Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible alingbi ti fa nyen na e?

 CHAPITRE BALE-OKO NA OMENE

Mû desizion ti voro Nzapa

Mû desizion ti voro Nzapa

1, 2. Hundango ndo wa la a lingbi mo hunda terê ti mo na ni? Ngbanga ti nyen la a yeke kota ye?

NA LEGE ti mandango Bible, mo hinga awe so mingi ti azo so atene ala yeke voro Nzapa ayeke fa aye nga ayeke sara aye so Nzapa ake (2 aCorinthien 6:17). Ndani la Jéhovah ahunda na e ti sigi na yâ ti bungbi ti nzapa ti wataka, “Babylone, Ngangu gbata”. (Apocalypse 18:2, 4). Nyen lo mo yeke sara? E oko oko e yeke na mbeni ye ti soro ni, nga a lingbi e hunda terê ti e: ‘Mbi ye ti voro Nzapa na lege so lo ye? Wala mbi ye ti voro lo gï tongana ti so mbi yeke sara ka?’

2 Tongana mo sigi na yâ ti mbeni bungbi ti nzapa ti wataka wala mo ke ni awe, so ayeke nzoni. Me peut-être ambeni sarango ye wala angobo ti bungbi ti nzapa ti wataka ayeke dä so angbâ ti nzere na mo na yâ ti bê ti mo. Zia e sara tënë na ndö ti ambeni sarango ye wala angobo ni so ti bâ ndani so a yeke kota ye ti tene mo bâ ni tongana ti so Jéhovah abâ na ni.

VORONGO AYANDA NGA NA VORONGO AKOTARA

3. (a) Ngbanga ti nyen la a lingbi ti duti ngangu na ambeni zo ti zia lege ti vorongo ayanda? (b) Bible atene nyen na ndö ti sarango kua na ayanda ti voro na Nzapa?

3 Ambeni zo asara kua na ayanda wala ala leke ambeni ndo na yâ ti da ti ala ti voro na Nzapa teti angu mingi. Tongana mo kue mo sara tongaso, peut-être mo yeke bâ so a yeke na lege ni kue pëpe wala a yeke sioni ti voro Nzapa sân aye ni so. Me girisa ape so Jéhovah afa na e tongana nyen la e lingbi ti voro lo. Nga Bible afa na e polele so  Jéhovah aye pëpe ti tene e sara kua na ayanda na yâ ti vorongo ti e.—Diko Exode 20:4, 5; Psaume 115:4-8; Ésaïe 42:8; 1 Jean 5:21.

4. (a) Ngbanga ti nyen la a lingbi e voro akotara ti e ape? (b) Ngbanga ti nyen la Jéhovah atene na azo ti lo ti gi pëpe ti sara tënë na akuâ?

4 Ambeni zo alingbi ti mû ngoi nga na ngangu ti ala mingi ti gi ti nzere na lê ti akotara ti ala so akui awe. Ala lingbi même ti voro ala. Me e manda awe so azo so akui awe alingbi pëpe ti mû maboko na e wala ti sara sioni na e. Ala yeke na fini na mbeni ndö pëpe. Biani, a yeke sioni ti gi ti sara lisoro na ala ndali ti so atënë kue so akpa mo bâ mo tene alondo na mbeni fami ti e so akui alondo biani na asioni yingo. Ndani la Jéhovah ahunda lani na azo ti Israël ti gi pëpe ti sara tënë na akuâ wala ti sara pëpe aye so andu asioni yingo.—Deutéronome 18:10-12; bâ Kete tënë 26 na 31.

5. Nyen la alingbi ti mû maboko na mo ti zia lege ti sarango kua na ayanda ti voro na Nzapa nga ti zia lege ti vorongo akotara ti mo?

5 Nyen la alingbi ti mû maboko na mo ti zia lege ti sarango kua na ayanda ti voro na Nzapa wala ti zia lege ti vorongo akotara ti mo? A lingbi mo diko Bible nga mo gbu li ti mo nzoni na ndö ti lege so Jéhovah abâ na aye so. Lo bâ ni tongana “mbeni ye so ayeke sioni mingi,” wala lo ke ni ngangu (Deutéronome 27:15). Sambela Jéhovah lâ na lâ ti mû maboko na mo ti duti na mara bango ndo ti lo nga ti mû maboko na mo ti voro lo na lege so lo ye (Ésaïe 55:9). Hinga so Jéhovah ayeke mû na mo ngangu so mo bezoin ni ti zi na terê ti mo aye kue so andu vorongo ti wataka.

A LINGBI E SARA MATANGA TI NOËL?

6. Ngbanga ti nyen la a soro lango 25 ti décembre ti sara na matanga ti dungo Jésus?

6 Na yâ ti dunia, matanga ti Noël ayeke mbeni matanga  so azo mingi ahinga ni nga mingi ti azo apensé so ayeke matanga ti dungo Jésus. Me matanga ti Noël ague oko na vorongo ti wataka. Mbeni bakari afa so apaïen so ayeke aRomain ayeke sara matanga ti dungo lâ na lango 25 ti décembre. Akota zo ti eglize aye lani ti tene apaïen mingi aga aChrétien, ni la atâa so a dü Jésus pëpe na lango 25 ti décembre, ala soro ti sara matanga ti dungo Jésus na lango ni so (Luc 2:8-12). Adisciple ti Jésus asara lani matanga ti Noël pëpe. Mbeni mbeti (Sacred Origins of Profound Things) afa so, a sara ngu 200 na peko ti dungo Jésus, “zo oko ahinga lani pëpe mbilimbili lango so a dü na lo, na a gbu bê ti azo mingi pëpe.” A komanse ti sara matanga ti Noël angu ngbangbo mingi na peko ti kuâ ti Jésus.

7. Ngbanga ti nyen la atâ Chrétien ayeke sara pëpe matanga ti Noël?

7 Azo mingi ahinga ndo so matanga ti Noël alondo dä nga angobo ni, so ti tene sarango matanga ni nga na mungo acadeau. Na tapande, na mbeni ngoi, a ke ti sara matanga ti Noël na Angleterre nga na ambeni kodro ti Amerika ndali ti so alondo na apaïen. A yeke punir lani zo kue so asara ni. Me yeke yeke a kiri a komanse ti sara matanga ti Noël. Ngbanga ti nyen la atâ Chrétien ayeke sara pëpe matanga ti Noël? Ngbanga ti so ala ye ti nzere na lê ti Nzapa na yâ ti aye kue.

A LINGBI E SARA MATANGA TI DUNGO ZO?

8, 9. Ngbanga ti nyen la akozo Chrétien ayeke sara lani pëpe matanga ti dungo zo?

8 Mbeni matanga so azo mingi ayeke sara ni ayeke matanga ti dungo zo. A lingbi aChrétien asara matanga ti dungo zo? Bible asara gï tënë ti matanga ti dungo zo so azo so avoro Jéhovah pëpe la asara ni (Genèse 40:20; Marc 6:21). A sara lani amatanga ti dungo zo ti mû gloire na anzapa ti wataka. Ndani la akozo Chrétien “abâ matanga ti dungo zo tongana sarango ye ti apaïen.”—The World Book Encyclopedia.

 9 A-Romain nga na aGrec ti giriri amä na bê lani so mbeni yingo ayeke dä na ngoi ti dungo zo oko oko, nga yingo ni so ayeke bata zo ni na yâ ti gigi ti lo. Mbeni mbeti (The Lore of Birthdays) afa so “tongana a dü mbeni zo na oko lango so a dü na mbeni nzapa, yingo ni so ayeke na mbeni songo so zo amä yâ ni pëpe na nzapa ni.” Legeoko nga, laso azo mingi apensé so mbeni nzapa ayeke dä ndali ti lango ti dungo zo oko oko kue.

10. Ngbanga ti nyen la aChrétien ti laso ayeke sara pëpe amatanga ti dungo zo?

10 Mo pensé so a nzere na Nzapa ti tene azo asara amatanga so ague oko na bungbi ti nzapa ti wataka? (Ésaïe 65:11, 12). Ên-ën. Ndani la si e yeke sara pëpe amatanga ti dungo zo wala amatanga kue so ague oko na bungbi ti nzapa ti wataka.

A YEKE BIANI KOTA YE?

11. Ngbanga ti nyen la ambeni zo ayeke sara amatanga? A lingbi nyen la aduti kota ye na lê ti e?

11 Ambeni zo ahinga so matanga ti Noël nga na ambeni matanga alondo na apaïen, me ala ngbâ ti sara ni. Ala bâ so amatanga ayeke gï mbeni nzoni ngoi ti sara ngia legeoko na sewa. Mo kue mo bâ tongaso? Tongana mo ye ti sara ngia legeoko na sewa ti mo, a yeke sioni ape. Jéhovah la azia gere ti sewa na sese na lo ye ti tene e duti na nzoni songo na azo ti sewa ti e (aÉphésien 3:14, 15). Ye oko, a lingbi e gi ti duti na nzoni songo na Jéhovah ahon ti nzere na lê ti afami ti e na sarango amatanga ti abungbi ti nzapa ti wataka. Ndani la bazengele Paul atene: “Ala ngbâ ti bâ yâ ti aye nzoni ti hinga ye so anzere biani na lê ti Seigneur.”—aÉphésien 5:10.

12. Nyen la ayeke sara si Jéhovah ayeda pëpe na mbeni matanga?

12 Azo mingi abâ so ndo so mbeni matanga alondo dä ayeke ye oko ape, me Jéhovah abâ ti lo ye ni tongaso pëpe.  Lo yeda pëpe na mbeni matanga so alondo na bungbi ti nzapa ti wataka wala so agonda azo wala akodro. Na tapande, azo ti Égypte ayeke sara lani amatanga mingi ndali ti anzapa ti wataka ti ala. Na peko ti so azo ti Israël asigi lani na Égypte, ala mû peko ti sarango mbeni matanga ti apaïen ti azo ti Égypte na ala iri ni “matanga ndali ti Jéhovah.” Me Jéhovah apunir lani ala ndali ni (Exode 32:2-10). Tongana ti so prophète Ésaïe atene, a lingbi e “ndu pëpe mbeni ye so aga sioni awe”.—Diko Ésaïe 52:11.

SARA YE NA AZO NA NZONI BÊ

13. Ahundango tënë wa la mo lingbi ti hunda na terê ti mo na ngoi so mo mû desizion ti zia lege ti sarango amatanga?

13 Na ngoi so mo mû desizion ti zia ti sara amatanga, mo lingbi ti duti na ahundango tënë mingi. Na tapande: Nyen la a lingbi mbi sara tongana amba ti mbi ti place ti kua ahunda na mbi ndani so mbi yeke sara pëpe matanga ti Noël? Nyen la a lingbi mbi sara tongana mbeni zo amû na mbi cadeau ti Noël? Nyen la a lingbi mbi sara tongana wali wala koli ti mbi aye ti tene mbi sara mbeni matanga? Tongana nyen la mbi lingbi ti mû maboko na amolenge ti mbi ti sara vundu pëpe ndali ti so ala sara pëpe mbeni matanga wala matanga ti dungo ala?

14, 15. Nyen la mo lingbi ti sara tongana mbeni zo atene na mo nzoni matanga wala lo mû na mo mbeni cadeau?

14 A yeke kota ye ti sara kua na ngangu ti gbungo li ti mo na ngoi so mo ye ti tene tënë wala ti sara mbeni ye na yâ ti aye so oko oko kue. Na tapande, tongana azo atene na mo nzoni matanga, a lingbi mo ke ni pëpe. Mo lingbi ti tene gï: “Merci.” Me tongana mbeni zo aye ti hinga ambeni ye na ndö ni, mo lingbi ti fa na lo ndani so mo yeke sara matanga ni pëpe. Ye oko, sara ye lakue na nzoni bê, na ndara, nga na  nengo zo. Bible atene: “Zia lakue tënë ti yanga ti ala aduti nzoni, ala zia ingo dä, si ala hinga tongana nyen la a lingbi ala kiri tënë na zo oko oko.” (aColossien 4:6). Peut-être mo lingbi ti fa na zo ni so mo ye mingi ti mû ngoi ti duti na amba ti mo nga ti mû acadeau na azo me mo ye pëpe ti sara ni na ngoi ti amatanga ni so.

15 Nyen la a lingbi mo sara tongana mbeni zo amû na mo mbeni cadeau? Bible amû mbeni molongo ti andia na ndö ni pëpe, me a tene a lingbi e ngbâ ti duti na nzoni conscience (1 Timothée 1:18, 19). Peut-être zo so amû na mo cadeau ni ahinga pëpe so mo yeke sara ka pëpe matanga ni so. Wala lo lingbi ti tene: “Mbi hinga so mo yeke sara matanga ni so pëpe, me mbi ye ti mû ye so na mo.” Na yâ ti aye so, a yeke na mo ti bâ wala mo lingbi ti mû cadeau ni wala pëpe. Me atâa desizion wa la mo mû, sara kue ti duti na nzoni conscience. E ye pëpe ti sara mbeni ye so ayeke buba songo ti e na Nzapa.

MO NA SEWA TI MO

Azo so asara na Jéhovah ayeke na ngia

16. Nyen la a lingbi mo sara tongana azo ti sewa ti mo aye ti sara amatanga so alondo na apaïen?

16 Nyen la a lingbi mo sara tongana azo ti sewa ti mo aye ti sara mbeni matanga so alondo na apaïen? Mo bezoin ti papa na ala pëpe. Girisa ape so ala yeke na droit ti sara ye so ala ye. Sara ye na nzoni bê nga bâ na nene ni ye so ala ye ti sara gï tongana ti so mo ye ala sara na mo. (Diko Matthieu 7:12.) Me ka tongana azo ti sewa ti mo aye ti tene mo na ala asara ngia na ngoi ti matanga ni, a lingbi mo sara nyen? Kozo ti sara mbeni ye, sambela Jéhovah ti mû maboko na mo ti mû nzoni desizion. Gbu li ti mo na ndö ni, nga gi nda ti ye na ndö ni. Girisa ape so mo ye lakue ti sara ye so anzere na Jéhovah.

17. Nyen la mo lingbi ti sara ti mû maboko na amolenge ti mo ti tene ala bâ pëpe so mbeni ye ahon ala tongana amba ti ala ayeke sara amatanga?

 17 Tongana amolenge ti mo ayeke bâ amba ti ala na sarango amatanga so, nyen la mo lingbi ti sara ti mû maboko na ala? Ngoi na ngoi mo lingbi ti leke ambeni ye so ayeke nde ndali ti ala. Mo lingbi ti ga na ala acadeau na ngoi so ala ku terê ti ala na ni pëpe. Nga, mbeni pendere cadeau so mo lingbi ti mû na ala ayeke ti duti na terê ti ala nga ti ye ala mingi.

MÛ MBAGE TI TÂ VORONGO

18. Ngbanga ti nyen la a lingbi e gue na abungbi?

18 Tongana e ye ti nzere na lê ti Jéhovah, a lingbi e zia lege ti bungbi ti wataka na angobo ti lo nga na amatanga so ague oko na ni. Me a lingbi nga e mû mbage ti tâ vorongo. E yeke sara ni tongana nyen? Mbeni lege ti sara ni ayeke ti ga lakue na abungbi ti aChrétien. (Diko aHébreu 10:24, 25.) Abungbi ayeke mbeni kpengba mbage ti tâ vorongo (Psaume 22:22; 122:1). E lingbi ti wa amba ti e na ngoi ti abungbi.—aRomain 1:12.

19. Ngbanga ti nyen a yeke kota ye ti sara tënë ti atâ tënë so mo manda na amba ti mo?

19 Mbeni ye so mo lingbi ti sara ti mû mbage ti tâ vorongo ayeke ti sara tënë ti aye so mo yeke manda na yâ ti Bible na amba ti mo. Azo mingi ayeke na vundu ndali ti aye so ayeke passé na ndö ti sese. Peut-être mo hinga ambeni zo ni. Sara tënë ti pendere beku ti mo ti kekereke na ala. Tongana mo yeke gue na abungbi ti aChrétien nga mo fa atâ tënë ti Bible na amba ti mo, mo yeke bâ ande so nzara ti bungbi ti nzapa ti wataka nga na asarango ye ti lo ayeke sigi na yâ ti mo. Duti na confiance so mo yeke duti na ngia nga Jéhovah ayeke sara tufa mingi na ndö ti ngangu so mo sara ti voro lo na lege so anzere na lo.—Malachie 3:10.