Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO DÉCEMBRE 2015

 KOTA MAMA-TENE NI | MO LINGBI TI MÄ YÂ TI BIBLE

Gi si a mû maboko na mo ti mä yâ ti Bible

Gi si a mû maboko na mo ti mä yâ ti Bible

Tongana mo gue na kodoro-wande fini fini, mo peut ti tingbi na ambeni ye so mo habitué na ni kozo ape, na tapande, azo, angobo ti sarango ye, akobe nga na nginza ti kodoro ni. Ye so apeut ti sara mo nzoni ape.

Mara ti ye ni so apeut ti si na mo na ngoi so mo diko Bible pan. Na dikongo ni, mo yeke tingbi na ambeni ye so asi ândö, so ayeke afini ye na lê ti mo. Na tapande, azo tongana aPhilistin, ambeni ngobo ti sarango ye, na tapande ti mbeni zo so ayeke ‘suru bongo’ na tere ti lo, wala mbeni kobe so a iri ni manne nga na nginza so a iri ni drachme (Exode 16:31; Josué 13:2; 2 Samuel 3:31; Luc 15:9). Aye ni so kue apeut ti sara si li ti mo aga kirikiri. Legeoko tongana ti so mo yeke sara tongana mo gue na kodoro-wande, peut-être mo yeke hunda na mbeni zo ti tene lo fa nda ti aye ni so na mo nzoni.

MUNGO MABOKO NA NGOI TI ÂNDÖ

Depuis na ngoi so a komanse ti sû Bible, na yâ ti angu 1500 tongaso kozo ti Christ, a mû maboko na azo ti mä yâ ti atënë ni. Na tapande, Moïse, so ayeke kozo zo so afa lege na mara ti Israël, “afa nda ti” atënë ti Nzapa na azo ni.—Deutéronome 1:5FD.

Angu ngbangbo mingi na pekoni, ambeni zo ayeke lani dä so ayeke fa nda ti Tënë ti Nzapa na azo. Na tapande, na ngu 455 kozo ti Christ, gbâ ti aJuif na amolenge ti ala abungbi tere lani na mbeni ndo so azo ayeke gue ka dä mingi, na gbata ti Jérusalem. Azo so ayeke fa andia ti Nzapa ‘adiko mbeti ni’ na kota go. Me, ala ngbâ gi ge awe ape. “Ala fa nda ni si azo [ni] ahinga nda ti ye so a diko na ala” so.—Néhémie 8:1-8.

Angu ngbangbo mingi na pekoni, Jésus Christ asara mara kua ti fango ye ni so. A hinga lo lani tongana mbeni wafango ye (Jean 13:13). Atâa a yeke groupe ti azo, wala a yeke gi zo oko, Jésus ayeke fa ye na ala kue. Na mbeni ngoi, lo fa ye na gbâ ti ambeni zo na ndo ti mbeni hoto, na “li ti gbâ ti azo ni so akpe ngbanga ti kode ti fango ye ti lo”. (Matthieu 5:1, 2; 7:28). A si na ngu 33, na ngoi so lo na ambeni disciple ti lo use ayeke gue na mbeni kete kodoro, so ayeke nduru na Jérusalem, lo sara lisoro na ala, lo “zi nda ti Mbeti ti Nzapa kue [wala lo fa ndani polele]” na ala.—Luc 24:13-15, 27, 32.

Adisciple ti Jésus nga kue ayeke fa lani tënë ti Nzapa na azo. Mbeni lâ, mbeni kota zo ti Éthiopie angbâ ti diko mbeni versê ti Mbeti ti Nzapa. Mbeni disciple ti Jésus, so iri ti lo ayeke Philippe, aga nduru na lo, na lo hunda koli ni, lo tene: “Mo yeke mä yâ ti ye so mo yeke diko so biani?” Koli ni atene: “Ti tâ tënë ni, mbi lingbi ti mä yâ ni tongana nyen tongana mbeni zo ti fa nda ni na mbi ayeke dä pëpe?” Na pekoni, Philippe afa nda ti versê ni so na lo nzoni.—Kusala 8:27-35.

MUNGO MABOKO LASO

Legeoko tongana ti azo so ayeke fa nda ti tënë ti Nzapa ândö, laso, aTémoin ti Jéhovah ayeke manda Bible na azo na yâ ti akodoro ahon 239 (Matthieu 28:19, 20). Yenga oko oko, ala yeke aidé azo ahon million 9, ti mä yâ ti Bible. Mingi ti azo so ala yeke manda Bible na ala ayeke aChrétien ape. Ala yeke manda ni na azo gi senge senge, nga ala lingbi ti sara ni na da ti azo ni wala na mbeni ndo nde so bê ti zo ni aye. Ti ambeni zo ni, ala yeke manda Bible ni na lege ti téléphone wala Internet.

Tongana mo ye ti tene a ga a manda Bible na mo, hunda mbeni Témoin ti Jéhovah. Mo yeke bâ ande so, Bible ayeke mbeni mbeti so zo apeut ti mä yâ ni, na “a yeke nzoni ti fa na ye na zo, ti suku na zo, ti kiri na aye na nzoni lege, ti se na zo na lege ti mbilimbili,” si zo ni “alingbi na yâ ti ye kue, na a mû na lo aye kue so lo yeke na bezoin ni ti tene lo sara nzoni kusala kue.”—2 Timothée 3:16, 17.

 

TI HINGA AMBENI TËNË

Ndani nyen ti manda Bible?

Bible ayeke mû maboko laso na azo kutu na kutu na yâ ti dunia kue ti wara akiringo tënë na angangu tënë so ala yeke hunda na yâ ti gigi ti ala. Mo nga kue mo ye ti duti na popo ti ala?

E yeke manda Bible na azo tongana nyen?

Na ndo ti sese kue, azo ahinga aTémoin ti Jéhovah tongana azo so ayeke manda Bible na azo senge senge. Bâ tongana nyen a yeke sara ni.

Mbeni kapa ti mandango Bible ndali ti azo kue

Bâ akiringo tënë na ahunda ti azo na ndo ti kapa ti e ti mandango Bible na azo.