Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Akiringo tënë na ahunda 10 so amaseka ayeke hunda ka

 HUNDA 5

Nyen la mbi yeke sara tongana azo agi yanga ti mbi na ekole?

Nyen la mbi yeke sara tongana azo agi yanga ti mbi na ekole?

NDANI SO A YEKE KOTA YE

Fason so mo yeke sara na ye apeut ti sara si aye aga nzoni wala sioni.

NYEN LA MO YEKE SARA?

Tara ti bâ ye so: Thomas aye ti gue na ekole laso ape, même kekereke kue lo ye ti gue ape. Wala lo ye ti gue na ekole encore ape. Ye ni akomanse asara nze ota awe, amba ti lo ti ekole atene asioni mvene na ndo ti lo. Na pekoni, ala zia mbeni iri na ndo ti lo. Na mbeni ngoi mbeni zo aga apika alivre ti lo na maboko ti lo atuku, na zo ni asara ye bâ mo tene lo sara na mbana ape wala mbeni zo na yâ ti groupe so ayeke na mbage ti peko ti lo aga apusu lo, tongana Thomas atourné lo hinga zo so apusu lo so ape. Biri ala kiri agi yanga ti lo ngangu na lege ti a-sms so ala tokua na lo . . .

Tongana mo yeke fade Thomas, nyen la mo yeke sara?

GBU LI TI MO KETE!

Mo kue mo yeke na ngangu kamême. Ti vrai ni mo peut ti kanga yanga ti zo so agi yanga ti mo sân ti tiri na lo. Mo peut ti sara ni tongana nyen?

  •   DUTI KPÔ. Bible atene: “Wabuba afa na gigi ngonzo ti lo kue, me zo ti ndara agbanzi ngonzo ti lo, na lo sara si ngonzo ni adë.” (aProverbe 29:11). Tongana mo sara kue ti duti kpô na lê ti azo, même tongana bê ti mo ayeke pika, azo so ayeke gi yanga ti mo apeut ti zia mo kpô.

  • KIRI SIONI TETI SIONI APE. Bible atene: “Ala kiri sioni teti sioni na mbeni zo pëpe.” (aRomain 12:17). Tongana mo gi ti kiri sioni teti sioni, ye ni ayeke kiri ti ga sioni mingi.

  • GUE PËPE NA NDO SO KPALE AYEKE DA. Bible atene: “Zo ti ndara abâ ye ti sioni, na lo honde tere ti lo.” (aProverbe 22:3). Sara kue ti gue pëpe nduru na azo so apeut ti son li ti mo nga gue pëpe na ndo so azo apeut ti gi yanga ti mo dä.

  • TENE MBENI TËNË SO ZO NI APENSÉ FADE NA NI APE. Bible atene: “Zo so akiri tënë doucement, lo sara si ngonzo adë.” (aProverbe 15:1). Mo peut même ti tene tënë ti ngia. Na tapande, tongana mbeni zo atene na mo atene nyen la mo tï kilo tongaso? Mo peut ti tene na lo, mo tene: “Mbi pensé ti sara ande régime.”

  • HON YE TI MO. Nora, so ayeke na ngu 19, atene: “Tongana mo duti kpô andâ mo kpengba koli wala wali awe nga mo yeke fa so mo yeke na ngangu mingi ahon zo so ayeke gi yanga ti mo. A fa so mo kanga bê me zo so agi yanga ti mo akanga bê ape.”—2 Timothée 2:24.

  • SARA KUE TI SARA MBETO APE. Azo ti gingo yanga apeut ti hinga azo ti mbeto nga na azo so apeut ti luti na ala ape. Me tongana ala bâ so mo sara mbeto ape ala yeke kpe mo.

  • SARA TËNË NI NA MBENI ZO. Mbeni ngbene prof atene: “Mbi tene na azo kue so azo agi yanga ti ala ti sara tënë ni na mbeni zo. Ye so ala doit ti sara la nga apeut ti sara si azo ni so agi yanga ti ambeni zo ape.”

Tongana mo sara mbeto ape mo yeke wara ngangu so zo so ayeke gi yanga ti mo ayeke na ni pëpe