Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Akiringo tënë na ahunda 10 so amaseka ayeke hunda ka

 HUNDA 2

Ngbanga ti nyen la mbi yeke gi bê ti mbi na ndo ti pendere ti mbi?

Ngbanga ti nyen la mbi yeke gi bê ti mbi na ndo ti pendere ti mbi?

NDANI SO A YEKE KOTA YE

Ambeni ye ayeke kota mingi ahon ye so mo yeke bâ na lê ti tatara.

NYEN LA MO YEKE SARA?

Tara ti bâ ye so: Tongana Julia abâ tere ti lo na lê ti tatara, lo bâ so lo kono mingi. Atâa so babâ na mama ti lo atene so lo yeke na kete tere, lo tene: “Mbi bezoin ti sara régime.”

Ade ti ninga ape, Julia apensé ti sara ambeni ngangu ye ti tene lo perdre “gi kilo 2 tongaso.” Ye so lo sara ayeke so lo ke ti te kobe teti ambeni lango . . .

Tongana mo yeke na mara pensé ti Julia so, nyen la mo yeke sara?

GBU LI TI MO KETE!

Ye so mo yeke pensé na ndo ti mo apeut ti kpa image ti mo so asigi nzoni ape na lê ti mbeni tatara so ayeke nzoni ape

A yeke sioni ape ti gi bê na ndo ti pendere ti mo. Girisa ape so Bible asara nzoni tënë na ndo ti pendere ti akoli na awali mingi so na popo ni mo yeke wara Sara, Rachel, Abigaïl, Joseph nga na David. Bible asara tënë ti mbeni wali so “ayeke pendere mingi” so iri ti lo ayeke Abisag.—1 aGbia 1:4.

Ye oko, amaseka mingi ayeke gi bê ti ala ahon ndo ni na ndo ti pendere ti ala. Ye so alingbi ti ga na akota kpale. Bâ ye so:

  • Mbeni gingo nda ti ye afa so, tongana a mû amolenge-wali 100 tongaso, 58 na popo ni atene so ala kono ahon ndo ni, me ti vrai ni, gi ala 17 la akono ahon ndo ni.

  • Mbeni gingo nda ti ye nde afa so, tongana a mû awali 100 tongaso, 45 na popo ni so ane nga mingi ape apensé so ala ne mingi.

  • Na ngoi so amaseka ayeke gi ti perdre poids, ala tï na yâ ti mbeni sarango ye, ala yeke te ye nzoni ape, ye so ayeke sara si ala yeke wara mbeni kobela so a iri ni anorexie.

 Tongana mo bâ so mo yeke na mara ti kobela so wala mbeni nde so aga na peko ti tengo ye nzoni ape, hunda ti tene a-aidé mo. Sara tënë ni kozoni na babâ wala mama ti mo wala na mbeni zo so mo yeke na confiance na lo. Bible atene: “Tâ ndeko andoye lakue; na lâ ti ye ti vundu, lo yeke tongana tâ ita.”—aProverbe 17:17.

AYE SO AYEKE NA LEGE NI TI TENE MO CHANGÉ NI!

Ti tâ tënë ni, a yeke ye so ayeke na yâ ti bê ti zo la alingbi ti sara si lo yeke pendere na lê ti azo wala pëpe. Gbu li na ndo ti Absalom molenge ti Gbia David. Bible atene:

“Mbeni zo oko so ayeke pendere tongana Absalom ayeke pëpe. . . . sioye oko ayeke na tere ti lo pëpe.”—2 Samuel 14:25.

Me, baba ahon ndo ti maseka-koli so, lo ye gi ti wara gbâ ti aye nga lo yeke zo ti handango zo. Tongaso, Bible asara nzoni tënë ti Absalom ape, Bible atene so lo yeke mbeni koli so ayeke be-ta-zo oko ape nga so ake zo na bê juska ti fâ zo ni.

A yeke na lege ni so Bible amû na e wango so:

“Ala yü fini zo.”—aColossien 3:10.

“Zia pendere ti ala aduti gi pendere ti gigi pëpe . . . , me zia pendere ti ala aduti ti zo ti yâ ni.”—1 Pierre 3:3, 4.

Atâa so a yeke sioni ape ti tene mo gi ti duti pendere, sarango ye ti mo la ayeke kota ye mingi ahon pendere ti mo. Tongana angu ayeke hon, apendere sarango ye ti mo la ayeke sara si mo nzere na lê ti azo ahon gbâ ti muscle so mo yeke na ni wala pendere ti mo. Mbeni molenge-wali so a iri lo Phylicia atene: “Pendere ti zo ayeke gboto lê hio mingi, me apendere sarango ye ti mo so ayeke pëpe gi ye ti handango lê ti zo la azo ayeke rappelé na ni mingi.”

BÂ TERE TI MO

Tere ti mo so mo yeke na ni, ayeke zia ka vundu na bê ti mo?

Mo pensé mbeni lâ awe ti sara mbeni opération wala ti sara mbeni ngangu régime ti leke mbeni ye ti tere ti mo so ayeke pendere ape?

Tongana mo peut fade ti changé mbeni ye na tere ti mo nyen la mo yeke changé ni? (Soro aye so andu mo.)

  • YONGO TI MO

  • POIDS TI MO

  • KUÄ TI LI TI MO

  • KONONGO TI MO

  • FACE TI MO

  • TEINT TI MO

Tongana mo tene en na akozo hunda use so nga mo soro aye ota wala ahon ni ti kiri tënë na ota hunda ni, hinga so: Peut-être azo abâ mo tongana ti so mo pensé na ni so ape. A yeke ngangu ape ti tene mo sara ye ahon ndo ni nga mo gi bê ti mo mingi na ndo ti pendere ti mo.—1 Samuel 16:7.