Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Akiringo tënë na ahunda 10 so amaseka ayeke hunda ka

 HUNDA 1

Mbi yeke zo wa?

Mbi yeke zo wa?

NDANI SO A YEKE KOTA YE

Tongana mo hinga asarango ye ti mo wani nga na aye so mo ye ayeke mû maboko na mo ti mû anzoni desizion tongana amba ti mo apusu mo ti sara sioni ye.

NYEN LA MO YEKE SARA?

Tara ti bâ ye so: Karen asi na place ti mbeni matanga ade ahon minute bale-oko ape na ngoi so lo mä na mbage ti peko go ti mbeni zo so lo hinga lo.

“Nyen la mo luti gi ge tongaso so?”

Karen atourné na lo bâ kamarade ti lo Jessica so agbu abouteille ti dede sämba use so a zi yanga ni. Ngangu sämba la ayeke na yâ ti abouteille ni. Jessica amû bouteille oko na Karen, lo tene “Eskê mo de kete mingi si mo peut ti sara ngia kete ape?”

Karen aye ti ke, me Jessica ayeke kamarade ti lo. Nga, Karen aye ti tene kamarade ti lo ni apensé ape so lo yeke na ngia ape. Na ndo ni, Jessica ayeke mbeni nzoni molenge-wali. Tongana lo yeke nyon sämba, sioni adoit ti duti dä ape. Karen atene na yâ ti bê ti lo: “A yeke gi senge sämba, drogue la ape.”

Tongana a zia mo na place ti Karen, nyen la mo yeke sara?

GBU LI TI MO KETE!

Ti mû nzoni desizion na yâ ti ye tongaso, mo bezoin ti duti na asarango ye so azo ahinga mo na ni. A yeke mbeni ngangu so ayeke fa asarango ye ti mo nga aye wa la mo ye. Tongana mo hinga tongaso, a yeke mû ngangu na mo ti mû desizion mo wani me ti zia si mbeni zo la amû ni na place ti mo ape.—1 aCorinthien 9:26, 27.

Tongana nyen la mo lingbi ti gi ti wara ngangu tongaso? Nzoni lege ti komanse ti wara ni ayeke ti kiri tënë na ahunda osio so ayeke ga na peko.

 1 AYE WA LA MBI KPENGBA DÄ?

Aye so mo peut ti sara nga na anzoni sarango ye ti mo alingbi ti sara si mo wara confiance na mo wani.

TAPANDE TI BIBLE: Bazengele Paul atene: “Même tongana kode ti sarango tënë atia mbi, ti tâ tënë ni hingango ye atia mbi pëpe.” (2 aCorinthien 11:6). So Paul ahinga Mbeti ti Nzapa nzoni, a sara si lo gbu ngangu lani na ngoi so azo atara lo. Lo zia pëpe si asioni tënë ti azo abuba yâ ti confiance ti lo wani.—2 aCorinthien 10:10; 11:5.

GBU LI NA NDO TI SARANGO YE TI MO: Sara na gbe ni ge mbeni ye so mo hinga ti sara ni nzoni.

Fadeso, fa mbeni pendere sarango ye so mo yeke na ni. (Na tapande, mo yeke bâ ka mawa ti zo? mo yeke mû ka ye na zo? mo yeke zo ti confiance? mo yeke sara ka ye na l’heure?)

2 AYE WA LA MBI WOKO DÄ?

Legeoko tongana kamba ti mbeni rambâi so alingbi ti fâ na place so awoko dä, asarango ye so a hinga mo na ni alingbi hio ti changé ti ga sioni mingi tongana mo zia si awokongo ti mo akomande mo.

TAPANDE TI BIBLE: Paul ahinga lani awokongo ti lo. Lo tene: “Na yâ ti bê ti mbi, mbi wara ngia biani na yâ ti ndia ti Nzapa, me mbi bâ na yâ ti amembre ti tere ti mbi mbeni ndia so ayeke sara bira na ndia ti bibe ti mbi na so ayeke gue na mbi tongana ngbâa na mbage ti ndia ti siokpari so ayeke na yâ ti amembre ti tere ti mbi.”—aRomain 7:22, 23.

GBU LI NA NDO TI SARANGO YE TI MO: Wokongo ti mo wa la mo yeke na bezoin ti manda ti hon ndo ni?

 3 AYE WA LA MBI PENSÉ TI SARA?

Tongana mo monté yâ ti mbeni taxi, mo yeke hunda na chauffeur ni ti tourné gi place oko juska carburant ti oto ti lo ni ahunzi? So ye ti buba la, nga mo yeke payé cher.

Ye so afa nyen? Aye so mo pensé ti sara ayeke fa lege na gigi ti mo nga ayeke sara si mo yeke tourné gi place oko ape. Mo yeke na mbeni ndo ti gue dä nga mo yeke leke tongana nyen ti si na ndo ni.

TAPANDE TI BIBLE: Paul atene: “Lege so mbi yeke kpe na loro ayeke kirikiri pëpe.” (1 aCorinthien 9:26). Paul azia pëpe si aye so asi na yâ ti fini ti lo la apusu lo ti sara ye me lo leke na bê ti lo ti sara ambeni ye na lo sara ye alingbi na ni.—aPhilippien 3:12-14.

GBU LI NA NDO TI SARANGO YE TI MO: Sara na gbe ni ge aye ota so mo pensé ti sara na yâ ti ngu so ayeke ga.

4 AYE WA LA MBI MÄ NA BÊ NA NI?

Tongana mo yeke na anzoni sarango ye so a hinga mo na ni, mo yeke tongana mbeni keke so gunda ni alï sese ngangu so alingbi ti luti ngangu na gbele akota pupu.

Tongana mo mä na bê na mbeni ye ape, mo peut ande ti mû adesizion ape. Legeoko tongana mbeni caméléon so ayeke changé couleur, mo yeke changé asarango ye ti mo ti kpa ti amba ti mo. Ye so afa biani so mo yeke na asarango ye so a hinga mo na ni ape.

Me, tongana asarango ye ti mo ague oko na aye so mo mä na bê na ni, mo yeke ngbâ gi na asarango ye so a hinga mo na ni, atâa amba ti mo asara nyen.

TAPANDE TI BIBLE: Âmanke na ngoi so prophète Daniel angbâ maseka lani, lo ‘leke na bê ti lo’ so lo yeke sara ye alingbi na andia ti Nzapa, atâa so lo yeke yongoro na afami ti lo (Daniel 1:8). Na sarango tongaso, lo ngbâ gi na ndo ti tënë ti lo. Daniel asara ye lani ague oko na aye so lo mä na bê na ni.

GBU LI NA NDO TI SARANGO YE TI MO: Aye wa la mo mä na bê na ni? Na tapande: Mo mä na bê na Nzapa? Tongana a yeke tongaso, ngbanga ti nyen? Nyen la afa na mo biani so lo yeke dä?

Mo yeda biani so andia ti Nzapa ayeke ndali ti nzoni ti mo wani? Tongana a yeke tongaso, ngbanga ti nyen?

Ti hunzi na ni, nyen la mo ye ti kpa ni: mbeni hulengo kugbe so pupu ayeke hon na ni kirikiri wala mbeni keke so aluti ngangu atâa so ngangu pupu asara? Ngbâ lakue ti duti na asarango ye so a hinga mo na ni si mo ga tongana keke so. Ye so ayeke mû maboko na mo ti kiri tënë na hunda so, Mbi yeke zo wa?