Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Akiringo tënë na ahunda 10 so amaseka ayeke hunda ka

 HUNDA 7

Nyen la mbi yeke sara tongana mbeni zo apusu mbi ti bungbi na lo koli na wali?

Nyen la mbi yeke sara tongana mbeni zo apusu mbi ti bungbi na lo koli na wali?

NDANI SO A YEKE KOTA YE

Aye ti peko ti desizion ti mo na ndo ti bungbingo koli na wali ayeke ndu kekereke ti mo.

NYEN LA MO YEKE SARA?

Tara ti bâ ye so: Heather abâ Mike asara gi nze use, me na lo, a yeke mo bâ mo tene lo hinga lo aninga awe. Ala yeke tokua message na mba lakue, na ala yeke causé ka na téléphone aninga, ala hinga même tanga ti tënë ti mba. Me Mike aye ti lo mbeni ye nde ahon gi asenge causérie ni so.

Na yâ ti anze use so ahon so, Mike na Heather agbu maboko ti mba nga ala embrassé tere kete gi ye so ala sara awe la. Heather aye ti gue ayo ape. Me lo ye nga ti perdre Mike ape. Tongana lo yeke na tere ti Mike lo bâ so lo yeke pendere mingi nga lo yeke nde. Heather atene: ‘Na ndo ni, mbi na Mike e ye tere . . . ’

Tongana mo lingbi awe ti bâ tere na mbeni zo ndali ti mariage, si mo yeke fade Heather, nyen la mo yeke sara?

GBU LI TI MO KETE!

Bungbingo koli na wali ayeke mbeni cadeau so Nzapa amû ni gi na azo so asara mariage awe. Tongana mo bungbi koli na wali kozo na mariage andâ mo sara ye na cadeau so na lege ni ape. A yeke mo bâ mo tene mo mû mbeni pendere bongo so mbeni zo amû na mo, mo sara na chiffon

Tongana mo londo na yâ ti keke mo huru tongana ndeke mo yeke wara sioni na pekoni. A yeke nga tongaso tongana mo kpe pëpe ndia so andu nzoni sarango ye, na tapande ndia so atene: “Ala gbanzi tere ti ala na lango-sioni.”—1 aThessalonicien 4:3.

Tongana mo kpe ndia so ape aye ti pekoni ayeke nyen? Bible atene: “Zo so angbâ na yâ ti lango-sioni lo yeke sara siokpari na tere ti lo wani.” (1 aCorinthien 6:18). Lo yeke sara siokpari na tere ti lo ni tongana nyen?

 Awandara afa so gbâ ti amaseka so abungbi koli na wali kozo na mariage ayeke wara ka mbeni ye ti pekoni oko wala mingi tongana ti so a fa ni ge.

  • VUNDU. Mingi ti amaseka so abungbi koli na wali kozo na mariage atene so ala regretté na pekoni.

  • GINGO BÊ. Na peko ti so maseka-koli na maseka-wali ni abungbi koli na wali awe, zo oko oko ayeke hunda tere ti lo: ‘Zo wa la lo bungbi nga na lo koli na wali kozo ni na mbi?’

  • SONGO BÊ. Ti vrai ni, gbâ ti amolenge-wali aye mbeni zo so ayeke bata ala, me pëpe mbeni zo so aye ti wara gi mbeni ye na mbage ti ala. Nga, amolenge-koli mingi abâ so na peko ti so ala sigi na mbeni molenge-wali awe ala ye lo encore mingi ape.

  • Ti hunzi na ni: Tongana mo bungbi koli na wali kozo na mariage, mo yeke bi nengo ti mo na sese na lege so mo yeke buba ye so ngere ni ayeke ngangu mingi (aRomain 1:24). Tere ti mo ayeke pendere ye mingi, buba ni ape.

Fa so mo yeke na ngangu ti ‘gbanzi tere ti mo na lango-sioni’. (1 aThessalonicien 4:3). Na pekoni, mbeni lâ tongana mo sara mariage awe, mo peut ti bungbi koli na wali. Mo yeke duti na ngia mingi na pekoni na mo yeke gi bê ti mo ape, mo yeke regretté ape nga mbeto ayeke sara mo ape tongana ti azo so abungbi koli na wali kozo na mariage.—aProverbe 7:22, 23; 1 aCorinthien 7:3.

 MO TENE TI MO NYEN?

  • Mbeni zo so aye tâ mo ayeke zia pendere ti mo nga na atënë ti bê ti mo na yâ ti kpale?

  • Mbeni zo so ayeke pensé tâ na mo ayeke tara ti buba songo ti mo na Nzapa?—aHébreu 13:4.