti sara kodro dä lâ oko pëpe; na yâ ti angoi nde nde kue, zo ayeke sara kodro dä pëpe.” (Ésaïe 13:20). Tënë ni aga lani tâ tënë? Na ndo so Babylone ayeke lani dä kozo, na sud ti Bagdad, na Iraq, a yeke wara gï agbagbara da. Na même laso zo oko asara kodro kâ pëpe. Jéhovah azi aye kue na Babylone tongana ti so zo “[a]mû balai si lo balê na asaleté kue [wala, lo futi ni].”​—Ésaïe 14:22, 23. *

Agbagbara da ti Babylone

17. Ngbanga ti nyen la e lingbi ti zia bê ti e na azendo ti Nzapa kue?

17 So aprophétie mingi ti Bible aga tâ tënë awe afa so e lingbi ti zia bê ti e na atënë so Bible atene na ndö ti kekereke. E lingbi ti hinga biani so Jéhovah ayeke sara ande ye  alingbi na zendo so lo mû ti sara si sese aga paradis. (Diko Nombre 23:19.) Biani, e yeke na beku ti “fini ti lakue lakue so Nzapa, lo so alingbi ti tene mvene pëpe, amû zendo ni ngbene ye ândö giriri”.​—Tite 1:2. *

BIBLE ALINGBI TI CHANGÉ GIGI TI MO

18. Paul atene nyen na ndö ti “tënë ti Nzapa”?

18 E manda so mbeni mbeti ti lingbi na Bible ayeke dä pëpe. Atënë ti yâ ni kue ague oko, nga na ngoi so a sara tënë ti aye ti awandara wala tënë ti mbaï a yeke tene gï tâ tënë lakue. Bible amû nga na e anzoni wango nga aprophétie mingi so ayeke na yâ ni aga tâ tënë awe. Me Bible asara ambeni ye nde nga. Bazengele Paul atene: “Tënë ti Nzapa ayeke na fini na ayeke na ngangu ti sara ye.” So aye ti tene nyen?​—Diko aHébreu 4:12.

19, 20. (a) Tongana nyen la Bible alingbi ti mû maboko na mo ti hinga mo wani nzoni? (b) Tongana nyen la mo lingbi ti fa so mo kiri singila ndali Bible so ayeke mbeni cadeau?

19 Bible alingbi ti changé gigi ti mo. Bible alingbi ti mû maboko na mo ti hinga mo wani nzoni. A lingbi ti mû maboko na mo ti hinga aye so ayeke na gbe ti bê ti mo. Na tapande, e lingbi ti pensé so e ye Nzapa. Me ti fa so e ye lo, a lingbi e sara ye alingbi na ye so Bible afa.

20 Bible ayeke biani mbeti so alondo na Nzapa. Lo ye ti tene mo diko ni, mo manda ni nga mo ye ni. Kiri singila ndali ti cadeau so nga ngbâ ti manda ni. Tongaso, mo yeke hinga ye so Nzapa aleke ti sara ndali ti azo. Na yâ ti chapitre ti peko, e yeke manda aye mingi na ndö ni.

^ par. 6 Ambeni zo atene so atënë ti yâ ti Bible amä terê pëpe, me tënë so ayeke tâ tënë pëpe. Bâ chapitre 7 ti buku Bible: A Yeke Tene ti Nzapa Wala ti Azo? so aTémoin ti Jéhovah asigi na ni.

^ par. 16 Tongana mo ye ti hinga ye mingi na ndö ti aprophétie ti Bible, mo lingbi ti diko lembeti 27-29 ti brochure Un livre pour tous, so aTémoin ti Jéhovah asigi na ni.

^ par. 17 Futingo ti Babylone ayeke gï mbeni oko ti aprophétie ti Bible so aga tâ tënë. Ti wara asango na ndö ti aprophétie so andu Jésus Christ, bâ Kete tënë 5.

TI HINGA AMBENI TËNË

NZONI TËNË SO ALONDO NA NZAPA!

E hinga tongana nyen so atënë ti Bible ayeke tâ tënë?

Tongana Bible ayeke tënë ti Nzapa, a yeke nzoni lo yeke nde na tanga ti abuku kue so a sû ni.

AZO WA LA AYEKE SARA LASO YE SO JÉHOVAH AYE?

Lê ti azo akiri azi na ndö ti tâ tënë tongana nyen?

Nyen la apusu e ti tene na kite oko pëpe so laso e hinga tâ mbilimbili ye so Bible afa biani?