Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  Novembre 2013

 KOTA MAMA-TENE NI | ATËNË TI MVENE SO ASARA SI AMBENI ZO AYE NZAPA APE

Tâ tënë alingbi ti zi mo

Tâ tënë alingbi ti zi mo

Mbeni lâ na Jérusalem, Jésus asara tënë na ndo ti Babâ ti lo, Jéhovah, nga lo yeke sigigi na nda ti akota zo ti nzapa ti wataka ti ngoi ni kâ (Jean 8:12-30). Tënë so lo tene na ngoi ni so afa na e ye so e doit ti sara ti hinga wala aye so azo amä na bê na ni laso na ndo ti Nzapa ayeke na lege ni wala pëpe. Jésus atene: “Tongana ala ngbâ na yâ ti tënë ti mbi, ala yeke biani adisciple ti mbi, na ala yeke hinga ande tâ tënë, na tâ tënë ayeke zi ala.”​—Jean 8:31, 32.

“Ngbâ na yâ ti tënë ti mbi”. Ge, Jésus aye ti fa na e ye so alingbi ti mû maboko na e ti hinga wala afango ye ti a-eglize ayeke “tâ tënë” wala pëpe. Tongana a fa na mo mbeni tënë na ndo ti Nzapa, hunda tere ti mo, ‘Tënë ni so alingbi tere na tënë so Jésus atene? A lingbi tere nga na tanga ti atënë so ayeke na yâ ti Bible? Sara ye tongana ti azo so lani tongana ala mä tënë so bazengele Paul afa, “lâ na lâ ala yeke gi nda ti Mbeti ti Nzapa nzoni ti bâ wala aye so a fa na ala ayeke tongaso biani.”​—Kusala 17:11.

Marco, Rosa, nga na Raymonde, so e sara fade tënë ti ala na kozo article ni, amû ngoi ti ala ti bâ yâ ti aye so ala mä na bê na ni so nzoni. Ala sara ni na lege so ala yeda ti tene aTémoin ti Jéhovah amanda Bible na ala. Aye ni so ala manda so asara nyen na ndo ti ala?

Marco: “Zo so amanda Bible na mbi na wali ti mbi akiri tënë na ahunda ti e kue gi na lege ti Bible. A sara si e komanse ti ye Jéhovah nga a sara si mbi na wali ti mbi e kiri e ye tere mingi.”

Rosa: “Kozo, mbi pensé ti mbi mbi tene Bible ayeke gi mbeni mbeti so azo la asigigi na ni ti fa atënë ti bê ti ala na ndo ti Nzapa. Me, yeke na yeke, mbi wara akiringo tënë na ahunda ti mbi na yâ ti Bible. A sara si fadeso, Jéhovah aga tâ zo na lê ti mbi. Lo ga nga Zo so mbi lingbi ti zia bê ti mbi kue na lo.”

Raymonde: “Mbi sambela lani Nzapa ti tene lo mû maboko na mbi ti manda ye na ndo ti lo. Hio na pekoni, mbi na koli ti mbi e komanse ti manda Bible. Na nda ni, e hinga tâ tënë na ndo ti Jéhovah! Tere ti e anzere mingi so e hinga ye na ndo ti lo fadeso.”

Bible afa nda ti atënë ti mvene so azo atene na ndo ti Nzapa. Me gi so ape, lo fa nga tâ tënë na ndo ti apendere sarango ye ti tere ti Nzapa ni. Bible ayeke Tënë ti yanga ti lo, nga amû maboko na e ti “hinga aye so Nzapa amû ni na e na nzoni bê.” (1 aCorinthien 2 :12). E wa mo ti bâ na lê ti mo wani tongana nyen la Bible ayeke kiri tënë na akota hundango ndo na ndo ti Nzapa, na ndo ti ye so lo ye ti sara nga na ndo ti kekereke ti e azo. Gue na “La Bible et vous > Questions Bibilques” na ndo ti site www.jw.org ti Français, na lï na yâ ti “La Bible et vous > Questions bibliques”, nga diko akiringo tënë na ambeni hunda ni. Gi na ndo ti site ni, mo lingbi nga ti hunda ti tene a ga a manda Bible na mo, wala bâ mbeni Témoin ti Jéhovah. Tongana mo sara tongaso, mo yeke bâ so a yeke ngangu pëpe ti ye Nzapa.