Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  No. 1 2017

 KOTA MAMA-TENE NI | LEGE TI WARA YE TI NZONI NA LEGE TI DIKONGO BIBLE

Nyen la ayeke sara si dikongo Bible ni anzere na mo?

Nyen la ayeke sara si dikongo Bible ni anzere na mo?

Dikongo Bible ayeke sara nyen na mo? A yeke nzere na mo ape wala a yeke dë bê ti mo? Mingi ni, a yeke fason so mo yeke diko na Bible ni. Zia e bâ aye so mo lingbi ti sara ti wara nzara ti dikongo Bible nga ti wara ngia dä mingi ahon ti kozo.

Soro mbeni nzoni traduction ti Bible ti laso. Tongana mo yeke diko mbeni mbeti so na yâ ni gbâ ti atënë ni akpengba wala so mo wara gï angbene tënë so mo hinga ni ape, peut-être a yeke nzere ande na mo ape ti ngbâ ti diko ni. Tongaso, a lingbi mo soro Bible so atënë ni ayeke ngangu ape ti comprendre ni nga so a lingbi ti ndu bê ti mo. Ye oko, na oko ngoi ni, a yeke nzoni a traduire ni nzoni nga tâ na lege ni. *

Sara kua na a-ordinateur nga na Internet. Laso, a yeke wara Bible so a imprimé ni imprimengo, nga so ayeke na ndö ti Internet. A lingbi ti diko ambeni Bible na ndö ti Internet wala a lingbi ti téléchargé ni ndali ti dikongo ni na ndö ti ordinateur, tablette wala na ndö ti téléphone. Ambeni Bible ni nde so ayeke nga na ndö ti Internet ni alingbi ti mû maboko na mo ti comprendre hio ambeni versê ti Bible na ndö ti a-oko tënë wala même ti haka fason so atraduire na ambeni versê na yâ ti aBible nde nde. Tongana mo ye ti mä ni mango ahon ti diko ni, a-enregistré nga Bible na ndö ti Internet ni. Azo mingi aye ti mä ni na ngoi so ala yeke na yâ ti bus, ala yeke sara akua ti da wala ala yeke sara ambeni kua so amû lege na ala ti mä ni. Mo peut ti tara mbeni kode ni so anzere na mo?

Sara kua na aye ti mandango na Bible. Aye ti mandango na Bible alingbi ti mû maboko na mo ti wara aye ti nzoni mingi na yâ ti dikongo Bible ti mo. A yeke wara acarte ti ambeni kodro so Bible asara tënë ni, so a yeke  mû maboko na mo ti hinga ndo so kodro ni ayeke dä na yâ ti dikongo ye ti mo ni nga ti gbu li ti mo na ndö ni. A-article tongana ti so ayeke na yâ ti Tour ti Ba Ndo so wala “La Bible et vous” so ayeke na ndö ti site jw.org, a lingbi ti aidé mo ti hinga nda ti mingi ti ambage ti Bible.

Changé alege so mo yeke diko na Bible ni. Tongana mo bâ so dikongo Bible so akomanse na kozo buku ni ti hunzi na ndangba ni ayeke ngangu na mo, a yeke nzoni mo komanse ti diko mbeni mbage ti Bible so mo bâ anzere na mo. Tongana mo ye ti hinga ye mingi na ndö ti azo so Bible asara tënë ti ala, mo lingbi ti gi ti diko ye na ndö ti ala na yâ ti Bible ni. A yeke wara akode use so akpengba ape na yâ ti encadré so atene: “ Gi ti hinga ambeni zo so Bible asara tënë ti ala.” Peut-être, mo ye ti diko Bible ti gue oko na amama-tene ni wala na lege ti amolongo ti aye so asi lani. Ngbanga ti nyen mo tara ti sara mbeni kode ni so ape?

^ par. 4 Azo mingi abâ so a traduire Bible, Mbeti ti Nzapa ti fini dunia so tâ na lege ni, so zo alingbi ti sara confiance na ni nga so dikongo ni ayeke ngangu ape. A yeke aTémoin ti Jéhovah la asara bible ni so, na a sigi na ni na ayanga ti kodro ahon 130 tongaso. Mo peut ti téléchargé mbeni copie ni na ndö ti site jw.org, wala ti téléchargé ni na ndö ti Application JW Library. Wala, tongana mo ye, aTémoin ti Jéhovah alingbi ti ga na mo mbeni bible ni na yanga-da ti mo.

TI HINGA AMBENI TËNË

MBETI TI NZAPA TI FINI DUNIA

Amama-ndia ti kua ti kiringo peko ti Bible

Amama-ndia oku so afa lege na kua ti kiringo peko ti Mbeti ti Nzapa ti fini dunia.