Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Akiringo tënë na ahunda 10 so amaseka ayeke hunda ka

 HUNDA 3

Tongana nyen la mbi peut ti sara tënë na babâ na mama ti mbi?

Tongana nyen la mbi peut ti sara tënë na babâ na mama ti mbi?

NDANI SO AYEKE KOTA YE

Tongana mo na babâ na mama ti mo amä tere nzoni, kekereke ti mo ayeke duti pendere mingi.

NYEN LA MO YEKE SARA?

Tara ti bâ ye so: A yeke na mbeni mercredi na lakui. Geoff, so ayeke na ngu 17, ahunzi ti sara akua so lo doit ti sara na yanga-da awe na lo pensé so nzoni l’heure ti tene lo wu tere ti lo la. Lo zi télé na lo tï kpo na ndo ti chaise ti lo so lo ye ni mingi.

Mo ye ti bâ, papa ti lo aga aluti na yanga ti porte na lo yeke na ngia ape.

“Geoffrey! Mo doit fade ti aidé ngambe ti mo na devoir ti lo, mo duti senge senge mo yeke bâ gi télé? Mo yeke sara lâ oko ape ye so a tene na mo ti sara.

Geoff adiko tënë na gbe ti go me zo alingbi ti mä ni, lo tene: “A kiri akomanse awe.”

Papa ti lo ayoro go ti lo, lo tene: “Mo tene nyen?”

Geoff atourné para ti lê ti lo, lo sara tënë yeke, lo tene: “Ye oko ape, Papa.”

Ti fadeso bê ti papa ti lo ason vrai. Lo tene: “Sara tënë na mbi na mara fason ni so ape.”

Tongana mo yeke fade na place ti Geoff, mo yeke sara tongana nyen ti tene papa so alondo ape?

GBU LI TI MO KETE!

Sarango lisoro na babâ na mama ti mo ayeke tongana kpengo na oto. Tongana mo tingbi na aye na ndo ti lege so akanga lege na mo ti hon, mo peut ti changé lege so mo ye ti hon dä.

 NA TAPANDE:

Mbeni molenge-wali so iri ti lo ayeke Leah atene: “Mbi bâ so a yeke ngangu na mbi ti sara lisoro na babâ ti mbi. Na ambeni ngoi mbi yeke sara tënë na lo, kete na pekoni lo tene: ‘Pardon, mo yeke sara fade tënë na mbi la?’”

LEAH AYEKE NA AYE OTA TONGASO TI SARA.

  1. Ti dekongo na li ti babâ ti lo.

    Leah adekongo, lo tene: “Mä mbi si Papa, a yeke important!”

  2. Ti zia lege ti sarango tënë na babâ ti lo.

    Leah azia gi lege ti sarango tënë ti kpale ti lo ni na babâ ti lo.

  3. Ti ku mbeni nzoni ngoi si lo kiri na ndo ti tënë ni encore.

    Na pekoni, lo sara tënë na babâ ti lo lê na lê wala lo sara tënë na ndo ti kpale ni na yâ ti lettre na babâ ti lo.

Na popo ti aye so, so wa la mo yeke tene na Leah ti sara?

BÂ YE SO: Pensé ti babâ ti Leah ayeke fade na ndo ti mbeni ye nde na lo hinga ape so bê ti Leah ason. Tongaso, tongana Leah asara ye so ayeke na A, babâ ti lo ayeke hinga ape ngbanga ti nyen la lo dekongo na li ti lo. Ye so ayeke sara si babâ ti lo ayeke mä tënë ti lo ni ape nga sarango ye tongaso afa so lo ne babâ ti lo ni ape (aÉphésien 6:2). Ti vrai ni, sarango ye so ayeke na A ayeke ga na ye ti nzoni na ala use kue ape.

Gi tongana ti so mo yeke zia pëpe si aye so akanga lege aduti fin ti lege ti mo, mo peut ti wara mbeni fason ti sara lisoro na babâ na mama ti mo

Atâa so a yeke ngangu ape ti sara ye so ayeke na B, a yeke nzoni sarango ye la ape. Ngbanga ti nyen? Ti tene Leah aleke akpale ti lo, lo bezoin ti sara tënë ni na babâ ti lo, nga ti tene babâ ti lo a-aidé lo, babâ ni abezoin ti hinga ye so lo vivre ni. Tongana Leah azi yanga ape lo yeke leke kpale ti lo ni ape nga babâ ti lo apeut ti aidé lo ape.

Ye oko, tongana Leah asara ye so ayeke na C, lo yeke zia pëpe si kpale ni akanga lege na lo ti sara effort ti sara lisoro na babâ ti lo. Lo yeke gi ti sara lisoro na babâ ti lo na ndo ti tënë ni na mbeni ngoi nde. Tongana Leah asara lettre na babâ ti lo, tere ti lo ayeke nzere hio na pekoni.

Ti sara lettre ni ayeke mû peut-être maboko na lo ti fa polele ye so lo ye ti tene. Na ngoi so babâ ti Leah ayeke diko ande lettre ni lo yeke hinga tënë so Leah aye fade ti tene na lo, ye so ayeke aidé lo peut-être ti hinga kpale ti lo ni nzoni. Tongaso, Leah na babâ ti lo ayeke bâ nzoni na peko ti ye so ayeke na C. Atâa Leah asara tënë na babâ ti lo lê na lê wala na lettre, a gue oko na wango ti Bible so ahunda ti “tomba peko ti aye so ayeke ga na siriri”.—aRomain 14:19.

Ambeni ye nde wa la Leah apeut ti sara ni?

Bâ wala mo peut ti pensé na mbeni ye oko, sara ni na place so ayeke na gbe ni ge. Na pekoni, fa ye so apeut ti ga na peko ni.

 TENE PËPE ATËNË SO AMÛ MBENI PENSÉ NDE NA ZO

Girisa ape so, a yeke pëpe lakue la babâ na mama ti mo ayeke mä yâ ti ye so mo ye ti tene.

NA TAPANDE:

Babâ na mama ti mo ahunda mo nyen la asara mo si mo duti kpô so? Mo tene: “Mbi ye ti sara tënë na ndo ni pëpe.”

Me ala mä ti ala so mo tene: “Mbi yeke na confiance kue na ala ape. Mbi yeke sara tënë ni na akamarade ti mbi me na ala ape.”

Tara ti bâ so mo yeke na yâ ti mbeni kota problème na babâ na mama ti mo aye ti aidé mo. Me mo tene: “Ala sara mbeto ape. Mbi yeke sigi dä senge.”

  • Peut-être babâ na mama ti mo amä ti ala so mo tene nyen?

  • Mbeni nzoni réponse so mo peut ti mû ayeke so wa?