Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  Juillet 2013

 BIBLE ACHANGÉ FINI TI AZO

“Ti fadeso, mbi bâ so mbi lingbi pëpe ti changé dunia so”

“Ti fadeso, mbi bâ so mbi lingbi pëpe ti changé dunia so”
  • NGU SO A DÜ LO NA NI: 1966

  • KODORO SO A DÜ LO DÄ: FINLANDE

  • MBAÏ TI LO: LO TIRI NDALI TI NZONI TI AZO NA ANYAMA

GIGI TI MBI ÂNDÖ:

Depuis kete ti mbi, mbi ye mingi ti bâ apendere ndo. Mingi ni, sewa ti e ayeke gue lani ti bâ apendere gbako nga na angu-lende so angoro gbata ti Jyväskylä so e lango dä na kodoro ti Finlande. Mbi ye nga anyama mingi; na kete ti mbi, anyau na ambo so mbi bâ ala, mbi yeke gbu ala ti sara ngia na ala. Na ngoi so mbi kono, ye so azo ayeke sara ka na anyama ason bê ti mbi ngangu. Na pekoni mbi lï na yâ ti mbeni bungbi so ayeke tiri ndali ti nzoni ti anyama, na mbi wara tere na azo so bango ndo ti mbi na ala na ndo ti anyama ague oko.

E yeke tiri lani ngangu ndali ti nzoni duti ti anyama. E yeke sara tënë na azo nga e yeke tambela ti fa ngonzo ti bê ti e na ando so a yeke kä aporo ti anyama dä nga na ando so a yeke tara afini yorö na tere ti anyama dä. Même e zia na sese mbeni fini bungbi so ayeke tiri ndali ti nzoni ti anyama. So e zia angangu kode na sese, e na akota zo ti kodoro, e mä tere kete ape. Fani mingi, a gue na mbi na ngbanga.

Na ndo ti so tënë ti anyama agbu bê ti mbi mingi, mbi yeke gi lani bê ti mbi ndali ti akpale so ahon ndo ni na yâ ti dunia. A sara si mbi lï na yâ ti abungbi nde nde, tongana Amnistie internationale nga na Greenpeace, mbeni bungbi so abâ lege ti batango aye so angoro e. Mbi mû ngangu ti mbi kue ti sara kua ndali ti abungbi so. Mbi tiri lani ndali ti adroit ti awayere, azo so nzara ayeke fâ ala nga na ambeni zo ti mawa.

Me yeke yeke, mbi ga ti bâ so mbi lingbi ti changé dunia so ape. Atâa so abungbi so asara ngangu ti leke ambeni kete kpale, akota kpale ni aga gi sioni ahon ti kozo. Na bango ni, aye ti sioni amû ndo na yâ ti dunia, me zo oko ayeke koro dä ape. Mbi wani mbi bâ so mbi lingbi ti sara mbeni ye ape.

LEGE SO BIBLE ACHANGÉ FINI TI MBI:

So vundu asara mbi ndali ti so mbi yeke na ngangu ti sara mbeni ye ape, mbi komanse ti dabe ti mbi na Nzapa nga bê ti mbi atï na ndo ti Bible. Ândö aTémoin ti Jéhovah amanda Bible na mbi. Ndoye  so ala fa na mbage ti mbi nga bingo bê ti ala na mbi anzere na mbi mingi, me mbi yeke lani nduru ti changé sarango ye ti mbi ape. Me ti so ni so, ye ni achangé.

Mbi mû Bible mbi komanse ti diko ni. Tënë ni adë bê ti mbi. Mbi tï na ndo ti aversê so afa na e ti sara sioni na anyama ape. Na tapande, versê ti aProverbe 12:10 so atene: “Zo ti mbilimbili abata anyama ti lo nzoni.” Mbi bâ nga so Nzapa la ayeke ga na akpale na yâ ti dunia so ape, me akpale ti e ayeke ga gi sioni ahon ti kozo ndali ti so mingi ti azo aye ti mä Nzapa ape. Ye so mbi hinga na ndo ti ndoye ti Jéhovah nga kangango bê so lo yeke na ni apika bê ti mbi mingi.​—Psaume 103:8-14.

Na yâ ti angoi ni so, mbi wara mbeni mbeti ti aTémoin ti Jéhovah so asara tënë ti buku Bible afa nyen biani? Mbi hunda ti wara buku so. Kete na pekoni, mbeni koli na wali ti lo so ala yeke aTémoin ti Jéhovah aga na ndo ti mbi, ala hunda ti manda Bible na mbi na mbi yeda. Aye so mbi komanse ti manda na yâ ti Bible agbu bê ti mbi nga mbi komanse ti gue na bungbi na Da ti Royaume.

Grâce na Bible, mbi changé fini ti mbi. Mbi zia lege ti manga nga na nyongo sämba ahon ndo ni. Mbi changé fason ti yungo bongo ti mbi nga na ti sarango tënë ti mbi. Bango ndo ti mbi na ndo ti akota zo ti kodoro achangé (aRomain 13:1). Mbi zia nga lege ti gingo awali kirikiri, so ândö ayeke ye ti tere ti mbi.

Ye so ayeke lani ngangu na mbi ti changé ni ahon atanga ni kue ayeke bango ndo ti mbi na ndo ti abungbi nde nde so mbi yeke ândö na yâ ni. A hunda ngoi na mbi ti sara ni. Kpâ tongaso, mbi bâ tere ti mbi tongana zo so adö amba ti lo azia na lê ti kpale. Me na pekoni, a nzere na mbi ti hinga so gi Royaume ti Nzapa la ayeke ga na ye ti nzoni na dunia so. Tongaso mbi mû ngangu ti mbi kue ti sara kua ndali ti Royaume so nga ti mû maboko na azo ti hinga ye na ndo ni.​—Matthieu 6:33.

NZONI YE SO MBI WARA NA PEKONI:

Ândö, na lê ti mbi, groupe ti azo ayeke gi use: anzoni zo na asioni zo; na mbi yeke gi nduru ti tiri na azo so mbi bâ ala tongana asioni zo. Me Bible asara si mbi yeke na sioni pensé na ndo ti amba ti mbi encore ape. Mbi yeke gi ti ye azo kue tongana ti so a hunda na aChrétien (Matthieu 5:44). Mbeni lege so mbi yeke fa so mbi ye azo ayeke so mbi yeke fa nzoni tënë ti Royaume na ala. A nzere na mbi ti bâ tongana nyen kusala so asara si siriri na ngia amaï na popo ti azo nga a sara si ala yeke na tâ beku.

So fadeso mbi zia ye kue na tïtî Jéhovah, mbi yeke na siriri ti bê. Teti so lo la lo sara aye kue, mbi hinga mbi tene lo yeke zia pëpe si a ngbâ ti sara sioni na azo nga na anyama, wala ti tene pendere sese so abuba. Me na lege ti Royaume ti lo, na yâ ti kete ngoi lo yeke leke aye kue so abuba (Ésaïe 11:1-9). So mbi hinga so atënë ni so ayeke tâ tënë, a mû na mbi ngia; me mbeni ye so amû na mbi ngia ayeke so mbi yeke mû maboko na amba ti mbi ti mä na bê na ni. Ti fadeso, mbi bâ so mbi lingbi pëpe ti changé dunia so.