Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  No. 1 2018

1 Bible alingbi ti aidé mo ti kpe akpale

1 Bible alingbi ti aidé mo ti kpe akpale

Bible wani afa so a sû atënë ti yâ ni kue na gbe ti yingo ti Nzapa na “a yeke nzoni ti fa na ye na zo, ti suku na zo, ti kiri na aye na nzoni lege.” (2 Timothée 3:16). Eskê a yeke tâ tënë? Zia e bâ tongana nyen la atënë ti ndara ti Bible a-aidé azo ti kpe si angangu kpale ti yâ ti gigi asi na ala kozo si akpale ni aga ambeni ye so ayeke ngangu ti tene a leke ni.

NYONGO SÄMBA AHON NDÖ NI

Delphine, so e sara tënë ti lo kozo, atene so akpale so lo wara apusu lo ti tï na yâ ti nyongo sämba ahon ndö ni. Bible ake ape ti tene zo anyon sämba kete, me a tene nga a tene: “Ga pëpe oko ti azo so ayeke nyon vin ahon ndö ni.” (aProverbe 23:20). Nyongo sämba ahon ndö ni ayeke ga na akota kobela na zo, ayeke buba songo ti azo, nga ayeke fâ gbâ ti azo hio mingi. Tongana fade azo asara ye alingbi na wango ti ndara ti Bible so, andâ akpale ni so alingbi ti si ape.

Delphine asara ni. Fadeso, lo tene: “Mbi ga ti bâ so sämba asara nga si mbi girisa soucie ape. Mbi sara ye alingbi na wango so ayeke na aPhilippien 4:6, 7, so a tene: ‘Ala gi bê ti ala na ndö ti mbeni ye pëpe, me . . . ala hunda na Nzapa aye so agbu bê ti ala.’ Lakue na abï, tongana mbi komanse ti gi bê ti mbi, mbi toto na Jéhovah. Mbi fa atënë ti bê ti mbi na lo, atâa ayeke ngonzo, wala aye so ason mbi, wala mawa so asara mbi, nga mbi yeke toto na lo ti aidé mbi ti pensé na anzoni ye. Na ndade ni na ndapre, mbi yeke gi ti sara kue ti ngbâ ti pensé gï na anzoni ye. So mbi yeke sambela Jéhovah lakue ti aidé mbi tongaso, a sara si mbi pensé gï na ndö ti aye so mbi yeke na ni ahon ti pensé na aye so mbi yeke na ni ape. Mbi mû desizion ti ke sämba. Teti so siriri so mbi wara so ayeke kota mingi, mbi ye ti perdre ni ape.”

 LANGO-SIONI

Lango-sioni ayeke oko ti aye so ayeke ga na kota vundu na zo. Me Bible apeut ti aidé e ti kpe akpale ni so na lege so lo fa aye so ayeke na gunda ni, na tapande ti zia nzara ti mo na yâ ti mbeni zo nga na bango porno. Samuel, mbeni maseka-koli, atene: “A yeke lani ngangu na mbi ape ti zia nzara ti mbi na yâ ti mbeni zo. A peut ti si so mbi ye mbeni wali ape, me tongana mbi bâ so lo ye mbi, ye so ayeke pusu mbi ti zia nzara ti mbi na yâ ti lo, na a ga ti lo lani mbeni ye ti ngia na mbi.” Fani mingi ambeni zo atene lani na Samuel so lo la lo yeke zia nzara ti lo na yâ ti awali, même atâa lo sara ni ape, ye so apusu lo ti ngbâ ti sara lani ye ni so ti gue gï na ni. Me ye ni so asara lo nzoni ape. Fadeso lo tene: “So sioni sarango ye la ndali ti so ayeke sara si mo pensé gï na mo wani.”

Samuel adiko mbeni mbeti na ndö ti jw.org, so a sara ni ndali ti amaseka. Lo gbu li na ndö ti aProverbe 20:11, so a tene: “Même mbeni molenge, [wala ‘molenge ti koli’, bâ kete tënë na gbe ni] a yeke hinga lo na lege ti sarango ye ti lo, wala sarango ye ti lo ayeke nzoni nga na lege ni.” Tënë so a-aidé Samuel tongana nyen? Samuel aga ti bâ so ti zia nzara ti lo na yâ ti mbeni wali ayeke na lege ni ape. Lo tene: “Mbi manda nga so, tongana mbeni maseka agi ti zia nzara ti lo na yâ ti mbeni koli wala wali ye so ayeke sara si lo yeke ga ande nzoni koli ti wali ape wala nzoni wali ti koli ape. Mbi komanse ti imaginé wala tënë ti bê ti wali ti mbi ayeke duti ande tongana nyen tongana lo bâ mbi mbi zia nzara ti mbi na yâ ti mbeni wali nde. Ye so asara si mbi ga ti bâ so a yeke sioni sarango ye la. A yeke ngangu ape ti zia nzara ti mo na yâ ti mbeni zo, me a ye ti tene ape so a yeke nzoni ye la.” Samuel achangé. Ti kpe ti sara ye ni so asara nga si lo kpe lango-sioni.

Antonio ayeke même lani na yâ ti mbeni kota kpale so alingbi ti gue na lo ti sara lango-sioni: Lo ye bango porno mingi. Atâa so lo yeke na wali so lo sara mariage na lo si lo ye lo mingi, fani mingi lo yeke bâ ka afilm ni so. Lo tene so ti gbu li na ndö ti 1 Pierre 5:8 a-aidé lo mingi. Versê ni atene: “Ala bata bibe ti ala, zia lê ti ala akpengba. Wato ti ala Zabolo ayeke tambela tongana mbeni bamara so ayeke toto, na lo yeke gi mbeni zo ti te lo.” Antonio atene: “A-image ti porno ayeke mingi na yâ ti dunia so, na a-image ni so apeut ti ngbâ na yâ ti li ti zo aninga. Versê so a-aidé mbi ti hinga zo so ayeke na gunda ti aye ni so. Fadeso mbi hinga so gï Jéhovah oko la alingbi ti aidé mbi ti ‘zia lê ti mbi akpengba’ tongaso si mbi tiri na aye ni so si aye ti buba yâ ti li ti mbi, bê ti mbi, nga na mariage ti mbi so.” Antonio awara mungo maboko so lo yeke na bezoin ni, na a gue ngbii lo changé. Ye so asara si lo kpe même akota kpale.

A yeke polele so Bible amû na e apendere wango so alingbi ti aidé e ti kpe akota kpale. Me ka ti akpale ti e so aninga awe si na bango ni angbâ gï ngbango so? Zia e bâ tongana nyen la Mbeti ti Nzapa alingbi ti aidé e ti leke mara ti akpale ni so.

Awango ti Bible alingbi ti aidé e ti kpe ambeni kpale