Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO NOVEMBRE 2015

 KOTA MAMA-TENE NI | BANGO NDO TI NZAPA NA NDO TI BIRA

Bango ndo ti Nzapa na ndo ti bira laso

Bango ndo ti Nzapa na ndo ti bira laso

Laso, azo ayeke bâ pasi mingi na gbe ti amba ti ala. Mingi ti ala ayeke toto lakue na Nzapa ti tene lo zi ala na yâ ni, nga ala yeke hunda tere ti ala wala lo yeke zi ala ande? Me eskê Nzapa amä atoto ti ala ni? Ka ti azo so si ayeke tiri bira ti gi ti kaï na pasi ti ala so ayeke tongana nyen? Nzapa abâ ti lo ye so ala yeke sara so tongana nyen? Eskê lo yeke aidé ala na yâ ni?

Harmaguédon ayeke duti ande bira so ayeke kaï abira kue

Kozoni kue, hinga so Nzapa ahinga pasi so azo ayeke bâ na yâ ti dunia mobimba laso so, na lo leke ti sara mbeni ye ndali ni (Psaume 72:13, 14). Na yâ ti Bible, Nzapa amû zendo so azo so ayeke “bâ pasi na ye ti vundu ni, . . . [ala] yeke wu pupu” ande. Lawa? “Na ngoi so Seigneur Jésus ayeke sigigi na yayu, lo na angangu ange ti lo, . . . tongana lo yeke futa kula na azo so ahinga Nzapa pëpe nga na azo so asara ye alingbi pëpe na nzoni tënë na ndo ti Seigneur ti e Jésus.” (2 aThessalonicien 1:7, 8). Ngoi ti sigingo ti Jésus ni ayeke si ande na ngoi ti ye so Bible airi ni “bira ti kota lango ti Nzapa, Lo ti ngangu ahon kue,” wala Harmaguédon.—Apocalypse 16:14, 16.

Na ngoi ti bira ni so, Nzapa ayeke sara kua pëpe na azo, me na Molenge ti lo, Jésus Christ nga na angangu turugu so ayeke na yayu kâ ti tiri bira na asioni zo. Angangu turugu ti yayu ni so ayeke sara ande si pasi, so azo ayeke sara na amba ti ala, ahunzi biaku biaku.—Ésaïe 11:4; Apocalypse 19:11-16.

Juska laso, bango ndo ti Nzapa na ndo ti bira achangé ape. Lo ngbâ ti bâ bira tongana mbeni ye so a lingbi lo sara kua na ni ti kaï na pasi nga na asarango ye ti ngangu so ambeni zo ayeke sara na amba ti ala. Nga, gi Nzapa lo wani la si lo yeke na droit ti fa ngoi so a yeke tiri na mara ti bira tongaso nga na zo so ayeke tiri bira ni. Tongana ti so e londo ti sara tënë na ndo ni, ngoi ti bira so Nzapa aleke ti tiri ti kaï na  asioni sarango ye, nga na pasi so awakua ti lo ayeke bâ, angbâ kete, na Jésus Christ la ayeke tiri ande bira ni so. Ye so aye ti tene so abira so laso azo ayeke sara ni, na ndo ti sese, ayeke pëpe abira so anzere na bê ti Nzapa, même si a yeke ndali ti mbeni nzoni raison.

Zia e mû mbeni tapande: Tara ti bâ aita use so atiri na ngoi so babâ ti ala ayeke dä ape. Na pekoni, ala arrêté tiri ni kete, ala iri babâ ti ala na téléphone. Mbeni atene so mba ti lo ni la akomanse fade tiri ni, na mbeni oko ni atene nga so mba ti lo ni la agi yanga ti lo. Babâ ni abâ so, ala use kue ayeke ku ti tene lo gbu part ti ala na yâ ti papa ni. Me, na peko ti so lo mä ala use kue awe, lo tene na ala ti arrêté tiri ni, nga ala ku lo kiri na yanga-da awe si ala leke tënë ni. Amolenge ni use kue aku kete. Kete na pekoni, ala komanse encore ti tiri. Na ngoi so babâ ni akiri na yanga-da, bê ti lo ason na tere ti amolenge ni, na lo punir ala use kue, ngbanga ti so ala mä fade yanga ti lo ape.

Laso, azo so ayeke tiri bira na popo ti ala ayeke ku ti tene Nzapa agbu part ti ala. Me, Nzapa agbu ti lo part ti zo na yâ ti abira ti laso so ape. Lo tene polele na yâ ti Bible, lo tene: “Ala kiri sioni teti sioni na mbeni zo pëpe”, nga, “Ala wani ala futa kula pëpe.” (aRomain 12:17, 19). Nga, lo tene so a yeke nzoni azo akanga bê ‘aku Lo’, lo yeke ga ande ti tiri bira ni na Harmaguédon (Psaume 37:7). Ni la, tongana azo ake ti ku Nzapa na ala wani akomanse ti tiri bira, lo bâ ni tongana sarango ye na baba nga tongana sarango ye ti ngangu na zo la, na a nzere na lo oko ape. Ni la, ande na Harmaguédon, Nzapa ayeke fa ngonzo ti bê ti lo nga lo yeke leke atënë so ayeke na popo ti azo fani oko, biani biani, na lege so lo yeke sara “si bira awe juska na nda ti sese.” (Psaume 46:10; Ésaïe 34:2). Biani, Harmaguédon ayeke duti ande bira so ayeke kaï abira kue.

Royaume ti Nzapa ayeke ga ande na gbâ ti anzoni ye na azo, na mbeni oko ti anzoni ye ni ayeke so lo yeke sara ande si bira ahunzi. Jésus asara lani tënë ti gouvernement ni so na yâ ti sambela so azo ahinga ni mingi, so ayeke: “Zia royaume ti mo aga. Zia a sara ye so bê ti mo aye, na yayu legeoko nga na ndo ti sese.” (Matthieu 6:10). Royaume ti Nzapa ni ayeke hunzi gi bira ape, me lo yeke futi nga ande asioni zo, so ala la ayeke na gunda ti abira (Psaume 37:9, 10, 14, 15). * Adisciple ti Jésus ayeke ku anzoni ye ni so kungo.—2 Pierre 3:13.

E yeke ngbâ ti ku juska lawa ti tene Royaume ti Nzapa aga ahunzi pasi, sarango ye ti ngangu na zo nga na asarango ye ti sioni? Aprophétie ti Bible so aga tâ tënë laso afa so e yeke biani na “alango ti nda ni”, so ti tene dunia so ayeke gue ti hunzi (2 Timothée 3:1-5). * Na yâ ti ngoi kete, Royaume ti Nzapa ayeke ga ti futi asioni ye so kue na lege ti bira ti Harmaguédon.

Tongana ti so e tene fade kozo, azo so ayeke wara kuâ ande na ngoi ti ndangba bira ni so ayeke “azo so asara ye alingbi pëpe na nzoni tënë na ndo ti Seigneur ti e Jésus.” (2 aThessalonicien 1:8). Me girisa ape so, tongana a yeke nzoni zo la akui, wala sioni zo la akui, a yeke nzere na Nzapa ape (Ézéchiel 33:11). Teti so “lo ye si zo oko akui [na ngoi ti ndangba bira ni so] pëpe,” lo ngbâ ti sara kue ti tene a fa nzoni tënë na ndo ti Seigneur ti e Jésus “na ndo ti sese kue so azo ayeke dä tongana mbeni tënë ti témoin ndali ti amara kue,” kozoni si nda ni aga (2 Pierre 3:8, 9; Matthieu 24:14; 1 Timothée 2:3, 4). Biani, na lege ti kota kua ti fango tënë so aTémoin ti Jéhovah ayeke sara na ndo ti dunia kue, laso, azo ayeke na pasa ti hinga Nzapa, ti yeda na nzoni tënë na ndo ti Jésus nga ti ngbâ na fini ti bâ ngoi so bira ayeke duti ande dä mbeni ape.

^ par. 9 Royaume ti Nzapa ayeke sara si kuâ, so ayeke wato ti azo, ayeke duti ande dä mbeni ape. Na lembeti 16 ti mbeti so, a fa so Nzapa ayeke zingo ande azo gbani gbani so akui, même gbâ ti azo so akui na lege ti bira.

^ par. 10 Ti hinga ambeni tënë na ndo ti tënë ti alango ti nda ni, bâ chapitre 9 ti buku Bible afa nyen biani?, so aTémoin ti Jéhovah asigigi na ni.

TI HINGA AMBENI TËNË

Tâ zo so ayeke na peko ti bira na pasi

Na lege wa Bible atingbi mbeni bira so alondo lani na yayu na bira so amû lani sese kue nga na akpale so ayeke si na ndo ti sese ge?