Gue na tënë ti yâ ni

Gue na li ti atënë ni

Pendere dutingo beoko nga na Dango bê na kuâ ti Christ

Pendere dutingo beoko nga na Dango bê na kuâ ti Christ

‘Ala bâ tongana nyen a yeke nzoni mingi nga a nzere mingi ti duti ndo oko na yâ ti beoko!’—PS. 133:1.

ABIA: 149, 99

1, 2. Na ngu 2018, kpengba ye wa la ayeke sara ande si azo aduti beoko na mbeni lege so ayeke nde? Ngbanga ti nyen? (Bâ foto so ayeke na tongo nda ti article so.)

NA LANGO 31 ti mars ngu 2018, azo kutu mingi ayeke gue ande na mbeni bungbi so a yeke sara ni gï fani oko ngu oko oko. Na peko ti lindango ti lâ, aTémoin ti Jéhovah nga na ambeni zo mingi ayeke bungbi ande ti dabe ti ala na kuâ ti Jésus. Ngu oko oko, Dango bê na kuâ ti Christ ayeke sara si azo aduti beoko na mbeni lege so apika bê mingi ahon tanga ti aye kue na ndö ti sese.

2 E lingbi ti bâ na yâ ti li ti e so a nzere na Jéhovah na Jésus mingi ti bâ so l’heure oko oko na peko ti terê azo kutu mingi na ndö ti sese kue ayeke gue na kpengba bungbi so juska lango ni ahunzi. Bible atene kozo awe so “azo mingi mingi, so mbeni zo alingbi ti diko wungo ti ala pëpe, [ayeke] londo na popo ti amara kue, akete mara kue, azo ti kodro kue, ayanga ti kodro kue”, ala yeke dekongo na kota go, ala tene: “E wara salut ndali ti Nzapa ti e so aduti na ndö ti trône, nga ndali ti Molenge ti taba ni.” (Apoc. 7:9, 10). Ti gonda Jéhovah na Jésus  na lege ti Dango bê na kuâ ti Christ ngu oko oko tongaso ayeke tâ pendere mingi.

3. Ahundango ndo wa la article so ayeke kiri tënë na ni?

3 Ambeni hundango ndo alondo so article so ayeke kiri tënë na ni. (1) Tongana nyen la mbi lingbi ti leke terê ti mbi ndali ti Dango bê na kuâ ti Christ nga ti wara aye ti nzoni na guengo dä? (2) Na alege wa la Dango bê na kuâ ti Christ amû maboko na azo ti Nzapa ti duti beoko? (3) Nyen la e oko oko e lingbi ti sara ti maï beoko? (4) Ndangba Dango bê na kuâ ti Christ ayeke duti ande dä? Tongana a yeke tongaso, a yeke duti ande lawa?

LEGE TI LEKE TERÊ TI E NDALI NI NA TI WARA AYE TI NZONI NA GUENGO DÄ

4. Ngbanga ti nyen la a yeke kota ye ti tene e gue na Dango bê na kuâ ti Christ?

4 Ngbanga ti nyen la a yeke kota ye ti tene e gue na Dango bê na kuâ ti Christ? Mbeni raison ni ayeke so abungbi ti congrégation ayeke mbage ti vorongo ti e. Biani, Jéhovah na Jésus ayeke bâ azo so asara effort ti gue na bungbi so, so ayeke kota ahon abungbi kue so e yeke sara na yâ ti ngu ni kue. E ye ti tene Jéhovah na Jésus abâ so gï oko raison so e yeke gue pëpe na Dango bê na kuâ ti Christ ayeke ndali ti so mbeni ngangu ye asara si e lingbi pëpe ti duti dä. Tongana asarango ye ti e afa so abungbi ti e ayeke kota mingi na e, a yeke sara si Jéhovah awara mbeni raison encore ti bata iri ti e na yâ ti “buku ti dango bê” ti lo. A iri ni nga “mbeti ti fini”. A sû na yâ ni iri ti azo kue so Jéhovah aye ti mû na ala fini ti lakue lakue.—Mal. 3:16; Apoc. 20:15.

5. Na yâ ti alango so aga kozo na Dango bê na kuâ ti Christ, tongana nyen la e lingbi ti ‘bâ terê ti e ti bâ wala e yeke na yâ ti mabe’?

5 Na yâ ti alango so aga kozo na Dango bê na kuâ ti Christ, e lingbi ti zia mbeni ngoi nde ti sambela na ti gbu li ti e nzoni na ndö ti songo ti e na Jéhovah. (Diko 2 aCorinthien 13:5.) Bazengele Paul atene na aChrétien, lo tene: “Ala ngbâ ti bâ terê ti ala ti bâ wala ala yeke na yâ ti mabe.” E lingbi ti sara ni tongana nyen? E lingbi ti hunda terê ti e: ‘Mbi mä na bê biani so mbi yeke na yâ ti oko bungbi so Jéhovah ayeke sara kua na ni ti sara ye so bê ti lo aye? Mbi yeke sara kue ti fa nzoni tënë ti Royaume nga ti fa ye? Asarango ye ti mbi afa so mbi hinga biani so e yeke na lâ ti nda ni nga so komandema ti Satan aga nduru ti hunzi awe? Mbi ngbâ ti duti na mara ti confiance so mbi yeke na ni lani na Jéhovah nga na Jésus na ngoi so mbi mû lani fini ti mbi na Jéhovah Nzapa?’ (Mat. 24:14; 2 Tim. 3:1; aHéb. 3:14). Ti gbu li ti e na ndö ti akiringo tënë na mara ti ahundango ndo so ayeke mû maboko na e ti ngbâ ti bâ terê ti e ti bâ wala e yeke tongana nyen.

6. (a) Oko lege so ague na fini ayeke so wa? (b) Mbeni ancien ayeke leke terê ti lo ndali ti Dango bê na kuâ ti Christ ngu oko oko tongana nyen? Tongana nyen la mo kue mo lingbi ti sara tongaso?

6 Mbeni ye so e lingbi ti sara ti leke terê ti e ndali ti Dango bê na kuâ ti Christ ayeke ti gbu li ti e na ndö ti a-article so afa na e ndani so bungbi so ayeke kota ye mingi. (Diko Jean 3:16; 17:3.) Oko lege so ague na zo na fini ti lakue lakue ayeke ti “gi ti hinga” Jéhovah nga ti ‘mä na bê’ na oko Molenge ti lo, Jésus. Ti leke terê ti e ndali ti Dango bê na kuâ ti Christ, e lingbi ti soro ti manda ambeni ye so alingbi ti mû maboko na e ti ga nduru mingi na Jéhovah nga na Jésus. Bâ ye so mbeni ita so ayeke ancien teti angu mingi asara. Teti angu mingi, lo bungbi a-article ti Tour ti Ba Ndo so asara tënë na ndö ti Dango bê na kuâ ti Christ nga na ndoye so Jéhovah na Jésus afa na mbage ti e lo zia ni nde. Na yâ ti ayenga so aga kozo na Dango bê na kuâ ti Christ ni, lo yeke diko a-article ni so encore na lo yeke gbu li ti lo na ndö ti ndani so a yeke kota ye ti gue na bungbi so. Na ambeni ngoi, lo yeke zia article oko wala use na ndö ti ati so lo yeke na ni. Ancien so abâ so, so lo kiri lo diko a-article ni so nga lo diko aversê so a yeke diko ni ndali ti Dango bê na kuâ ti Christ na lo gbu li ti lo na ndö ni, lo manda afini ye ngu oko oko. Ye so ayeke  nzoni mingi ayeke so ngu oko oko lo bâ so lo kiri lo ye Jéhovah na Jésus mingi. Tongana mo sara tongaso mo kue mo yeke ye Jéhovah na Jésus mingi. Mo yeke kiri nga singila mingi na ala ndali ti ye so ala sara, na mo yeke wara aye ti nzoni mingi na lege ti Dango bê na kuâ ti Christ.

DANGO BÊ NA KUÂ TI CHRIST ASARA SI E YEKE BEOKO

7. (a) Na bï so Jésus azia gere ti Kobe ti Seigneur na sese, sambela wa la lo sara? (b) Nyen la afa so Jéhovah akiri tënë na sambela ti Jésus?

7 Na bï so Jésus azia gere ti Kobe ti Seigneur na sese, lo sambela ti tene adisciple ti lo kue aduti beoko nga ti tene ala duti beoko tongana ti so lo na Babâ ti lo ayeke beoko. (Diko Jean 17:20, 21.) Jéhovah akiri tënë biani na sambela ti Molenge ti lo so lo ye lo mingi so, na fadeso azo kutu mingi amä na bê so Jéhovah atokua lani Molenge ti lo na sese. Na popo ti abungbi kue, Dango bê na kuâ ti Christ la afa polele so aTémoin ti Jéhovah ayeke beoko. Na ndö ti sese kue, azo ti amara mingi so couleur ti terê ti ala ayeke nde nde ayeke bungbi ndo oko na aplace ti bungbi. Na ambeni ndo ni, a yeke ngangu ti tene azo so mara ti ala ayeke nde nde aduti ndo oko ti voro Nzapa. Me beoko so e yeke na ni ayeke pendere mingi na lê ti Jéhovah na Jésus.

8. Tënë ti nyen la Jéhovah atene na Ézéchiel na ndö ti dutingo beoko?

8 Ti e awakua ti Jéhovah, so e yeke beoko adö bê ti e ape. Jéhovah asara lani tënë ni kozo awe. Gbu li na ndö ti tënë so lo tene na Ézéchiel ti bungbi akeke use ndo oko, keke “ti Juda” nga na keke “ti Joseph”. (Diko Ézéchiel 37:15-17.) Atënë so azo ahunda” so ayeke na yâ ti Tour ti Ba Ndo ti juillet 2016 atene: “Na lege ti prophète Ézéchiel, Jéhovah atene kozo awe so azo ti Israël ayeke kiri na Sese ti Zendo nga ala yeke kiri ti bungbi ti ga mara oko. Prophétie ni afa nga kozo awe so azo so ayeke voro Nzapa na ngoi ti alango nda ni so ayeke bungbi ti ga mara oko.”

9. Ngu oko oko na ngoi ti Dango bê na kuâ ti Christ, nyen la e yeke bâ ka so Ézéchiel asara lani tënë ni?

9 A to nda ni na ngu 1919 ti ga na ni, kozoni Jéhovah akiri aleke yâ ti azo so a soro ala ti gue na yayu na lo bungbi ala oko. Ala yeke tongana keke “ti Juda”. Na pekoni, yeke yeke ala so ayeke na beku ti duti na fini ti lakue lakue na ndö ti sese abungbi oko na ala. Azo so ayeke na beku ti duti na fini na ndö ti sese ayeke tongana keke “ti Joseph”. Jéhovah atene lani so lo yeke bungbi akeke use so ndo oko ti ‘sara si aga gï keke oko’ na yâ ti maboko ti lo (Ézéch. 37:19). Lo sara si azo so a soro ala ti gue na yayu na “ambeni taba” aga “kundu oko ti ataba”. (Jean 10:16; Zach. 8:23). Laso, agroupe use so ayeke beoko, na ala yeke sara na Jéhovah maboko na maboko. Gbia ti ala ayeke oko, Jésus Christ so na yâ ti prophétie ti Ézéchiel Nzapa airi lo “wakua ti mbi David”. (Ézéch. 37:24, 25). Ngu oko oko, tongana e bungbi oko na ngoi ti Dango bê na kuâ ti Christ, e yeke bâ beoko so ayeke na popo ti agroupe use so Ézéchiel asara lani tënë ni. Me nyen la e oko oko e lingbi ti sara ti bata beoko so ayeke na popo ti awakua ti Nzapa nga ti sara si amaï?

AYE SO E OKO OKO E LINGBI TI SARA TI MAÏ BEOKO

10. Tongana nyen la e lingbi ti maï beoko na popo ti azo ti Nzapa?

10 Kozo ye so e lingbi ti sara ti maï beoko na popo ti azo ti Nzapa ayeke ti sara terê ti e kete. Na ngoi so Jésus ayeke lani na sese, lo wa adisciple ti lo ti sara terê ti ala kete (Mat. 23:12). Tongana e sara terê ti e kete, e yeke sara ye pëpe tongana ti azo ti dunia so abâ terê ti ala kota ahon amba ti ala. Me sarango terê kete ayeke mû maboko na e ti woko terê ti e na gbe ti azo so amû li ni, na mara ti bibe ti mango yanga tongaso ayeke kota ye mingi ndali ti so ayeke sara si congrégation aduti beoko. Ye so ayeke kota ayeke so tongana e sara terê ti e kete, a yeke nzere na Nzapa, ndali ti so Nzapa “ake azo ti baba, me lo yeke  mû kota nzobe ti lo na azo so asara terê ti ala kete.”—1 Pi. 5:5.

11. Tongana nyen la gbungo li na ndö ti nda ti mapa na vin ti Dango bê na kuâ ti Christ ayeke mû maboko na e ti maï beoko na popo ti e?

11 Use ye so e lingbi ti sara ti maï beoko ti e ayeke ti gbu li ti e na ndö ti nda ti mapa na vin ti Dango bê na kuâ ti Christ. A lingbi e sara ni kozo na ngoi ti Dango bê na kuâ ti Christ nga mbilimbili na bï ni (1 aCor. 11:23-25). Mapa so a sara na levure ape ayeke tapande ti terê ti Jésus so siokpari ayeke dä ape so lo mû ni na sandaga, na vin ni ayeke tapande ti mênë ti lo so atuku. Me gï ti hinga aye so alingbi ape. A lingbi e dabe ti e so ye so Jésus afuta ti zi azo andu kota ndoye so Jéhovah na Jésus afa ni na mbage ti e. Jéhovah afa ndoye ti lo na mbage ti e na lege so lo mû Molenge ti lo ndali ti e, nga Jésus afa ndoye ti lo na mbage ti e na lege so lo yeda na bê ti lo wani ti mû fini ti lo ndali ti e. Tongana e gbu li ti e na ndö ti ndoye ti ala ayeke pusu e ti ndoye ala. Nga, ndoye so e na amba ti e awakua ti Jéhovah e yeke na ni na mbage ti lo ayeke tongana mbeni kamba so abungbi e nga ayeke kpengba beoko so ayeke na popo ti e.

Tongana e pardonné azo, e yeke maï beoko na popo ti e (Bâ paragraphe 12, 13)

12. Na yâ ti toli ti Jésus na ndö ti mbeni gbia na angbâa ti lo, tongana nyen la Jésus afa polele so Jéhovah aye ti tene e pardonné azo?

12 Ota ye so e lingbi ti sara ti maï beoko na popo ti e ayeke ti pardonné amba ti e na bê ti e kue. Tongana e pardonné azo so ason bê ti e, e yeke fa so e kiri singila so Jéhovah apardonné asiokpari ti e na lege ti ye so Christ afuta ti zi na azo. Gbu li ti mo na ndö ti toli ti Jésus so ayeke na Matthieu 18:23-34. Hunda terê ti mo: ‘Bê ti mbi apusu mbi ti sara ye alingbi na ye so Jésus afa? Mbi yeke kanga bê na amba ti mbi awakua ti Jéhovah nga mbi comprendre ala? Mbi yeke nduru ti pardonné azo so ason bê ti mbi?’ A yeke tâ tënë so ambeni siokpari ayeke kota ahon ambeni, nga ambeni siokpari so amba ti e asara, a yeke ngangu mingi na e so e yeke mbilimbili-kue ape ti pardonné ni. Me toli ti Jésus so afa na e ye so Jéhovah aye ti tene e sara ni. (Diko Matthieu 18:35.) Jésus afa na e polele so Jéhovah ayeke pardonné e ape tongana e ke ti pardonné aita ti e tongana ala changé biani bê ti ala. So ayeke biani mbeni ye so a lingbi e gbu li ti e nzoni na ndö ni. Tongana e pardonné azo tongana ti so Jésus afa na e ti sara, e yeke bata pendere beoko ti e.

13. Tongana nyen la ti fa so e ye ti sara si siriri amaï ayeke maï beoko?

 13 Tongana e pardonné azo, e fa so e ye ti sara si siriri amaï. Dabe ti mo so bazengele Paul atene so a lingbi e “sara ngangu ti bata beoko ti yingo na yâ ti kamba ti siriri so abungbi [e] oko.” (aÉph. 4:3). Na ngoi so lango ti Dango bê na kuâ ti Christ ayeke pusu nduru nga mbilimbili na bï ti Dango bê na kuâ ti Christ, gbu li ti mo nzoni na ndö ti fason so mo sara ye na mbage ti amba ti mo. Hunda terê ti mo: ‘A yeke polele na azo so ahinga mbi so mbi yeke bata ngonzo na bê ti mbi ape na terê ti azo so ason bê ti mbi? Azo alingbi ti bâ so mbi sara kue ti maï siriri nga na beoko?’ So ayeke ambeni kota hundango ndo ti gbu li ti e dä na ngoi so.

14. Tongana nyen la e lingbi ti fa so e yeke “kanga bê na mba na yâ ti ndoye”?

14 Osio ye so e lingbi ti sara ti maï beoko na popo ti e ayeke ti sara ye na ndoye tongana Jéhovah, Nzapa ti ndoye (1 Jean 4:8). Zia e tene lâ oko ape na ndö ti amba ti e awakua ti Jéhovah, e tene: “A lingbi mbi ndoye ala, me mbi yeke duti na kpengba songo na ala ape.” Tongana e yeke na mara ti pensé so, e sara ye ague nde na wango ti Paul so atene a lingbi e “kanga bê na mba na yâ ti ndoye”. (aÉph. 4:2). Bâ so lo tene gï pëpe so a lingbi e “kanga bê na mba”. Me lo tene so a lingbi e sara ni “na yâ ti ndoye”. Kangbi ayeke dä. Na yâ ti acongrégation ti e, e yeke wara mara ti azo nde nde, na Jéhovah la agboto ala kue na mbage ti lo (Jean 6:44). Tongaso, kite ayeke dä ape so Jéhovah abâ anzoni raison mingi ti ye ala. Tongana aita ti e alingbi ti tene Nzapa aye ala, tongana nyen la e lingbi ti tene so ala lingbi pëpe ti tene e ye ala? A lingbi a nzere na e mingi ti ye ala tongana ti so Jéhovah ahunda na e ti sara.—1 Jean 4:20, 21.

NDANGBA DANGO BÊ NA KUÂ TI CHRIST AYEKE DUTI ANDE LAWA?

15. E hinga tongana nyen so ndangba Dango bê na kuâ ti Christ ayeke duti ande dä?

15 Mbeni lâ, e yeke sara ande ndangba Dango bê na kuâ ti Christ. E hinga tongana nyen? Paul atene na aChrétien so a soro ala ti gue na yayu so tongana ala dabe ti ala na kuâ ti Jésus ngu oko oko, ala “yeke fa tënë ti kuâ ti Seigneur juska lo ga.” (1 aCor. 11:26). Tënë “ga” so ayeke na yâ ti versê so aye ti sara tënë ti oko ‘gango’ ti Jésus so lo sara tënë ni na yâ ti prophétie na ndö ti ngoi ti nda ni. Na ndö ti kota ye ti vundu so aga nduru awe, lo tene: “Fä ti Molenge ti zo ayeke sigi na yayu, na amara kue ti sese ayeke pika terê ti ala ti fa so ala yeke na vundu. Ala yeke bâ ande Molenge ti zo so ayeke ga na ndö ti ambinda ti yayu, na ngangu nga na kota gloire. Na kota totongo ti trompette, [Jésus ayeke] tokua a-ange ti lo, si ala yeke bungbi na ndo oko azo ti lo so a soro ala, ti londo na apupu osio, nga ti londo na mbeni mbage ti yayu ti si na mbeni mbage ni.” (Mat. 24:29-31). ‘Bungbingo na ndo oko azo ti lo so a soro ala’ aye ti sara tënë ti ngoi so aChrétien kue so a soro ala ti gue na yayu so angbâ na ndö ti sese ayeke wara ande futa ti ala na yayu. A yeke si na peko ti so kota ye ti vundu ayeke to nda ni me kozo na bira ti Harmaguédon. Na pekoni, Jésus na azo 144 000 kue ayeke tiri na agbia ti sese na ala yeke sö benda na ndö ti ala (Apoc. 17:12-14). Tanga ti Dango bê na kuâ ti Christ so e yeke sara ayeke duti ti so e yeke sara ande kozo ti tene Jésus ‘aga’ ti bungbi azo so a soro ala ti gue na yayu.

16. Ngbanga ti nyen la mo leke na bê ti mo ti gue na Dango bê na kuâ ti Christ na ngu so?

16 Zia e leke na bê ti e ti wara aye ti nzoni na lege so e gue na Dango bê na kuâ ti Christ na lango 31 ti mars ngu 2018. Zia e hunda Jéhovah ti mû maboko na e ti ngbâ ti sara si beoko ti azo ti lo amaï. (Diko Psaume 133:1.) Girisa ape so mbeni lâ, e yeke sara ndangba Dango bê na kuâ ti Christ. Juska ti si na lango ni so, zia e sara kue ti gue na Dango bê na kuâ ti Christ, nga zia e bâ na nene ni mingi pendere beoko so e yeke na ni na ngoi ti Dango bê na kuâ ti Christ.