Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  No. 1 2017

A yeke gi mbeni kete ye so zo acomprendre ni ape?

A yeke gi mbeni kete ye so zo acomprendre ni ape?

MBENI kete molenge-wali abâ mbeni guru ti wâ so ayeke sigi na gbe ti mbeni usine nga a yeke mû ndo mo bâ mo tene ambinda ti yayu. Lo pensé ti lo so kua ti usine ayeke ti sara ambinda ti yayu. Gï kete ye so molenge so acomprendre ni ape so, a lingbi ti sara zo ngia. Me, mingi ti aye so e comprendre ni ape alingbi ti sara ye mingi na yâ ti gigi ti e. Na tapande, tongana e diko notice ti mbeni yöro si e comprendre ni ape alingbi ti ga na kota kpale na e.

Mbeni tënë ti Nzapa so zo acomprendre ni ape alingbi même ti ga na kota kpale mingi. Na tapande, ambeni zo acomprendre pëpe aye so Jésus afa lani (Jean 6:48-68). Me ahon ti tene ala gi ti manda ye mingi na ndö ni, ala ke aye kue so Jésus afa ni. So tâ nzoni ye la ahon ala!

Mo diko Bible ti tene afa lege na mo? Sarango tongaso ayeke mbeni nzoni ye. Me, eskê kpale ayeke dä tongana ambeni ye so mo diko, mo comprendre ni ape? A yeke ye so asi na azo mingi la. Zia e bâ aye ota so azo mingi acomprendre ni ape.

  • Ambeni zo acomprendre pëpe commandement ti Bible so ahunda ti “kpe mbeto ti tâ Nzapa”. Ala pensé ti ala so aye ti sara tënë ti mbeni kota mbeto ti Nzapa (Zo-ti-fa-tene 12:13). Me Nzapa aye pëpe si azo so ayeke voro lo ayeke na mara ti pensé tongaso na ndö ti lo. Lo tene: “Sara mbeto pëpe, ndali ti so mbi yeke na mo. Gi bê ti mo pëpe, ndali ti so mbi yeke Nzapa ti mo. Mbi yeke kpengba mo, ti tâ tënë ni, mbi yeke mû maboko na mo.” (Ésaïe 41:10). Ti kpe mbeto ti Nzapa aye ti tene ti ne lo mingi.

  • A yeke gbi ande sese na wâ?

    Ambeni zo ni amä ti ala yâ ti tënë ti Bible so ape, so a tene: “Ngoi ayeke dä ndali ti ye oko oko kue, . . . ngoi ti dungo zo, na ngoi ti kuâ ti zo.” Ala pensé so Nzapa la ayeke fa tâ ngoi so azo kue ayeke kui na ni (Zo-ti-fa-tene 3:1, 2). Me, versê so asara tënë na ndö ti gigi ti zo nga so kuâ ayeke ye so ayeke si na azo kue. Bible afa nga na e so adesizion ti e wani alingbi nga ti sara si lango ti fini ti e akiri nduru. Na tapande, a tene: “Kpengo mbeto ti Jéhovah asara si gigi ti zo aninga.” (aProverbe 10:27; Psaume 90:10; Ésaïe 55:3). Tongana nyen? Na tapande, tongana e bâ Bible na nene ni ayeke pusu e ti kpe asioni sarango ye tongana nyongo sämba ahon ndö ni nga na lango-sioni.1 aCorinthien 6:9, 10.

  • So Bible atene a bata yayu na sese “ti ku na wâ,” ambeni zo apensé ti ala so Nzapa ayeke gbi ande sese so (2 Pierre 3:7). Me, Nzapa amû zendo so lo yeke futi lâ oko pëpe sese so e yeke na ndö ni so. Nzapa asara “si sese aluti nzoni na ndö ti fondation ni; a yeke bougé na place ni lâ oko pëpe.” (Psaume 104:5; Ésaïe 45:18). A yeke gï asioni ye ti dunia so la ayeke futi ni na wâ, me sese so ayeke ngbâ ti lo ande teti lakue lakue. Ti yayu, so a sara tënë ni ge so, a yeke pëpe yayu so atongoro nga so Nzapa ayeke dä so la a yeke futi ni na wâ.

NA AMBENI NGOI AMBENI ZO ACOMPRENDRE BIBLE APE NGBANGA TI NYEN?

Tongana ti so mo londo ti bâ na yâ ti atapande so a fa ge so, azo mingi acomprendre pëpe aversê so ala diko na yâ ti Bible. Me ngbanga ti nyen la Nzapa azia si mara ti ye tongaso asi? Ambeni zo apeut ti tene: ‘Tongana Nzapa ayeke Nzapa ti ndara nga lo hinga ye kue, lo lingbi fade ti mû na azo kue mbeni buku so a sû atënë ni kue polele na so zo alingbi ti comprendre ni. Ka ngbanga ti nyen lo sara ni ape?’ Zia e bâ araison ota so ndali ni azo alingbi pëpe ti comprendre Bible.

  1. A sara Bible ti tene azo so asara terê ti ala kete la acomprendre ni nga ala sara nzara ti manda ni. Jésus atene na Babâ ti lo, lo tene: “Babâ, mbi sepela mo na lê ti azo kue, mo Seigneur ti yayu na ti sese, ngbanga ti so mo honde aye so  ngangu na awandara nga na azo so ahinga ndo, me mo fa ni na akete molenge.” (Luc 10:21). A sû Bible na mbeni lege so gï azo so ayeke na nzoni bango ndo la alingbi ti comprendre ni. Azo ti baba, “awandara nga na azo so ahinga ndo” ayeke comprendre ka Bible pëpe. Me, azo so adiko Bible na mara ti bango ndo ti “akete molenge”, ala sara terê ti ala kete nga ala yeke na nzara ti hinga ni, ala la ayeke wara lege ti comprendre tënë ti Nzapa so nzoni. Nzapa asara Bible tâ pendere mingi!

  2. A sara Bible ndali ti azo so aye biani ti tene Nzapa amû maboko na ala ti comprendre ni. Jésus afa so azo ayeke na bezoin ti tene a-aidé ala ti comprendre nzoni mingi aye so lo fa. A yeke mû maboko na ala tongana nyen? Jésus afa ni, lo tene: “Wamungo maboko, yingo vulu, so Babâ ayeke tokua ande na iri ti mbi, lo si lo yeke fa ande na ala aye kue, nga lo yeke dabe ti ala na aye kue so mbi fa.” (Jean 14:26). Ni la, Nzapa amû yingo vulu ti lo, so ayeke ngangu ti lo ti sara na aye, ti mû maboko na azo ti comprendre ye so ala diko na yâ ti Bible. Me, Nzapa ayeke zia yingo vulu ti lo pëpe na ndö ti azo so ake ti zia bê ti ala na lo ti mû maboko na ala, a sara si tongana ala diko Bible ala yeke comprendre ni ape. Me, yingo vulu ni ayeke pusu aChrétien ti wara hingango ye mingi tongana ala gue ti aidé ambeni zo so asara nzara ti comprendre Bible.Kusala 8:26-35.

  3. Azo alingbi ti comprendre ambeni versê ti Bible gï na mbeni ngoi so alingbi. Na tapande, a hunda na prophète Daniel ti sû mbeni tënë na ndö ti ye so ayeke si kekereke. Mbeni ange atene na lo, atene: “Daniel, mo fa peko ti atënë so na zo pëpe, kpo nzoroko na terê ti mbeti ni juska na ngoi ti nda ni.” A sara angu mingi awe la si azo mingi ayeke diko buku ti Daniel so, me ala comprendre ni nzoni ape. Même Daniel ni wani kue acomprendre pëpe ambeni ye so lo sû lani. Na sarango terê kete, lo tene: “Mbi mä tënë ni me mbi mä yâ ni pëpe.” Biani, azo alingbi ti comprendre nzoni mingi prophétie ti Nzapa so Daniel asû so, me mbilimbili gï na ngoi so Nzapa asoro. Ange ni afa ni, lo tene: “Daniel mo gue, ndali ti so zo ayeke mä yâ ti atënë ni so pëpe nga a yeke kpo nzoroko dä juska na ngoi ti nda ni.” Azo wa la ayeke comprendre tënë ti Nzapa? Bible atene: “Mbeni zo ti sioni ayeke mä yâ ti aye so pëpe; me azo so ahinga ti bâ yâ ti aye nzoni ayeke mä ande yâ ni.” (Daniel 12:4, 8-10). Biani, Nzapa ayeke fa pëpe nda ti ambeni versê ti Bible juska ngoi ni alingbi awe si.

Eskê na mbeni ngoi aTémoin ti Jéhovah acomprendre ambeni tënë ti Bible ape? En. Me tongana asi na ngoi so Nzapa asara si atënë ni asigi polele, aTémoin ti Jéhovah ayeke comprendre ni. Ala bâ so ala sara ye tongana ti abazengele ti Christ, so asara terê ti ala kete ti changé bango ndo ti ala tongana Jésus amû wango na ala.Kusala 1:6, 7.

Bango ndo ti kete molenge-wali so na ndö ti ndo so ambinda alondo dä, a lingbi ti duti gï mbeni kete ye so lo comprendre ni ape. Me, ye so Bible afa ayeke kota ye mingi teti mo. Tënë ti Bible ayeke nga kota ye ndali ti azo kue so ayeke gi ala wani ti comprendre ye so ala diko na yâ ti Bible. Tongaso, hunda na mbeni zo ti mû maboko na mo ti comprendre ye so mo yeke diko so. Hunda azo so asara terê ti ala kete ti manda Bible, ala so azia bê ti ala na ndö ti yingo vulu ti Nzapa ti mû maboko na ala ti comprendre Bible, ala so ahinga biani so e yeke na ngoi so Nzapa aye ti tene e comprendre Bible ahon ti ândö. Ku pëpe ti sara tënë ni na aTémoin ti Jéhovah wala diko aye so ala sara recherche na ndö ni nzoni si ala zia ni na ndö ti site Internet jw.org. Bible atene: “Tongana mo toto ti hinga ndo . . . , mo yeke wara lege ti hinga ye na ndö ti Nzapa.”aProverbe 2:3-5.