Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO NOVEMBRE 2015

 KOTA MAMA-TENE NI | BANGO NDO TI NZAPA NA NDO TI BIRA

Bango ndo ti Nzapa na ndo ti bira na ngoi ti Jésus

Bango ndo ti Nzapa na ndo ti bira na ngoi ti Jésus

A-Juif ti ngoi ti Jésus abâ pasi lani mingi na gbe ti komandema ti aRomain. Legeoko tongana ti akotara ti ala, kite ayeke dä ape so ala sambela lani Nzapa fani mingi ti tene lo zi ala na yâ ti pasi ni so. Na pekoni, tongana a sara tënë ti Jésus na ala, ala hunda tere ti ala atene eskê lo la lo yeke Messie so a sara tënë ti gango ti lo so? Kite ayeke dä ape so, mingi ti azo ni ayeke “fade na beku so koli so ayeke lo so a fa lo kozo awe ti zi azo ti Israël” na gbe ti pasi so aRomain ayeke sara na ala (Luc 24:21). Me, lo zi nga ala na yâ ti pasi ni ape. A si na ngu 70, aturugu ti Rome ni aga afuti Jérusalem nga na temple ni.

Nyen la apassé nyen? Ngbanga ti nyen la Nzapa atiri ndali ti aJuif ni ape, tongana ti so lo sara ândö na akotara ti ala? Lo mû yanga na ala ti tiri bira ti tene ala sigigi na gbe ti pasi ni ape ndali ti nyen? Bango ndo ti Nzapa na ndo ti tënë ti bira achangé? Ên-ën. Me, a yeke aJuif ni la aga na kpale ni. Ala ke lani Jésus, so ayeke Messie ni (Kusala 2:36). Ye so asara si yâ ti kpengba songo so mara ni ayeke na ni lani na Nzapa afâ.—Matthieu 23:37, 38.

Nzapa ayeke bata mara ti aJuif nga na sese so lo mû lani na ala so encore ape. Ala yeke encore na droit pëpe ti tiri bira na iri ti Nzapa, wala ti tene Nzapa a-aidé ala na yâ ni pëpe. Tongana ti so Jésus atene kozo awe, anzoni ye so mara ti Israël ni apeut fade ti wara na mbage ti Nzapa, a mû pasa ni so fadeso gi na mbeni fini mara, so na yâ ti Bible a iri ni “Israël ti Nzapa.” (aGalate 6:16; Matthieu 21:43). Israël ti Nzapa ni ayeke bungbi ti aChrétien so Nzapa asoro ala, na lege ti yingo vulu ti lo, ti tene ala gue na yayu. A yeke na ala la a tene na ala polele ândö, a tene: “Fadeso ala yeke mara ti Nzapa.”—1 Pierre 2:9, 10.

So fadeso aChrétien ni aga “mara ti Nzapa” awe so, eskê Nzapa ni ayeke tiri ndali ti ala, ti zi ala na yâ ti pasi so aRomain ayeke sara na ala? Wala lo yeke mû yanga na ala ti tene ala wani atiri na azo ni so ayeke sara pasi na ala so? Ên-ën, lo sara tongaso ape. Ngbanga ti nyen? Tongana Nzapa la amû yanga ti tene a tiri mbeni bira, lo wani la lo yeke fa ngoi so a lingbi ti tiri na mara ti bira ni so, tongana ti so e tene fade na yâ ti ambeni mbage ni so ahon so. Nzapa atiri lani ndali ti aChrétien ni so ape, na lo mû nga yanga na ala ti sara bira ape. A yeke polele so, ngoi ni so ândö a yeke pëpe ngoi so Nzapa aleke ti tiri bira ti kaï na asioni sarango ye nga na pasi so azo ayeke sara na tere ti amba ti ala.

Ni la, legeoko tongana ti akotara ti ala, aChrétien ni so akanga bê ti ku ngoi so Nzapa aleke ti tiri bira ti kaï na asioni sarango ye nga na pasi so azo ayeke sara na tere ti amba ti ala. Me ti ku na ngoi ni so, Nzapa amû yanga na ala pëpe ti tene ala wani atiri bira na awato ti ala. Jésus afa ni lani polele na yâ ti afango ye ti lo. Na tapande, lo hunda pëpe na adisciple ti lo ti tiri bira, me lo tene na ala, lo tene: “Ala ngbâ ti ndoye awato ti ala na ti sambela ndali ti azo so ayeke sara ye ti ngangu na ala.” (Matthieu 5:44). Nga, na ngoi so Jésus ayeke fa lani tënë ti ngoi so aturugu ti Rome ayeke ga ti futi Jérusalem, Jésus atene na adisciple ti lo ti kpe, me pëpe ti ngbâ na yâ ti gbata ni ti tiri bira ni, na a yeke ye so ala sara lani la.—Luc 21:20, 21.

Na ndo ni, Nzapa amû lani yingo ti lo na bazengele Paul ti sû tënë so: “Ala wani ala futa kula pëpe, . . . teti a sû na Mbeti ti Nzapa, a tene: ‘Jéhovah atene: Futango kula ayeke ti mbi, fade mbi si mbi yeke kiri na futa na zo.’” (aRomain 12:19). Tënë so Paul atene ge so, a yeke mara ti tënë so Nzapa atene lani, a sara angu ngbangbo mingi awe, so e yeke wara ni na Lévitique 19:18 nga na Deutéronome 32:35. Tongana  ti so e bâ fade na yâ ti mbage so ahon, mbeni ye so Nzapa asara ti zi awakua ti lo ti giriri na gbe ti azo so asara pasi na ala, a yeke so lo aidé ala ti tiri bira na azo ni so. Tongaso, atënë ti Paul so aye ti fa na e so bango ndo ti Nzapa na ndo ti tënë ti bira achangé ape. Na ngoi ti Jésus nga kue, Nzapa abâ tiringo bira tongana mbeni ye so ayeke mû lege na lo ti zi awakua ti lo nga ti kaï asioni sarango ye nga na pasi so azo ayeke sara na tere ti amba ti ala. Me, tongana ti so lo sara ândö, Nzapa lo wani la si lo yeke fa ngoi so a yeke sara na bira ni nga na zo so ayeke tiri bira ni.

A yeke polele so Nzapa amû yanga lani pëpe na aChrétien ti ândö ti tiri abira. Me ka ti laso ayeke tongana nyen? Eskê laso Nzapa amû yanga na mbeni groupe ti azo ti tiri bira? Wala eskê ngoi ti tene Nzapa amû li ni ti tiri bira ndali ti awakua ti lo asi awe? Bango ndo ti Nzapa na ndo ti tënë ti bira laso ayeke tongana nyen? Ndangba mbage so e yeke gue ti bâ ni ayeke kiri tënë na ahunda so.