Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible alingbi ti fa nyen na e?

 CHAPITRE BALE-OKO NA MIOMBE

A lingbi mbi mû fini ti mbi na Nzapa na mbi wara batême?

A lingbi mbi mû fini ti mbi na Nzapa na mbi wara batême?

1. Nyen la peut-être mo pensé ti sara na peko ti so mo manda mbeti so nzoni awe so?

MO MANDA lani atâ tënë ti Bible mingi na ngoi ti mandango ye ti mo na yâ ti mbeti so, na tapande fini ti lakue lakue so Nzapa amû zendo ni, dutingo ti akuâ nga na beku ti zingongo ti akuâ (Zo-ti-fa-tene 9:5; Luc 23:43; Jean 5:28, 29; Apocalypse 21:3, 4). Peut-être mo komanse ti ga na bungbi ti aTémoin ti Jéhovah awe na mo hinga so ala yeke voro Nzapa tongana ti so lo ye (Jean 13:35). Peut-être mo komanse ti lë kpengba songo na Jéhovah, nga  mo mû peut-être desizion ti sara na lo. Tongaso, mo lingbi ti hunda terê ti mo: ‘Nyen la a lingbi mbi sara ti sara na Nzapa fadeso?’

2. Ngbanga ti nyen la mbeni zo ti Éthiopie aye ti wara batême?

2 A yeke ye so mbeni zo ti Éthiopie so ayeke na fini na ngoi ti Jésus apensé na ndö ni. Ambeni ngoi na peko ti so a zingo Jésus na kuâ, Philippe, disciple ti Jésus, afa tënë na koli so. Philippe afa na lo so Jésus la ayeke Messie ni. Ye so zo ti Éthiopie so amanda agbu bê ti lo mingi apusu lo ti tene na lê ni lê ni: “Bâ, ngu la! Nyen la akanga lege na mbi ti wara batême?”—Kusala 8:26-36.

3. (a) Commandement wa la Jésus amû lani na adisciple ti lo? (b) A lingbi a batize mbeni zo tongana nyen?

3 Bible afa polele so tongana mo ye ti sara na Jéhovah, a lingbi mo wara batême. Jésus atene lani na adisciple ti lo, atene: “Ala sara si azo na popo ti amara kue aga adisciple. Ala batize ala.” (Matthieu 28:19). Jésus wani azia nga tapande ni na lege so lo wara batême. A yôro lo lani kue na yâ ti ngu me a tuku ngu tukungo na li ti lo pëpe (Matthieu 3:16). Laso, tongana a batize mbeni Chrétien, a lingbi a yôro lo kue na yâ ti ngu.

4. Batême ti mo afa nyen na azo?

4 Tongana mo wara batême, a fa na azo so mo ye biani ti ga kamarade ti Nzapa nga ti sara na lo (Psaume 40:7, 8). Tongaso, peut-être mo yeke hunda terê ti mo: ‘Nyen la a lingbi mbi sara ti wara batême?’

HINGANGO YE NGA NA MABE

5. (a) Nyen la a lingbi mo sara kozo si mo wara batême? (b) Ngbanga ti nyen la abungbi ayeke kota ye mingi?

5 Kozo si mo wara batême, a lingbi mo manda ti hinga Jéhovah na Jésus. Mo komanse ti sara ni awe na lege ti mandango Bible. (Diko Jean 17:3.) Me so alingbi  pëpe. Bible atene so a lingbi mo “si singo na tâ hingango ye” ti ye so bê ti Jéhovah aye (aColossien 1:9). Abungbi ti aTémoin ti Jéhovah ayeke mû maboko na mo ti lë kpengba songo na Jéhovah. So ayeke mbeni kpengba raison so ndali ni a lingbi mo gue na abungbi lakue.—aHébreu 10:24, 25.

Kozo ti tene mo wara batême, a lingbi mo manda Bible

6. A lingbi mo hinga aye kue na ndö ti Bible kozo si mo wara batême?

6 Jéhovah ahunda pëpe ti tënë mo hinga aye kue so ayeke na yâ ti Bible kozo si mo wara batême. Lo hunda lani pëpe ti tene zo ti Éthiopie so ahinga aye kue kozo si lo wara batême (Kusala 8:30, 31). Nga, e yeke ngbâ ande ti manda ye na ndö ti Nzapa teti lakue lakue (Zo-ti-fa-tene 3:11). Me ti wara batême, a lingbi mo hinga akota fango ye ti Bible nga mo yeda na ni.—aHébreu 5:12.

7. Mandango Bible amû maboko na mo tongana nyen?

7 Bible atene: “Tongana mabe ayeke dä pëpe zo alingbi ti nzere na lê ti Nzapa pëpe.” (aHébreu 11:6). Tongaso, kozo si mo wara batême, a lingbi mo mä na bê. Bible atene so ambeni zo ti gbata ti Corinthe ti giriri amä lani ye so adisciple ti Jésus afa, ye ti peko ni ayeke so ala ‘komanse ti mä na bê nga a batize ala.’ (Kusala 18:8). Legeoko nga, so mo manda Bible amû maboko na mo ti mä na bê na azendo so Nzapa amû nga na ngangu so sacrifice ti Jésus ayeke na ni ti zi e na gbe ti siokpari na kuâ.—Josué 23:14; Kusala 4:12; 2 Timothée 3:16, 17.

FA NA AMBA TI MO ATÂ TËNË TI BIBLE

8. Nyen la ayeke pusu mo ti fa na azo aye so mo manda?

8 Tongana mo manda ye mingi na yâ ti Bible nga mo bâ tongana nyen la Bible amû maboko na mo na yâ ti gigi ti mo, mabe ti mo ayeke kpengba. Mo yeke ye ande ti  fa na ambeni zo ye so mo yeke manda (Jérémie 20:9; 2 aCorinthien 4:13). Me mo yeke fa ni na azo wa?

A yeke nzoni mabe apusu mo ti fa na azo tënë ti mabe ti mo

9, 10. (a) Azo wa la mo lingbi ti komanse ti fa na ala aye so mo manda? (b) Tongana mo ye ti fa tënë legeoko na congrégation, nyen la a lingbi mo sara?

9 Peut-être mo ye ti fa na afami ti mo, akamarade ti mo, avoizin ti mo wala amba ti mo ti place ti kua ye so mo yeke manda. So ayeke nzoni, me sara ni lakue na nzoni bê nga na ndoye. Na nda ni, mo lingbi ti komanse ti fa tënë legeoko na congrégation. Na ngoi so mo bâ so mo yeke nduru ti sara ni, mo lingbi ti tene na zo so ayeke manda Bible na mo so mo ye ti fa tënë legeoko na congrégation. Tongana lo pensé so mo yeke nduru nga tongana mo yeke sara ye alingbi na andia ti Bible, ala yeke wara terê na a-ancien use ti congrégation.

10 Nyen la ala yeke sara na ngoi so ala wara terê? A-ancien ni ayeke sara lisoro na mo ti bâ wala mo mä yâ ti afango ye ti Bible nga mo yeda na ni, wala na yâ ti gigi ti mo ti lâ oko oko mo yeke sara ye alingbi na ye so Bible atene, nga ala yeke bâ wala mo ye biani ti ga Témoin ti Jéhovah. Girisa ape so a-ancien ayeke bâ ndo na ndö ti azo ti congrégation kue nga na ndö ti mo nga kue, tongaso sara mbeto ti sara tënë na ala pëpe (Kusala 20:28; 1 Pierre 5:2, 3). Na peko ti warango terê ni, a-ancien ni ayeke fa na mo wala mo lingbi ti komanse ti fa tënë legeoko na congrégation.

11. Ngbanga ti nyen a yeke kota ye ti tene mo sara achangement kozo si mo lingbi ti fa tënë legeoko na congrégation?

11 A-ancien alingbi ti tene na mo so a lingbi mo sara ambeni changement kozo si mo lingbi ti komanse ti fa tënë legeoko na congrégation. Ngbanga ti nyen a yeke kota ye ti tene mo sara achangement so? Ngbanga ti so  tongana e yeke fa tënë ti Nzapa na azo, e yeke sara kua na iri ti Jéhovah na a lingbi asarango ye ti e amû gloire na lo.—1 aCorinthien 6:9, 10; aGalate 5:19-21.

CHANGÉ BÊ TI MO NGA NA LEGE TI MO

12. Ngbanga ti nyen la azo kue ayeke na bezoin ti changé bê ti ala?

12 Mbeni ye nde ayeke dä so a lingbi mo sara ni kozo si mo lingbi ti wara batême. Bazengele Pierre atene: “Ala changé bê ti ala, na ala changé lege ti ala si a zi asiokpari ti ala.” (Kusala 3:19). Ti changé bê aye ti tene nyen? A ye ti tene mo sara vundu ndali ti asioni ye kue so mo sara. Na tapande, tongana mo sara lani lango-sioni, a lingbi mo changé bê ti mo. Nga, même tongana na yâ ti gigi ti mo kue mo sara kue ti sara gï ye na lege ni, mo yeke lakue na bezoin ti changé bê ti mo, ndali ti so e kue e yeke sara siokpari na e bezoin ti hunda Nzapa ti pardonné e.—aRomain 3:23; 5:12.

13. Ti “changé lege” ti mo aye ti tene nyen?

13 Tongana mo sara vundu ndali ti asioni ye so mo sara, a lingbi awe? Ên-ën. Pierre atene so a lingbi nga mo “changé lege” ti mo. So ti tene mo bezoin ti zia lege ti angbene sioni sarango ye ti mo kue nga mo komanse ti sara ye na lege ni. Zia e mû mbeni tapande, tara ti bâ so mo yeke gue na mbeni ndo so ade mo si dä lâ oko pëpe. Na peko ti so mo hon ayo kete, mo bâ so nzoni lege ni la mo mû so pëpe. Nyen la mo yeke sara? Kite ayeke dä ape so mo yeke luti, mo tourné mo mû nzoni lege ni. Legeoko nga, na ngoi so mo yeke manda Bible, mo bâ so ambeni sarango ye ti mo ayeke dä so a lingbi mo changé ni. Duti nduru ti “changé lege” ti mo, so ti tene, sara achangement so a hunda ti tene mo sara ni, na komanse ti sara ye so ayeke na lege ni.

 MÛ TERÊ TI MO NA NZAPA

Mo mû zendo na Jéhovah ti sara na lo?

14. Mo yeke mû terê ti mo na Nzapa tongana nyen?

14 Mbeni kpengba ye so a lingbi mo sara kozo ti wara batême ayeke ti mû terê ti mo na Jéhovah. Na ngoi so mo yeke mû terê ti mo na Jéhovah, mo yeke tene na lo mbeni sambela so na yâ ni mo mû zendo ti voro gï lo oko na mo mû zendo ti zia si aye so bê ti lo aye aduti kota ye na yâ ti fini ti mo.—Deutéronome 6:15.

15, 16. Nyen la ayeke pusu mbeni zo ti mû terê ti lo na Nzapa?

15 Ti mû zendo ti sara gï na Jéhovah ayeke tongana mungo zendo ti ye mbeni zo na yâ ti tanga ti fini ti mo kue. Tara ti bâ so mbeni koli na wali ayeke bâ terê. Tongana koli ni agi ti hinga wali ni nzoni mingi, lo yeke ye lo mingi nga lo yeke ye ti sara mariage na lo. Atâa so a yeke mbeni kota desizion la, koli ni ayeke yeda ti sara ni ndali ti so lo ye wali ni.

16 Tongana mo manda ye na ndö ti Jéhovah, mo yeke ye lo nga mo yeke sara kue ti sara na lo. A yeke pusu mo ti tene na lo mbeni sambela ti mû zendo ti sara na lo. Bible atene so zo kue so aye ti mû peko ti Jésus, a lingbi lo “ke terê ti lo wani”. (Marc 8:34). Tënë so aye ti tene nyen? A ye ti tene so mango yanga ti Jéhovah ayeke ga na kozo ndo na yâ ti fini ti mo. Ye so Jéhovah aye ayeke kota mingi ahon aye so mo ye nga na aye so mo leke ti sara.—Diko 1 Pierre 4:2.

SARA PËPE MBETO TI TÏ

17. Ngbanga ti nyen la ambeni zo amû terê ti ala na Jéhovah ape?

17 Ambeni zo amû terê ti ala na Jéhovah pëpe ndali ti so ala sara mbeto so ala lingbi pëpe ti sara ye alingbi na zendo so ala mû ti sara na lo. Ala ye pëpe ti zia vundu na bê ti Jéhovah, wala peut-être ala tene so tongana ala mû  terê ti ala na Jéhovah pëpe, lo yeke zia tënë ti ye so ala yeke sara na li ti ala pëpe.

18. Nyen la ayeke mû maboko na mo ti hon ndö ti mbeto ti zia vundu na bê ti Jéhovah?

18 Yengo so mo ye na Jéhovah ayeke mû maboko na mo ti hon ndö ti mbeto ti zia vundu na bê ti lo. Ndali ti so mo ye lo, mo yeke sara kue ti sara ye alingbi na zendo so mo mû na lo (Zo-ti-fa-tene 5:4; aColossien 1:10). Mo yeke pensé pëpe so a yeke ngangu mingi ti sara ye so Jéhovah aye. Bazengele Jean atene: “Ndoye ti Nzapa ayeke so: e bata acommandement ti lo; me acommandement ti lo ayeke ye so ane pëpe.”—1 Jean 5:3.

19. Ngbanga ti nyen a lingbi mo sara mbeto pëpe ti mû terê ti mo na Jéhovah?

19 Mo bezoin pëpe ti ga mbilimbili-kue si mo mû terê ti mo na Jéhovah. Lo hunda na e lâ oko pëpe ti sara ye ahon ti so e lingbi ti sara (Psaume 103:14). Lo yeke mû maboko na mo ti sara ye na lege ni (Ésaïe 41:10). Zia bê ti mo kue na Jéhovah na “lo yeke sara si alege ti mo aga nzoni.”—aProverbe 3:5, 6.

TENE NA YANGA TI MO DANDARA SO MO MÛ TERÊ TI MO NA NZAPA

20. Na peko ti so mo mû terê ti mo na Nzapa awe, nyen la mo yeke sara na pekoni?

20 Mo pensé so mo yeke nduru ti mû terê ti mo na Jéhovah? Na peko ti so mo mû terê ti mo na Jéhovah awe, mo yeke nduru ti sara ye so aga na pekoni. A lingbi mo wara batême.

21, 22. Tongana nyen la mo lingbi ti fa “dandara” tënë ti mabe ti mo?

21 Fa na coordinateur ti bungbi ti a-ancien ti congrégation ti mo so mo mû terê ti mo na Jéhovah awe na mo ye ti wara batême. Na pekoni, lo yeke hunda na ambeni  ancien ti kiri ti bâ legeoko na mo akota fango ye ti Bible. Tongana ala bâ so mo lingbi awe, ala yeke tene na mo so mo lingbi ti wara batême na ngoi ti kota bungbi ti aTémoin ti Jéhovah so ayeke ga. Na ngoi ti kota bungbi ni, a yeke mû mbeni diskur so na yâ ni a yeke fa nda ti batême. Ita so ayeke mû diskur ni ayeke hunda ambeni tënë use so akpengba pëpe na ala so aye ti  wara batême ni. Na ngoi so mo yeke kiri tënë na ahunda so, mo yeke fa “dandara” tënë ti mabe ti mo.—aRomain 10:10.

22 Na pekoni, a yeke batize mo. A yeke yôro mo kue na yâ ti ngu. Batême ni ayeke fa na azo kue so mo mû  terê ti mo na Jéhovah awe na mo yeke fadeso Témoin ti Jéhovah.

BATÊME AYE TI TENE NYEN?

23. Ti batize zo “na iri ti Babâ, ti Molenge na ti yingo vulu” aye ti tene nyen?

23 Jésus atene lani so a yeke batize adisciple ti lo “na iri ti Babâ, ti Molenge na ti yingo vulu.” (Diko Matthieu 28:19.) So aye ti tene nyen? A ye ti tene so mo yeda na komandema ti Jéhovah, mo hinga kua so Jésus ayeke na ni na yâ ti ye so Nzapa aleke na bê ti lo ti sara nga mo hinga tongana nyen la Nzapa ayeke sara kua na yingo vulu ti lo ti sara ye so bê ti lo aye.—Psaume 83:18; Matthieu 28:18; aGalate 5:22, 23; 2 Pierre 1:21.

Tongana mo wara batême, mo fa so mo ye ti sara ye so Nzapa aye

24, 25. (a) Batême aye ti tene nyen? (b) Ndangba chapitre ti mbeti so ayeke sara tënë na ndö ti nyen?

24 Batême aye ti tene mbeni ye so ayeke kota mingi. Tongana a yôro mo na yâ ti ngu, a ye ti tene so mo kui awe, wala mo zia lege ti angbene sarango ye ti mo awe. Tongana mo sigi na yâ ti ngu, mo komanse mbeni fini gigi ti sara ye so Nzapa aye. A ye ti tene ti fadeso mo yeke sara na Jéhovah. Girisa ape so mo mû terê ti mo pëpe na mbeni zo, na mbeni bungbi wala na mbeni kua. Mo mû terê ti mo na Jéhovah.

25 Mungo terê ti mo na Jéhovah ayeke mû maboko na mo ti lë kpengba songo na lo (Psaume 25:14). A ye ti tene pëpe so a yeke sö mbeni zo gï ndali ti so lo wara batême. Bazengele Paul atene: “Ala ngbâ ti sara kua ndali ti salut ti ala wani juska aga nzoni; ala sara ni tongana azo so ayeke na mbeto nga so terê ti ala adö.” (aPhilippien 2:12). Batême ayeke gï tongo nda ni. Me tongana nyen la mo lingbi ti ngbâ nduru na Jéhovah? Ndangba chapitre ti mbeti so ayeke kiri tënë na hundango ndo so.